CHILAYIJO 22

Tingapupula Chini Indebo Imbuya Kunabamwe?

LIJA

Pawunofunda ichokomende imomuBhayibhili unokwanisa kuyeya kuti, ‘Unhu wose unokwelela kuwha mawi yaya!’ Ichokomende unhu wose unokwelela kuwha mawi yaya! Koga unokwanisa kuba nolutyo kuti ubuje bamwe zwawafunda. Ngatibone kuti ungata chini kuti undililembeli ubuja bamwe nozwendebo imbuya usinotya.

1. Ungata chini kuti ubuje bamwe bawunoziba nozwawafunda?

Batobeli baJesu bakati: “Isu atitotubula kuleka kuleba zwatakabona nozwatakawha.” (Mishingo 4:20) Bakabekoshesa ichokomende zwokuti bakabeda kubuja unhu wose wabakabeshangana naye. Unowha alo na? Kana zukadalo shaka zubaka zokubuja makamu nabakwayina zwawafunda nenzila yokulemekeja.—Balani BaKolose 4:6.

Hozu zwawungate

Pawunolebeleka namakamu awo unokwanisa kutanga nokuti: “Pana imwe nyaya yakandiswika pamoyo pandakabefunda inviki yeyi.”
Balila unkwayina uwo umulwala kana kuti uloshushikana ivesi inonkutayija.
Ungobhuzwa nabawunoshinga nabo kuti yakabeli chini iviki yeyi unokwanisa kubabuja zwawakafunda pamishangano yegubungano kana kuti zwawakanakilwa nazo ufunda iBhayibhili.
Tondeja bakwayina babo ijw.org
Koka bamwe pawuchabefunda iBhayibhili kana kubatondeja kuti bangabiga chini chikumbilo chabo chokufunda pejw.org.

2. Neni ukwelela kuba nechinangwa chokupupula nabamwe mugubungano?

Batobeli baJesu abajakabepupula indebo imbuya kubanhu babanoziba chete. Jesu “wakabatumila beli babili babili, kumbeli kukwe kumisha yose” kunopupula. (Luka 10:1) Kupupula zulolongeka zwakapa banhu banji chibaka chokuwha indebo imbuya. Kupupula pamwempela kwakababuzila lushanto lukulwana. (Luka 10:17) Ungada na nawi kupupula nabamwe bamomugubungano?

FUNDA ZUNJI

Bona kuti ungakoma chini lutyo akale ungawana lushanto lunowanika mukupupula indebo imbuya.

3. Jehova uchakubhancha

Bamwe bangabeda zwabo kupupula koga banotya kuti banhu bachatini akale bachatambula chini mawhi abo.

Kunokutyisa na kubuja bamwe nozwawakafunda? Neni udalo?

Yebani iVIDIYO, akale kwejisani nombuzo unotobela.

IVIDIYO: Ngacela UJehova Anginike Isibindi (4:05)

Bachinokubuka yaba ini zwakababhancha kuti bekome lutyo?

Balani Izaya 41:10, akale kwejisani nombuzo yoyu:

Unamato unokubhancha chini kana utya kupupula?

Wabezuziba na

Bamwe babaSumikiji baJehova bakabetya kubuja bamwe indebo imbuya. Sergey wakabezulungila pasi akale zokulebeleka zwakabonshupa. Koga wakofunda iBhayibhili. Unoti: “Kojoba ndakabetya ndakatanga kubuja bamwe zwandakabefunda. Zwakandichenamisa ndizokuti pandakatanga kubuja bamwe nozweBhayibhili kuzulingila pasi kwakatanga kupela. Akale zwakasimisa kudimbwa kwangu.”

4. Lemekeja bamwe

Pawuchabebuja bamwe indebo imbuya awutokwelela kungoyeya zwawuchalebeleka chete koga kuti uchazulebelaka chini. Balani 2 Timoti 2:24 na 1 Pita 3:15, akale kwejisani nemibhuzo yeyi:

Ungawashingisa chini mavesi yaya pawuchabebuja bamwe nozweBhayibhili?
Bamwe bomumhuli nabakwayina bangabe besinowilillana nawi. Uchata chini? Ini zwawusinokwelela kuta?
Neni zulizubuya kushingisa mibhuzo panakumanikija banhu kuti bevume zwawumubabuja?

5. Kubuja bamwe indebo imbuya kunobuza lushanto

Jehova wakabhatisa Jesu unshingo wokupupula indebo imbuya. Jesu wakabewubona chini unshingo yoyu? Balani Johani 4:34, akale kwejisani nemibhuzo yeyi:

Kulya chikafu chibhodo kunota kuti tilalame akale tishantilwe. Neni Jesu akakwejanisa kulya nokuta kuda kwaMwali kunoshanganisila unshingo wokupupula?
Lushantoni lwatinowana pakupupula indebo imbuya?

Zumwe zungakubhancha

Pamishangano yopakati peviki funda inzila yawungatange kulebeleka nayo nabanhu.
Lebeleka nonhu unokulayija kana uda kuta inyaya inotiwa pamishangano yopakati peviki. Inyaya yeji jichakubhancha kuti ukwanise kubuja bamwe nozwawuchabefunda.
Shingisa chikamu chinowi “Bamwe Banoti” kana kuti “Umwe Angabhuza Kuti” chimomubhuku yeli ufundile kushandula mibhuzo nozumwe zunowajolebelekwa nabanhu banji.

UMWE ANGABHUZA KUTI: “Umuta nozupi mazhubano?”