CILONGESA 22

Vati mu hasa ku Ambulula Muzimbu ua Cili?

ZIKULENU

Omo mu lilongesa vusunga vua mu Mbimbiliya, mu hasa ku singanieka nguenu: ‘Vantu vose va tondeka ku tantekeya ovu vusunga!’ Cili vene, vantu vose va tondeka ku tantekeya vusunga! Vutuhu ngoco, halumo mue ku ivua liova lia ku lekako vakuenu viuma vi mue ku lilongesa. Ngeci mukemuo, tu simutuilenu ha vati mu hasa ku vula liova liaco na ku putuka ku ambulula na ndzolela muzimbu ua cili.

1. Vati mu hasa ku lekako vakuenu viuma vi mue ku lilongesa?

Vandongesi va Yesu va handekele nguavo: “Ka tu ku hasa ku holoka vunoni ku handeka evi vi tua muene nevi vi tua vuile.” (Vilinga 4:20) Va lemene mua kama vusunga vua va longesele Yesu, ngeci va tondele ku lekako vantu vose va va uanene via muzimbu uaco. Vuno nenu mukemuo mu mue ku livua ni? Nga mukemuo, na kasingimiko kose lekenuko vavusoko vuenu na vavusamba viuma vi muli na ku lilongesa.—Tandenu Kolose 4:6.

Vimo vinjila via ku putukilamo ku simutuila na muntu

Nga mu simutuila na umo kavusoko, putukenu cimpande ca mu Mbimbiliya, mu ku handeka nguenu: “Mu simano ino nji na lilongesa umo muzimbu ua cili cikuma.”
Nga kuli umo kavusamba kenu ali na ku vavala ni nomu cikuma mutima, mu tandelenuko cimo cinimbu ca mu Mbimbiliya ce ku kaniamesa.
Nga umo mukuenu ku vipanga ali na ku mi hula vati muli, mu lekenuko vika mua lilongesa mu cilongesa cenu ni vi mu na ka lilongesa ku ciuano.
Lekenuko vavusamba venu via sait.
Lanienuko vakuenu va ku kave cilongesa cenu ni ku valeka mua ku lombela cilongesa ca Mbimbiliya mu saiti.

2. Omo lia vika ku ambuluila hamo na cikungulukilo ca pua cinanga ca seho cikuma?

Vandongesi va Yesu ka va lengelele lika ha ku lekako vandambo via muzimbu ua cili, houe. Ca ku muenako, Yesu “ua va tumine vavali vavali ku lutue [lueni] ku membo ose” linga va ka ambulule. (Luka 10:1) Ku ambulula mu cifua eci, ca hele vantu vukovelelo vua ku ivua muzimbu ua cili. Cikuavo naua, ku ambulula hamo ca vuisile vandongesi ndzolela ya kama. (Luka 10:17) Vuno nenu mu hasa ku lihakela cizango ca ku ambulula hamo na cikungulukilo ni?

TANTEKEYENU VIKUAVO

Tantekeyenu vati mu hasa ku vula liova na ku ivua ndzolela ye ku iza mu cipanga ca ku ambulula muzimbu ua cili.

3. Yehova a ka kala nenu

Vamo va kala na cizango ca ku ambulula, vunoni ve ku lisosomua na cifua ci va ka va muenamo vakuavo, ni ci va ka tambuilamo vantu muzimbu ua cili.

Vuno nenu mue ku ivua liova lia ku lekako vakuenu viuma vi mue ku lilongesa ni? Omo lia vika? Kaha naua nga kati mukemuo, omo lia vika?

Talenu VIDEO, kaha simutuilenu ha cihula ci na hatako.

VIDEO: Nja Vundilile Yehova a nji Kuase ku Simpa (4:05)

Vati ava vamuanetu va vakuendze va vulile vuoma vu vakele na ku ivua?

Tandenu Isaya 41:10, kaha simutuilenu ha cihula eci:

Nga muli na ku ivua liova lia ku ambulula, vati civundilo ci hasa ku mi kuasa?

Mua vi tantekeyele ni?

Vamo Vakaleho va Yehova navo va livuile ngecize na limo litangua liahi va ka hasa ku ambuluilako vakuavo muzimbu ua cili. Ca ku muenako, Sergey ua kele na ku livua vungoco kaha ua puile muekulu. Vunoni mu nima yaco, ua putukile ku lilongesa Mbimbiliya. Kaha ua handekele ngueni: “Vutuhu nja kele na ku ivua liova, vunoni nja putukile ku lekako vakuetu vi nja kele na ku lilongesa. Nja komokele cikuma, muomu ku lingamo ca nji kuasele ku likulahela ange ivene. Cikuavo naua, ku lingamo ca nji kuasele ku tsiliela mua kama mu vilongesa viaco.”

4. Muesenu kasingimiko

Mu ku ambulula muzimbu ua cili, kati mu pue na ku tuala lika mana ku vize vi mu handeka, vunoni na ku cifua ci mu vi handekelamo. Tandenu 2 Timoteo 2:24; na 1 Petulu 3:15, kaha simutuilenu ha vihula evi:

Vati mu hasa ku pangesa mezi a ku vinimbu evi nga mu ambuluila vakuenu muzimbu ua mu Mbimbiliya?
Vamo vavusoko ni vavusamba, va hasa ku viana muzimbu uetu. Vati mu hasa ku linga? Vika ka mua pandele ku linga?
Omo lia vika ca puila ca cili ku pangesa vihula na liano ku tuvakana ku kakateya vantu mu viuma vi va pande ku tsiliela?

5. Ku ambulula ce ku vuisa ndzolela

Yehova ua kundikile kuli Yesu cipanga ca ku ambulula muzimbu ua cili. Vati Yesu ua muene cipanga caco? Tandenu Yoano 4:34, kaha simutuilenu ha vihula evi:

Ku-lia ce ku tu yoyesa na ku tu vuisa ndzolela. Omo lia vika Yesu ua setekesele ku linga cizango ca Njambi, ngeci mua ku ambulula na vikuavo, ku via-ku-lia?
Mu ku mona cenu, ndzolela ika mu hasa ku uana mu ku ambulula muzimbu ua cili?

Vinguli vi hasa ku kuasa

Mu ku hita ca ciuano ca mu kati ka simano, singaniekenu ha vinjila vi mu hasa ku putukilamo ku simutuila na muntu.
Singaniekenu ha ku lisonekesa ku pua ndongesi ua ku ciuano ca mu kati ka simano. Mitamba ya vandongesi, i ka mi kuasa ku simpa linga mu hase ku lekako vakuenu vi mue ku lilongesa.
Pangesenu mitamba “Vamo ve ku Handeka Nguavo” ni “Vamo ve ku Hula Nguavo” ya muno mu livulu, mu ku liviukisila ku kumbulula muntu na katula cimo cihula ni ali na ku mi viana.

VAMO VE KU HULA NGUAVO: “Vati yeni ovo? Tangenu muzimbu muane.”

Vati mu hasa ku pangesa ovu vukovelelo linga mu lekeko muntu vi muli na ku lilongesa mu Mbimbiliya?

VI MU NA LILONGESA

Ku ambulula muzimbu ua cili ce ku vuisa ndzolela. Kaha ku putuka ku lingamo, ka ca kaluuile cikuma.

Mpupulule

Omo lia vika mua pande ku lekako vakuenu muzimbu ua cili?
Vati mu hasa ku lingamo na kasingimiko?
Vati mu hasa ku vula nkala liova li mu hasa ku kala nalio ku tuala ha ku ambulula?

Cino cilongesa nji na ci manusula lia:

Lingenu Evi

Singaniekenu ha muntu u mu tonda ku ka ambuluila, vati mu ka a handeka neni, kaha na ntsimbu i mu ka a handeka neni.

Vikuavo:

Vikuavo vi mu hasa ku linga