OHUDHERA 22

Onande aavi wawaddela athu amodha muthenga dhapama?

ORUMIHE

Ofiyedha vala ohusuza dhithu dhowinjhiva wodhela Bibliya. Mbwenye we podi wubuwela: ‘Athu aatene enofwanelela onona dhithu ndha!’ Ebaribari, athu aatene enohowela onona muthenga ndha! Naari dhigarive ndo, podi wera onowoova wawaddela athu amodha dhithu onahudheriwe. Yohudhera ela, nnere woona makalelo ogonjhiha woova ni okanna ohagalala mwaha othapanya naathu amodha wodhela muthenga dhapama dha mBibliyani.

1. Onande aavi owoga ni amudhawo vamodha naakwawo dhithu onahudheriwe?

Anamahara a Yesu ehiwoga yegi: ‘Kannahiye wawaddela athu amodha dhithu nonilihu ni dhithu niwalihu.’ (Atos 4:20) Aliwa yodhiveliwa vanlubale ebaribari, mwaha wa yeyo yofuna othapanya naathu aatene. Ni weya onoona ndo? Akala siyeyo, opathe ofuru onniwena wi owoge ni amudhawo vamodha naakwawo dhithu onahudheriwe. Ohuddiwale owoga naaliwa mwamakalelo apama. — Omwileri Colossenses 4:6.

Makalelo oobajha

Wathapanyaga ni mmudhaawo, we podi owoga ayi: “Sumana ela gihudhera ethu dhala yapama.”
Omoonihe yolebela ya mBibliyani mukwawo anabulela obe athambwe othuwa-thuwa.
Akwawo oomabasani yukoha makalelo yeddile sumana, wawaddele ethu ohudheriwe omwilerigi Bibliya obe omutugumanoni.
Owoonihe akwawo site jw.org
Omwithanele muthu mmodha woona ohudhera wawo wa Bibliya obe omoonihe makalelo oloba ohudhera wa bibliya mu jw.org.

2. Mwahaya bwaddi sapama olaleya ni mulogo?

Anamahara a Yesu yowalaleya muthenga dhapama athu amodhaya yahanonniwa. Teto yowalaleya mwamakalelo owegeredheya. Yesu waruma anamahara aye ‘abili abili’ wihina yalaleye ‘osogolo waye, luwani yatene.’ (Lucas 10:1) Eyo yahaavaha gari athu owinjhiva wiwa muthenga dhapama. Ohiya eyo, olaleya vamodha naathu amodha wowahagalasa anamahara. (Lucas 10:17) We podi olaleya vamodha ni mulogo?

OHUDHERE DHITHU DHIMODHA

Woone makalelo oogonjhiha woova olaleya ni okanna ohagalala mwaha wapara mabasa ala.

3. Yehova anakale epaddi yawo

Athu amodha enafuna olaleya podi othuwathuwa mwaha mubuwelo waathu amodha obe makalelo athu amodha enawoneliwamo.

We onowoova owaddela athu amodha dhithu onahudheriwe? Mwahaya bwaddi?

Musugwe VIDIYU, mwamala muthapanyedhe nikoho nnaharela:

VIDIYU: Miyo olobela wa Yehova gilobaga oliba murima (4:05)

Azombwe ala Anamona a Yehova egonjhihe aavi woova?

Mmwileri Isaías 41:10, mwamala muthapanyedhe nikoho nnaharela:

Wawovaga olaleya, nlobelo nnukavihere aavi?

Wahinona?

Anamona a Yehova owinjhiva peeno yubuwela wi kinande olaleya muthenga dhapama. Woone yopadduwa ya ddibila Sergey, eelabo yo Rusiya. Oliye oona wi kanna thima ni yomurusa owoga naathu amodha. Mbwenye mohulegela obajha omuhudhera Bibliya. Onosoriha egi: “Naarive goovaga, miyo obajha wawaddela athu amodha dhithu gahudherimi. Motikiniha, othapanya naathu amodha dhithu gahudherimi wodhela Bibliya osaddula mubuwelo waga. Teto, olibiha dhithu gahudherimi.”

4. Owoge mwamakalelo apama

Wawaddelaga muthenga dhapama athu amodha, ohubuwele baahi dhithu onahoweliwe owoga, mbwenye makaleloya owoga. Mmwileri 2 Timóteo 2:24 ni 1 Pedro 3:15, mwamala muthapanyedhe makoho enaharela:

Wawaddelaga amodha muselu dha mBibliyani, onaaparihedhe aavi mabasa dhinawoga dholebela ndha?
Podi wera amudhawo obe akwawo kinarumedha dhithu onawogiwe. Ethu baani oneriwe? Ethu baani ohunafwaneleliwe werana?
Yapama yakale evi: wawerana makoho mwamakalelo apama obe wawaddihedha athuya orumedha dhithu onawogiwe? Mwahaya bwaddi?

5. Othapanya naathu amodha wodhela muthenga dhapama winohagalasa

Yehova ohunvaha Yesu mabasa oolaleya muthenga dhapama. Yesu awonelamo aavi mabasa ala? Mmwileri João 4:34, mwamala muthapanyedhe makoho enaharela:

Yoojha kinanikavihera okalawove baahi, mbwenye enonihagalasa. Mwahaya bwaddi Yesu adhe aladdanihege werana efunelo ya Mulugu (motajhiha, olaleya muthenga dhapama) ni yoojha?
Mwahaya bwaddi ogoonelamo wi mabasa oolaleya muthenga dhapama winohagalasa?

Oxixe

Wadhowa omutugumanoni wa vaari va sumana, opwasedhe dhithu dhinawogiwe wodhela othapanya naathu amodha muthenga dhapama.
Othapanye nnamahudhiha awo wihina olebeliwe eskola ya vaari va sumana. Dhipaddi dhinathomeliwa anamahudhera podi wukavihera okanna kopolo yowoga naathu amodha wodhela dhithu onahudheriwe.
Olabihedhe kwaduru enadha “Athu amodha enawoga yegi” obe “Muthu akoha egi” wihina woone makalelo oowakula makoho mamodha ni ethu onawogiwe athu yahirumedhaga muselu onawogiwe.

MUTHU AKOHA EGI: “Dhinuweddela aavi?”