PFUNZIRO 22
Kodi Mungauze Tani Winango Mafala Yabwino?
Pomwe imwepo mukupfunza cadidi ca m’Bibliya, pinango mungakumbuke kuti, ‘Winango an’funika kudziwambo bzimwebzi!’ N’cadidi, wanthu akufunikiradi kudziwa cadidi ca m’Bibliya! Tsono, pinango mungabve mantha kuuza winango bzomwe mukupfunza. Tsapano bwerani ticezerane momwe mungamalisire manthayo muciyamba kuuza winango mafala yabwino yakucokera m’Bibliya mwakukondwa.
1. Kodi mungawauze tani wanthu omwe mumbawadziwa bzinthu bzomwe mukupfunza?
Anyakupfunza wa Jezu adati: “Tingaleke lini kulewalewa bzinthu bzomwe tidawona na kubva.” (Mabasa 4:20) Iwo akhafuna kwene-kwene cadidi mwakuti akhafuna kuuzambo winango bza cadidico. Kodi imwepo mumbafunambo kucita bzimwebzo? Penu mun’ti inde, nyang’anani mipata kuti muuze adzinza na axamwali wanu bzomwe mukupfunzabzo. — Werengani Akolose 4:6.
Onani bzomwe mungacite
-
Pomwe mukuceza na adzinza wanu, mungayambe kuwafotokozera bza m’Bibliya mwakulewa kuti: “Ndapfunza cinthu cinango cakudekeza kwene-kwene m’dzinga uno.”
-
Penu muna xamwali wanu omwe akuduwala ayai akucita thupo na cinthu cinango, muwerengereni cinembo cakumulimbikisa.
-
Anzanu wakubasa akakubvunzani momwe mdzinga wanu wafambira, afotokozereni bzomwe mwapfunza pa pfunziro lanu la Bibliya ayai pa mtsonkhano wa gwere.
-
Latizani axamwali wanu webisaite ya jw.org.
-
Cemerani anzanu kuti akhale namwe pa pfunziro lanu la Bibliya, ayai alatizeni momwe angakumbirire pfunziro lawo la Bibliya pa jw.org.
2. Thangwe ranyi mpsakufunika kupalizira pabodzi na gwere?
Anyakupfunza wa Jezu, adacita bzizinji kuposa kundopalizira mafala yabwino kwa wanthu omwe akhawadziwa. Jezu “[adawatumiza] awiri-awiri kuti atsogole ku mizinda yentse na mbuto iri-yentse” kuti akapalizire. (Luka 10:1) Makonzedwe yamweya ya upalizi, yadapereka mpata wakuti wanthu azinji akhale na mwayi wakubva mafala yabwino. Kupalizira pabodzi komwe anyakupfunzawa adacita kudawabweresera cikondweso cikulu kwene-kwene. (Luka 10:17) Kodi imwepo mungafunembo kupalizira na gwere?
FUFUDZANI BZINANGO
Onani momwe mungakundire mantha ndipo khalani wakukondwa thangwe ra kupalizira mafala yabwino.
3. Yahova an’dzakhala namwe
Wanthu winango omwe akufuna kupalizira, ambakhala na mantha thangwe ra kukumbuka bzomwe wanthu angalewe pakulewa bza iwo na momwe wanthuwo angawatawirire.
-
Kodi imwepo mumbacitambo mantha kuuza winango bzomwe mukupfunza? Thangwe ranyi?
Onani VIDIYO, ndipo mukamala cezeranani mbvunzo wakutewerayu.
-
Kodi maswaka ya muvidiyoya yadakwanisa tani kukunda mantha?
Werengani Zaiya 41:10, ndipo mukamala cezeranani mbvunzo wakutewerayu:
-
Kodi mpembo ungakuthandizeni tani mukabva mantha pomwe mukupalizira?
Kodi mukhadziwa?
Mboni za Yahova zizinji zikhakumbuka kuti zingadakwanisa lini kuuza winango mafala yabwino. Mwa ciratizo, Sergey akhabzibva kukhala wapezi-pezi ndipo akhaneseka kulewa-lewa na wanthu. Koma patsogolo pace iye adadzapfunza Bibliya. Iye adati: “Napo ndikhana mantha, ndidayamba kuuza winango bzomwe ndikhapfunza. Tsono ndidadabwa kuwona kuti kuuza winango bza Bibliya kukhandithandiza kuleka kubziwona kukhala munthu wapezi-pezi, ndipo kukhandithandizambo kulimbisa cikhulupiro cangu.”
4. Mbacitani bzinthu mwaulemu
Mukambauza winango mafala yabwino, mbakumbukirani sikuti kokha bzomwe mungalewe, koma mbakumbukiranimbo momwe mungalalewere. Werengani 2 Timotio 2:24 na 1 Pedru 3:15, ndipo mukamala cezeranani mibvunzo ikutewerayi:
-
Kodi mungaphatise tani basa mavesiya pomwe mukuuza winango bza m’Bibliya?
-
Winango wa adzinza wanu ayai axamwali wanu pinango angabverane lini na bzomwe mungawauze. Kodi n’ciyani comwe mun’funika kucita? Ndipo n’ciyani comwe mun’funika lini kucita?
-
Thangwe ranyi mun’funika kucita mibvunzo yomwe ingawathandize kulewa makumbukidwe yawo, m’mbuto mwakuwangingimiza kukhulupira bzomwe mukulewa?
5. Kuuza winango mafala yabwino kumbadekeza
Yahova adapasa Jezu basa lakupalizira mafala yabwino. Kodi Jezuyo akhaliwona tani basa limweri? Werengani Juwau 4:34, ndipo mukamala cezeranani mibvunzo ikutewerayi:
-
Kudya cakudya cabwino kumbatithandiza kukhala na moyo ndipo kumbaticitisa kukhala wakukondwa. Thangwe ranyi Jezu adalewa kuti kucita bzomwe Mulungu ambafuna, kuli ninga cakudya?
-
Kodi mun’dzagumana phindu liponi mukambauza winango mafala yabwino?
Bzomwe Mungacite
-
Pa mitsonkhano ya pakati pa mdzinga, mbakhalani tceru kuti muwone momwe mungayambire kuceza na wanthu mu utumiki.
-
Bvunzani munthu omwe akukupfunzisani Bibliya, kuti akuuzeni bzomwe mungacite kuti mumbacitembo mbali za anyakupfunza pa mitsonkhano ya pakati pa mdzinga. Mbali za anyakupfunza zomwe mungambapasidwe zingakuthandizeni kukhala wakukonzeka kuuza winango bzomwe mukupfunza.
-
Phatisani basa mbali yakuti “Wanthu Winango Ambalewa Kuti” na “Wanthu Winango Ambabvunza Kuti,” zomwe ziri m’bukhu lino kuti muyezere momwe mungatawirire mibvunzo yomwe imbabvunzidwa kawiri-kawiri na wanthu wa m’gawo lanu na momwe mungawatawirire akafuna kugwatiza maceza.
WANTHU WINANGO AMBALEWA KUTI: “Ndimwe uyu, mun’tiuzanyi?”
-
Kodi mungalokotere tani mpata umweyu kuti muuze munthuyo bzomwe mudapfunza pa pfunziro lanu la Bibliya?
KODI MWAPFUNZA CIYANI?
Kuuza winango mafala yabwino kumbabweresa cikondweso ndipo kucita bzimwebzi kulibe kunesa ninga momwe mungakumbukire.
Mibvunzo yakubwerezera
-
Thangwe ranyi mun’funika kuuza winango mafala yabwino?
-
Kodi mungacite tani bzimwebzi mwaulemu?
-
Kodi mungakunde tani mantha yomwe mungakhale nayo pa basa lakupalizira?
ONANI POMWE IBZI
Onani njira zinai zomwe zingakuthandizeni kupalizira mwakusaya kunesa mwakuphatisa basa kartau ya jw.org.
Onani makhalidwe manai yomwe yangakuthandizeni kuuza winango mafala yabwino.
“Kodi Ndimwe Wakukonzeka Kukhala Akhombwe wa Wanthu?” (Ntsanza ya Mulindiri ya Setembro, 2020)
Onani ciratizo ca m’Bibliya comwe cingatithandize kukhala wakukhwimika pakupalizira mafala yabwino, bziribe basa penu ndife mkulu ayai mwana.
Onani momwe mungapalizirire adzinza wanu omwe akanati kupfunza bza Yahova.
“Kodi Tingathandize Tani Abale Wathu Omwe ni Mboni Lini?” (Ntsanza ya Mulindiri ya 15 Março, 2014)
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
