KATAK 22

Ewi Wãween Kwõmaroñ Kwal̦o̦k Naan ñan Ro Jet kõn Ennaan eo Em̦m̦an?

PLAY

Ilo am̦ katak kõn Baibõl̦ eo, kwõmaroñ l̦õmn̦ak ippam̦ make, ‘Aolep armej rej aikuj jel̦ã kõn katak kein!’ Em̦ool, aolep rej aikuj in jel̦ã kõn katak ko rem̦ool ilo Baibõl̦! Ijoke, bõlen kwõj ikkũm̦kũm̦ ñan kwal̦o̦k ñan ro jet men ko kwõj katak kaki. Jen etale ewi wãween kwõmaroñ jol̦o̦k am̦ mijak im ikkũm̦kũm̦, innem lo m̦õn̦õn̦õ ilo am̦ kwal̦o̦k naan ñan ro jet kõn ennaan eo em̦m̦an ilo Baibõl̦ eo.

1. Ewi wãween am̦ maroñ kwal̦o̦k ñan ro kwõjel̦ã kajjier kõn men ko em̦õj am̦ katak kaki?

Ri-kal̦oor ro an Jesus rar ba: “Kõmij jab maroñ bõjrak jãn am kõnono kõn men ko kõmar loi im roñ.” (Jerbal 4:20) Joñan aer kar kaorõk men ko rar katak jãn Jesus, rar kõn̦aan kwal̦o̦k kake ñan aolep armej. Kwõj ke bõk ejja eñjake rot in? El̦aññe aet, pukot iien ko repel̦l̦o̦k ñan am̦ maroñ kwal̦o̦k ñan baam̦le eo am̦ im ro m̦õttam̦ ilo jouj kõn men ko kwõj katak kaki.—Riit Kolosse 4:6.

Jet wãween ko kwõmaroñ jino kaki

Ñe kwõj bwebwenato ippãn baam̦le eo am̦, kwõmaroñ kwal̦o̦k kõn juon men jãn Baibõl̦ ilo am̦ ba: “Ewõr juon men em̦m̦an iar katak ilo wiik in.”
Kwal̦o̦k kõn juon eoon in kaenõm̦m̦an ñan juon m̦õttam̦ el̦ap an inepata ak enañinmej.
Kwal̦o̦k ñan ri-jerbal ro m̦õttam̦ me rej kajjitõk ejet am̦ mour kõn men ko kwaar katak kaki ilo am̦ kar katak Baibõl̦ ak jãn iien kweilo̦k ko.
Kwal̦o̦k ñan ro m̦õttam̦ kõn weepjait eo jw.org.
Kũrtok ro jet ñan kobawaj ilo iien am̦ katak Baibõl̦, ak kwal̦o̦k ñan er kilen kajjitõk aer katak Baibõl̦ ilo jw.org.

2. Etke am̦ kwal̦o̦k naan ippãn eklejia eo ej juon mejãnkajjik elukkuun em̦m̦an?

Ri-kal̦oor ro an Jesus rar jab kwal̦o̦k naan wõt ñan armej ro rejel̦ã kajjier. Ak Jesus “ear jilkinl̦o̦k er, ruo iaan ruo iaan, bwe ren etal im̦aan ñan aolep bukwõn” bwe ren kwal̦o̦k naan ie. (Luk 10:1) Aer kar kwal̦o̦k naan ilo wãween in elaajrak ear kõm̦m̦an bwe en maroñ lõñl̦o̦k armej ro rej roñ kõn ennaan eo em̦m̦an. Ejjab men in wõt, ak el̦ap an kar ri-kal̦oor ro lo lañlõñ jãn aer kwal̦o̦k naan ippãn doon. (Luk 10:17) Kwõmaroñ ke bareinwõt kõm̦m̦an am̦ mejãnkajjik ñan kwal̦o̦k naan ippãn eklejia eo?

KAM̦WILAL̦L̦O̦K AM̦ MEL̦EL̦E

Lale ewi wãween kwõmaroñ jol̦o̦k am̦ ikkũm̦kũm̦ im mijak, im bareinwõt lo lañlõñ eo ej itok jãn am̦ kwal̦o̦k kõn ennaan eo em̦m̦an ippãn ro jet.

3. Jeova enaaj pãd ippam̦

Jet me rekõn̦aan kwal̦o̦k naan remaroñ inepata kõn wãween an nãj armej ro watõk er ak kõn men ko renãj ba ak kõm̦m̦ani.

Kwõj ke ikkũm̦kũm̦ in kwal̦o̦k naan kõn men ko kwõj katak kaki? Etke?

Kõjo̦e PIJAIN ALWÕJ eo, innem bwebwenato kake kajjitõk in:

PIJAIN ALWÕJ: I Prayed to Jehovah for Courage (4:05)

Ewi wãween an kar jo̦dikdik rein me rej Ri-Kõnnaan ro an Jeova, anjo̦ ioon aer mijak in kwal̦o̦k naan kõn Jeova?

Riit Aiseia 41:10, innem bwebwenato kake kajjitõk in:

Ñe kwõj mijak in kwal̦o̦k naan, ewi wãween an jar maroñ jipañ eok?

Kwaar jel̦ã ke?

Elõñ iaan Ri-Kõnnaan ro an Jeova rar l̦õmn̦ak ilo jinoin bwe reban maroñ kwal̦o̦k kõn ennaan eo em̦m̦an ñan ro jet. Ñan waanjoñak, Sergey ear l̦õmn̦ak bwe ejjel̦o̦k tokjãn im ear pen an kõnnaan ippãn ro jet. Bõtab ear jino katak Baibõl̦ eo. Ej ba: “Meñe iar mijak, ak iar jino bwebwenato ippãn ro jet kõn men ko iar katak kaki. Iar lukkuun bwilõñ bwe itok wõt jãn aõ kõnnaan ippãn ro jet kõn Baibõl̦ eo, men in ear jipañ bwe en l̦apl̦o̦k aõ peran. Men in ear bareinwõt kõkajoorl̦o̦k aõ tõmaki katak kein.”

4. Kwal̦o̦k jouj im kautiej

Ñe kwõj kwal̦o̦k kõn ennaan eo em̦m̦an, jab l̦õmn̦ak wõt kõn ta ko kwõnaaj ba ak kwõn bar l̦õmn̦ak kõn wãween am̦ naaj ba. Riit 2 Timote 2:24 im 1 Piter 3:15, innem bwebwenato kake kajjitõk kein:

Ewi wãween am̦ maroñ jerbali eoon kein ñe kwõj kõnnaan ippãn ro jet kõn Baibõl̦ eo?
Jet iaan ro ilo baam̦le eo am̦ ak ro m̦õttam̦ remaroñ jab errã ippam̦. Ta eo kwõmaroñ kõm̦m̦ane? Ta eo kwõn jab kõm̦m̦ane?
Etke emaroñ em̦m̦anl̦o̦k ñan kwal̦o̦k kajjitõk ko ilo jouj ijello̦kun am̦ ba ñan armej ro ta ko rej aikuj tõmaki?

5. Kwal̦o̦k naan kõn ennaan eo em̦m̦an ej bõktok lañlõñ

Jeova ear lel̦o̦k ñan Jesus jerbal eo ñan kwal̦o̦k kõn ennaan eo em̦m̦an. Ewi wãween an kar Jesus watõke jerbal in? Riit Jon 4:34, innem bwebwenato kake kajjitõk kein:

Ad kañi m̦õñã ko renno̦ im reuõne rej kõm̦m̦an bwe jen maroñ mour wõt im rej kam̦õn̦õn̦õik kõj. Etke Jesus ear keidi ad kõm̦anm̦ane ankilaan Anij, ekoba ad kwal̦o̦k kõn ennaan eo em̦m̦an, ñan ad kañi m̦õñã ko?
Ilo am̦ l̦õmn̦ak, ta jeraam̦m̦an ko kwõmaroñ loi itok wõt jãn am̦ kwal̦o̦k kõn ennaan eo em̦m̦an?

Kein Jipañ

Ilo kweilo̦k ko ilo lukwõl̦pãn wiik, pukot wãween ko kwõmaroñ jino bwebwenato ippãn ro jet.
Bwebwenato ippãn eo kwõj katak ippãn im lale ewi wãween kwõmaroñ bok kun̦aam̦ ilo kweilo̦k ko ilo lukwõl̦pãn wiik. Ñe ewõr kun̦aam ilo kweilo̦k kein, men in emaroñ kõpooj eok ñan kwal̦o̦k ñan ro jet kõn men ko kwõj katak kaki.
Kõjerbale m̦õttan eo ilo bok in me ej ba “Jet Armej Rej Ba” ak “Juon Emaroñ Kajjitõk” ñan jipañ eok kõmmãlmel wãween am̦ nãj uwaaki kajjitõk ko ak naanin jum̦ae ko ekkã an armej ro kwal̦o̦ki.

JUON EMAROÑ KAJJITÕK: “Ewi ennaan?”

Ñe ewõr ej kajjitõk ippam̦ kajjitõk rot in, ewi wãween am̦ maroñ kortokjãn iien in epel̦l̦o̦k ñan kwal̦o̦k kõn men ko kwõj katak kaki jãn Baibõl̦ eo?

TARLEP IN KATAK EO ILO TUKADU

Am̦ kwal̦o̦k kõn ennaan eo em̦m̦an ippãn ro jet ej bõktok lañlõñ, im meñe kwõj l̦õmn̦ak epen, ak ilo m̦ool, am̦ jino kwal̦o̦k naan emaroñ jab pen ãinwõt am̦ kõtmãne.

Ãlij

Etke jen kwal̦o̦k ennaan eo em̦m̦an ñan ro jet?
Ewi wãween am̦ maroñ kõm̦m̦ane men in ilo juon wãween ejouj im ej kwal̦o̦k kautiej?
Ewi wãween am̦ maroñ anjo̦ ioon am̦ mijak im ikkũm̦kũm̦ ñan kwal̦o̦k naan?

Kar kadedel̦o̦k katak in ilo:

Mejãnkajjik

L̦õmn̦ak kõn juon armej me kwõmaroñ kwal̦o̦k kõn ennaan eo em̦m̦an ñane. L̦õmn̦ak kõn ta eo kwõnaaj ba, wãween am̦ naaj ba, im ñããt eo kwõnaaj ba ñane.

Mejãnkajjik ko jet:

Your other goal