ISAMBILILO 22

Mungasimikila Uli Ilyasi Lisuma?

LIZYINI

Lino mukusambilila icumi icaya muli Baibo mungatandika ukwelenganya ukuti, ‘Aliwensi alinzile ukumanya icumi cii.’ I cacumi aliwensi alinzile ukucimanya. Nomba limwi mungaumvwa intete ukunenako yauze pali vino mukusambilila. Lekini tusambilile pali vino mungacita pakuti mutauvwa intete nu kutandika ukunenako yauze ilyasi lyaya muli Baibo ni nsansa.

1. Uzye munganenako uli antu yano mwamanya vino mukusambilila?

Asambi yakwe Yesu yatiile: “Swemo tutanga tute ukulanda pa vintu vino twalola nu kuvwa.” (Milimo 4:20) Yatemilwe sana vino yasambilile kuli Yesu icakuti yalondanga ukunenako aliwensi. Uzye namwe a vino mukayuvwa? Ndi cakuti a vino mukayuvwa, mwalola inzila isuma ino munganenelamo ya lupwa ni vyuza pali vino mukusambilila.—Belengini Kolose 4:6.

Inzila zimwi zino mungaomvya

Lino mukulanda na ya lupwa, mwayanenako vimwi ivyaya muli Baibo, limwi mungatandika na mazwi akuti: “Nasambilileko vimwi visuma umulungu uu.”
Mwalangako cuza winu umulwale nanti uwatasakamikwa ilembo ilya kukomelezya.
Mwanena yano mukaomba nayo vino mwasambilile pa kulongana na lino mwasambililanga Baibo nga yamuzya pali vino ivintu vili umu umi winu.
Mwalanga ya cuza inu webusaiti ya jw.org.
Mwanenako yamwi ukuzanwako lino mukusambilila Baibo nanti ukuyalanga vino yangalenga isambililo lya Baibo pa jw.org.

2. U mulandu ci uno cacindamila ukwimika uyo wa kusimikila pamwi ni cilongano?

Asambi yakwe Yesu yacisile na vyuze ukucila sile pa kusimikila ilyasi lisuma uku yantu yano yamanyile. Yesu wayatumile umu kusimikila “yaili yaili pakuti yamukoleelele umu misumba yonsi.” (Luka 10:1) Pa mulandu wakuti umulimo wa kusimikila wateyanyiziwe ningo, calenzile antu aingi yakwate isyuko lya kuvwa ilyasi lisuma. Nupya ukusimikila pamwi kwalenzile asambi yaye sana ni nsansa. (Luka 10:17) Uzye namwe mungimika uyo wa kuombela pamwi ni cilongano umu mulimo wa kusimikila?

LONDELEZYINI NA VYUZE

Sambililini pali vino mungacita pakuti mutaya sana ni ntete na vino mungaya ni nsansa ndi cakuti mukuombako umulimo wa kusimikila ilyasi lisuma.

3. Yeova alaya namwe

Yamwi akulonda ukusimikila yangauvwa intete pali vino yangalanda na antu nanti pali vino antu yangayasuka.

Uzye mukauvwa intete zya kunenako yauze pali vino mukusambilila? U mulandu ci uno mwalandila vivyo?

Tambini VIDYO, alino mulanzyanye iuzyo ilyatililondelelapo.

VIDYO: Napefile Kuli Yeova Ukuti Angazwe Ukuya Umusipe (4:05)

Uzye ya Nte yaa acance yacisile uli pakuti yate ukuvwa intete?

Belengini Ezaya 41:10, alino mulanzyanye iuzyo lii:

U mulandu ci uno mulinzile ukupepela nga muvwa intete zya kusimikila?

Uzye imumanya?

Ya Nte Yakwe Yeova aingi yatala yayuvwapo ukuti yatange yasimikile ilyasi lisuma kuli yauze. Ya Sergey yayuvwanga asile sile nupya cayatalilanga ukulanda na antu. Nomba yatandike ukusambilila Baibo. Yalanzile ukuti: “Nanti cakuti nali ni ntete natandike ukunenako yauze vino nasambililanga. Ni canzungwisye i cakuti ukunena yauze pali Baibo kwalenzile inte ukuyuvwa uwa sile sile. Nupya ukunenako yauze pali vino nazumiilemo kwakomizye utailo wane.”

4. Mwaya nu mucinzi

Lino mutatala mwasimikila umwi, mulinzile ukwelenganya pali vino mukulonda ukulanda. Nomba cacindama ukwelenganya na pali vino mungalanda umu mucinzi. Belengini 2 Timoti 2:24 na 1 Petulo 3:15, alino mulanzyanye mauzyo yaa:

Uzye mungaomvya uli ivikomo vii lino mukulanzyanya na yauze pali Baibo?
Ya lupwa yamwi nanti vyuza, yangakana ukukutika kuli vino mukuyanena. Uzye mungacita uli? I vyani vino mutalinzile ukucita?
U mulandu ci uno cingazipila ukuzya mauzyo umu mucenjelo ukucila sile ukunena antu vino yalinzile ukuzumila?

5. Kunenako yauze ilyasi lisuma kukaleta insansa

Yeova wapeezile Yesu umulimo wa kunenako yauze ilyasi lisuma. Uzye Yesu walolanga uli umulimo uwo? Belengini Yoani 4:34, alino mulanzyanye mauzyo yaa:

Ukulya ivyakulya ivisuma kukalenga tuye nu umi usuma nupya kukalenga tuye ni nsansa. U mulandu ci uno Yesu walandiile ukuti ukucita ukulonda kwakwe Leza, wakwe ukusimikila ilyasi lisuma kwaya wa vyakulya?
Uzye mukwelenganya ukuti i visuma ci ivyaya umu kunenako yauze pi lyasi lisuma?

Vino mungacita

Lino muli pa kulongana kwa mukasi ka mulungu, mwalola vino mungacita pa kutandika ukulanzyanya.
Lanzyanyini na kasambilizya winu pali vino mungacita pakuti mutandike ukulalandako malyasi mu kulongana kwa mukasi ka mulungu. Malyasi ya yasambi yangamwazwa ukuipekanya ukunenako yauze pali vino mukusambilila.
Mwaomvya iciputulwa cakuti “Yamwi Yakalanda Ukuti” nanti cakuti “Umwi Angamuzya Ukuti” ivili umwi buku kwene lii, lino mukuipekanya ukwasuka mauzyo yano antu yakauzya sana.

UMWI ANGAMUZYA UKUTI: “I lyasi ci lino unkwatile?”