SMALKANKA 22
¿Man nahki sip sma upla wala ra sturi yamni nani ba smalkaia?
Baibil tânka kasak ba lan takma taim, ban kra naku lukma: “¡Upla sut naha nu takaia sa!”. Baha lika kasak sa; upla sut baha nu takaia sa. Sakuna sringkam brisma kaia sa, kan dîa lan takisma ba nahki upla kum ra wiaia lukisma. Kaisa laki kaikaia man nahki sip sma sringkam ba pura lui liliakira Baibil tânka kasak ba smalkaia.
1. ¿Man nahki sip sma kakairikam nani ra wiaia dîa Baibil wina lan takisma ba?
Jisas disaipilka nani ba naku win: “Yang nani sip apia, diara nani kaikri ba bara walri ba sin aisaras kaia” (Sturka Nani 4:20). Witin nani Jisas wina dîa lan takan ba tara kulki kan, baha mita want kan upla nani sut ra Jisas tânka ba smalkaia. ¿Man sim sât damra walisma? Baku sa kaka, chans pliki bas dîa lan takisma ba aisaia, pamalikam bara pânikam nani ra rispik wal smalkaia sip sma (Kolosi 4:6 aisi kaikma).
Naha lukanka nani yus munaia sip sma
-
Pamalikam ra Baibil tânka kum aisama taim, naku wiaia sip sma: “Diara yamni kum lan takri naha wikka ra”.
-
Pamalikam, apia kaka pâmnika kum siknis bara sari sa taim sip sma Baibil tikska kum wal kupia bukaia.
-
Man wal wark taki uplika nani ba man nahki auma ba mai walbia taim, man sip sma wiaia dîa lan takram ba Baibil stadika ra, apia kaka kangrigisan asla aidrubanka ra.
-
Pânikam nani ra Internet pliska jw.org ba mariks.
-
Upla wala ra paiws Baibil stadika ra yulam kahbia, apia kaka mariks nahki witin nani stadika kum makabaia sip sa jw.org ra.
2. ¿Dîa muni pain sa lukaia kangrigisan aikuki smalkaia warkka daukaia?
Jisas disaipilka nani ba ai kakairika nani ra baman smalkras kan. Jisas bui witin nani ra “wâl wâl ra saki ai kainara blikan, tawan nani bara plis bani ra” smalkaia (Luk 10:1). Baku tnatka ra smalkaia warkka ba asla ridi daukan bara upla ailal chans brin sturi yamni nani ba walaia. Baku sin disaipil nani ba asla wark takan, ba mita kasak lilia lâka brin (Luk 10:17). ¿Bara man, kangrigisan aikuki smalkaia warkka ra waia trai munma kaka?
KAU LAN TAKS
Laki kaiks man nahki sip sma sturi yamni nani aisaia sringka ba pura luaia, bara baha warkka dauki lilia tara briaia.
3. Jehova tâm baikbia
Upla kum kum smalkaia want sa taim ai sringka brisa, apia kaka sip sa lukaia uplika ba saura lukbia.
-
¿Bara man, dîa lan takisma ba wina upla wala ra wiaia sringkam brisma ki? ¿Apia kaka sringkam âpu? ¿Dîa muni?
LILKA ba kaikma, bara naha dukiara aisi banhma.
-
¿Nahki kristian wahma bara tiara nani ba ai sringka tikan?
Aiseya 41:10 aisi kaikma, bara naha dukiara aisi banhma:
-
Sturi yamni nani smalkaia sringkam brisma kaka, ¿dîa muni man puram sunaia sma?
¿Nu kapram ki?
Jehova witniska takan nani ailal ba, pas taim sturi yamni nani smalkaia sringka bri kan. Sergey sturka ba luki kaiks, witin upla bahki baku ai dara wali kan bara upla wal turi aisaia karna muni kan. Sakuna yu kum Baibil stadika ba brin. Witin bila: “Yang sringki bri kapri, sakuna wilin takri dîa lan taki kapri ba upla ra wiaia. Yang lilia takri, kan smalkaia warkka ba kupi bukan bara Baibil smalkanka nani ba yang kupi ra kau takaskan”.
4. Upla ra rispik muns
Sturi yamni nani ba smalkaia lukma taim, dîa aisama baman lukpara, sakuna nahki aisama ba sin luki bas. 2 Timoti 2:24 bara 1 Pita 3:15 aisi kaikma, bara naha dukiara aisi banhma:
-
Naha borska nani aisi baku, ¿man dîa daukaia sip sma Baibil tânka ba upla ra smalkma taim?
-
Ban kra pamalikam uplika bara pânikam kum kum ba man mampara bubia. ¿Man dîa daukaia sip sma? ¿Sakuna dîa lika daukaia apia sma?
-
¿Dîa muni kau pain sa rispik lâka wal upla ra diara makabi walaia, witin nani dîa kasak lukaia ba klir wiaia watlika ra?
5. Sturi yamni nani smalkaia ba lilia lâka wankisa
Sturi yamni nani smalkaia warkka ba Jehova bui Jisas mihta ra mangkan. ¿Baha warkka ba nahki Jisas kaikan? Jan 4:34 aisi kaikma, bara naha dukiara aisi banhma:
-
Plun yamni bara auhni piaia ba wan wîna ra hilp munisa lilia bara raya kaia. ¿Dîa muni Jisas win Gâd kupia lâka daukaia ba plun piaia baku sa? ¿Smalkaia warkka ba sim baku sa?
-
Man dîa lukisma, ¿sturi yamni nani ba upla ra smalkma kaka dîa liliaka nani brima?
Dîa daukaia sip sma
-
Wik bilara asla aidrubanka ra, luki kaiks nahki tnatka ra sip sma upla wal turi aisaia.
-
Baibil stadika maiki uplika ra makabi wals man nahki sip sma wik bilara asla aidrubanka ra stadi tatakra baku aisanka briaia. Aisanka bara marikanka nani brima taim, baha hilp mai munaisa ridi kaia dîa lan takisma ba upla ra smalkaia.
-
Naha bukka ra “Upla kum kum naku lukisa”, apia kaka “Upla kum kum makabi walisa” pîska nani ba yus muns praptis takaia dukiara, bara baku ridi kama piua bani upla dîa makabi wali ba bara Baibil mapara bûi ba dukiara aisaia.
UPLA KUM KUM MAKABI WALISA: “¿Bara, nahki auma? ¿Dîa takisa?”.
-
Baku tnatka ra upla ai lakula maikbia taim, ¿man nahki sip kama baha chanska bri Baibil tânka lan takisma ba aisaia?
DÎA LAN TAKRAM
Sturi yamni nani ba dukiara aisaia ba lilia lâka wankisa, ban kra pas trip daukma taim karna kabia lukisma, sakuna isi kabia man mampara.
Wan kupia krawaia
-
¿Dîa muni sturi yamni nani ba upla ra smalkaia sa ki?
-
¿Man nahki sip sma rispik lâka wal smalkaia?
-
¿Smalkaia warkka daukaia sringkam ba nahki tikaia sip sma?
KAU PLIKI KAIKS
Tnatka isi 4 ba laki kaiks upla ra smalkaia dukiara jw.org ra dimi kaikaia wauhkataya lupia ba wal.
Lan taks daukanka painkira 4 ba nahki hilp mai munbia sturi yamni nani ba smalkaia dukiara.
“¿Man wilin sma Baibil tânka ba wal upla kupia alkaia?” (La Atalaya, septiembre 2020)
Tuktan, wahma bara tiara kabia kra sin, naha Baibil sturka wina kupia karna lâka briaia sip sa upla ra smalkaia dukiara.
Tânka pliki kaiks man nahki sip sma smalkaia pamalikam nani ra kau Jehova witnis takras ba.
“Wan pamali lalukra apia ba kupia alks” (La Atalaya marzo 15, 2014)
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
