TLAMACHTIJLI 22

Ken uelis tikteijlis tlen kichiuas toTajtsin

REPRODUCIR EN

Aman ika yotikasikamat tlen temachtia Biblia, kanaj tiknemilia: “¡Yejuin noneki nochimej makimatikan!”. Niman melauak, nochimej noneki makimatikan tlen kijtoua Biblia. San ika, kanaj achijtsin timomojtia tikimijlis oksekimej tlen yotikasikamat. ¿Tlenon mitspaleuis maka ijkon xmomachili? Ipan yejuin tlamachtijli, titlajtoskej itech yejuin. Noijki tikitaskej ika melak tiyolpakis ijkuak tikimijlis oksekimej tlen yotikasikamat ipan Biblia.

1. ¿Kenijki uelis tikimijlis oksekimej tlen yotikasikamat?

Inomachtijkauan Jesús okijtojkej: “Tejuamej tej, xuelis tikajkauaskej ika tikijtoskej on tlajtlamach yejuan yotikitakej niman yotikakej” (Hechos 4:20). Yejuamej kipatiojkaitayaj tlen yokasikamatkaj niman melak kinekiyaj kimijliskej oksekimej. ¿Tejua noijki tikuelitaskia tikimijlis oksekimej tlen yotikasikamat? Tla kema, xkita kemanon uelis tikinnojnotsas akin imiuan timouika niman akin ken tikimita. San ika, xkilnamiki ika noneki titlajtos ika tetlakaitalistli niman ika yemanki tlajtojli (xkita Colosenses 4:6).

Ken uelis tipeuas titenojnotsas

Ijkuak tinemis iuan yakaj akin ken tikita, uelis tikijlis: “Yejuin semana onikasikamat itlaj tlen melak kualtsin”. Satepan, xkijli tlenon otikasikamat ipan Biblia.
Tla se moamigo kualo noso najmana, xkititi se texto tlen makiyolchikaua.
Tla akin imiuan titekiti mitstlajtoltiaj tlenon otikchiuj yejuin semana, xkimijli tlen otikasikamat ijkuak omitsmachtijkej itech Biblia noso tlen otijkak ipan tlanechikojli.
Xkimititi moamigos página tlen tikpiyaj ipan Internet jw.org.
Xkimijli oksekimej tla kinekij mouan nomachtiskej Biblia ijkuak mitsonmachtiskej noso xkimititi kenijki uelis kalakiskej ipan jw.org niman ijkon kitlajtlaniskej makinmachtikan.

2. ¿Tleka melak kuajli tla titenojnotsa imiuan akin nemij ipan tlanechikojli?

Inomachtijkauan Jesús xsan okinnojnotskej akin kimixmatstoyaj. Jesús “ojomemej okintitlan iyakapan ipan nochi kalpanmej” niman ijkon ompa matenojnotsatij (Lucas 10:1). Pampa ijkon okichiujkej, miyekej okimatkej tlenon kichiuas toTajtsin. Inomachtijkauan Jesús melak oyolpakej ijkuak san sekan otenojnotskej (Lucas 10:17). ¿Noijki tikuelitaskia titenojnotsas imiuan akin nemij ipan tlanechikojli?

OKSEKI XKASIKAMATI

Matikitakan tlenon uelis tikchiuas niman ijkon xtimomojtis ijkuak tikteijlis tlen yotikasikamat ipan Biblia. Noijki matikitakan kenijki melak tiyolpakis tla ijkon tikchiua.

3. Jehová mitspaleuis

Sekimej kinekij kiteijliskej tlen yokasikamatkej ipan Biblia, san ika, kinmojtia tlen oksekimej uelis kinemiliskej.

¿Timomojtia tikimijlis oksekimej tlen yotikasikamat ipan Biblia? ¿Tleka?

Xkitakan VIDEO niman xtlajtokan itech yejuin:

VIDEO: Oniktlajtlanili Jehová manechpaleui (4:05)

¿Tlenon okinpaleui yejuin telpokamej maka melak manomojtikan?

Xkitakan Isaías 41:10 niman xtlajtokan itech yejuin:

Tla timomojtia tikteijlis tlen yotikasikamat ipan Biblia, ¿tleka melak kuajli tla tiknotsa toTajtsin?

¿Tikmatiya yejuin?

Miyekej iteixpantijkauan Jehová kijtouaj ika, ijkuak opeujkej nomachtiaj Biblia, kinemiliayaj ika xkeman ueliskiaj tenojnotsaskej itech Biblia. Yejon tlen kinemiliaya se tlakatl akin itoka Sergey. Yejua melak nomojtiaya tlajtos imiuan oksekimej niman melak najmanaya. San ika, ijkuak opeuj nomachtia Biblia, yejua onoyolchikauj tenojnotsas. Yejua kijtoua: “Maski melak ninomojtiaya, oninoyolchikauj nikimijlis oksekimej tlen nikasikamatstiaya. Yejon onechpaleui maka melak maninajmana niman kuajli manikneltoka tlen kijtoua Biblia”.

4. Noneki titetlakaitas

Ijkuak yakaj tikijlis tlen yotikasikamat ipan Biblia, maka san xnemili tlenon tikijlis, noijki xnemili kenijki tikijlis. Xkitakan 2 Timoteo 2:24 niman 1 Pedro 3:15, 16, niman xtlajtokan itech yejuin:

Ijkon ken kijtouaj yejuin textos, ¿tlenon uelis tikchiuas ijkuak tikinnojnotsas oksekimej itech Biblia?
Tla sekimej akin imiuan timouika noso akin ken tikimita xkuelkakij tlen tikimijlia, ¿tlenon uelis tikchiuas? ¿Niman tlenon xnoneki tikchiuas?
Tla yakaj xkuelkaki tlen tikijliaj, ¿tlenon kinamiki matikchiuakan: tikchiualtiskej makineltoka tlen tejuamej tikneltokaj, noso tiktlajtoltiskej tleka ijkon kijtoua?

5. Melak tiyolpakis tla tikteijlia tlen toTajtsin kichiuas

Jehová okimakak Jesús se kualtsin tekitl: nonekiya kimijlis oksekimej tlen kualtsin nochiuas ika tlayekapan. ¿Kuelitaya Jesús kichiuas yejon tekitl? Xkitakan Juan 4:34 (TNM), niman xtlajtokan itech yejuin:

Ijkuak titlakuaj, tikojtitokej niman tiyolpakij. ¿Tleka okijto Jesús ika ijkuak tikchiuaj tlen kineki Jehová kentla titlakuaskiaj?
¿Tlenon panos tla tejua noijki titenojnotsa ijkon ken Jesús?

Tlen uelis mitspaleuis

Ijkuak tias tlanechikojli, kuajli xkita kenijki techititiaj matipeuakan matitenojnotsakan.
Ipan totlanechikoluan, sekimej panouaj tlayekapan niman ijkon techititiskej kenijki titenojnotsaskej. Xtlajtolti akin mitsmachtia tlenon uelis tikchiuas niman ijkon noijki uelis tipanos tlayekapan. Yejon mitspaleuis xkimijli oksekimej tlen yotikasikamat ipan Biblia.
Ijkuak mitsmachtiskej, kuajli xkimita secciones “Sekimej kijtouaj” niman “Sekimej ueliskia kijtoskej”. Yejon mitspaleuis kuajli xtlanankili ijkuak yakaj itlaj mitstlajtoltis.

SEKIMEJ UELISKIA KIJTOSKEJ: “¿Yotiuajla? Youejkauj ika xok nimitsita”.