ƐZUKOALƐDEƐ 22
Kɛ Ɔkɛyɛ Na Wɔabɔ Edwɛkpa Ne Nolo Ɛ?
Mekɛ mɔɔ ɛlɛsukoa Baebolo ne anu nɔhalɛ ne la, bie a ɛbanyia adwenle kɛ, ‘Ɔwɔ kɛ awie biala te edwɛkɛ ɛhye!’ Nɔhalɛ nu, ɔwɔ kɛ awie biala te! Noko, bie a ɛzulolɛ baha wɔ kɛ ɛbaha mɔɔ wɔzukoa la bie wɔahile awie mɔ. Maa yɛzuzu kɛzi ɛbali ɛzulolɛ zɔhane anwo gyima na wɔabɔ ɔ bo wɔava anyelielɛ wɔabɔ Baebolo ne anu edwɛkpa ne nolo la anwo.
1. Kɛ ɔkɛyɛ na wɔaha mɔɔ wɔzukoa la bie wɔahile menli mɔɔ ɛze bɛ la ɛ?
Gyisɛse ɛdoavolɛma hanle kɛ: “Yɛnrɛhola yɛnrɛgyakyi ninyɛne mɔɔ yɛnwu ye nee mɔɔ yɛde la anwo edwɛkɛ ɛhanlɛ.” (Gyima ne 4:20) Ɛnee nɔhalɛ ne sonle bolɛ kpalɛ maa bɛ, ɔti ɛnee bɛkulo kɛ awie biala te bie. Asoo kɛ ɛdawɔ noko ɛnwu ye la ɛne? Saa ye zɔhane a, ɛnee kpondɛ ndenle mɔɔ ɛdua zo a ɛbahola wɔavi ɛbulɛ nu wɔaha mɔɔ wɔzukoa la bie wɔahile wɔ mbusuafoɔ nee ɛ gɔnwo mɔ la.—Kenga Kɔlɔsaema 4:6.
Kɛzi ɛbabɔ ɔ bo la
-
Saa ɛ nee ɛ nwo sonla bie ɛlɛdi adwelie a, bɔ Baebolo ne anu edwɛkɛ bie abo zɛhae: “Mezukoa debie mɔɔ yɛ anyelielɛ la wɔ dapɛne ɛhye anu.”
-
Ka ngɛlɛlera bie mɔɔ maa anwosesebɛ la anwo edwɛkɛ kile ɛ gɔnwo mɔɔ ɛnde kpɔkɛ anzɛɛ arɛle ɛbɔ la.
-
Saa wɔ gyima nu amra biza wɔ mɔɔ ɛlɛkɔ zo wɔ dapɛne ne anu a, ka mɔɔ wɔzukoa wɔ Baebolo ne anu anzɛɛ debiezukoalɛ bo la bie kile bɛ.
-
Kile ɛ gɔnwo mɔ jw.org wɛbsaete ne.
-
Maa awie mɔ ɛraboka ɛ nwo bɛzukoa Baebolo ne anzɛɛ kile bɛ kɛzi bɛbiza nwolɛ adenle la wɔ jw.org.
2. Duzu ati a ɔle kpalɛ kɛ ɛ nee asafo ne babɔ nu aha edwɛkɛ ne a?
Gyisɛse ɛdoavolɛma anga edwɛkɛ ne angile menli mɔɔ bɛze bɛ la ala. Gyisɛse “[zoanle] bɛ nwiɔ nwiɔ ɔmaanle bɛlimoale ɔ nyunlu bɛhɔle sua biala azo” kɛ bɛhɔha edwɛkɛ ne. (Luku 10:1) Edwɛkɛhanlɛ gyima ne mɔɔ bɛbɔle nu bɛyɛle la maanle menli dɔɔnwo dele edwɛkpa ne. Edwɛkɛ ne mɔɔ bɛbɔle nu bɛhanle la eza maanle ɛdoavolɛma ne anye liele kpalɛ. (Luku 10:17) Ɛdawɔ noko ɛbava wɔayɛ wɔ bodane kɛ ɛ nee asafo ne babɔ nu aha edwɛkɛ ne ɔ?
SUKOA DƆƆNWO
Sukoa mɔɔ ɛyɛ a ɛzulolɛ ɛnrɛha wɔ amaa ɛ nye alie wɔ edwɛkɛhanlɛ gyima ne anu la.
3. Gyihova baboa wɔ
Bie a menli mɔɔ kulo kɛ bɛka edwɛkɛ ne la bie mɔ sulo kɛ menli banlea bɛ anzɛɛ bɛbaha bɛ nwo edwɛkɛ.
-
Ɛsulo kɛ ɛbaha mɔɔ wɔzukoa la anwo edwɛkɛ ɔ? Duzu ati ɔ?
Ye VIDIO ne, na akee bɛzuzu kpuya ɛhye anwo.
-
Kɛzi Alasevolɛ ɛhye mɔ lile bɛ ɛzulolɛ ne anwo gyima ɛ?
Kenga Ayezaya 41:10, na akee bɛzuzu kpuya ɛhye anwo:
-
Saa ɛsulo kɛ ɛbali daselɛ a, kɛzi asɔneyɛlɛ baboa wɔ ɛ?
Asoo ɛze?
Ɛnee Gyihova Alasevolɛ dɔɔnwo dwenle kɛ bɛnrɛhola bɛnrɛbɔ edwɛkpa ne nolo bɛnrɛhile awie mɔ. Kɛ neazo la, ɛnee Sergey te nganeɛ kɛ nvasoɛ ɛnle ɔ nwo zo yɛɛ ɔyɛ se kɛ ɔ nee awie mɔ badendɛ. Noko ɔzukoale Baebolo ne. Ɔka kɛ: “Ɛnee mesulo ɛdeɛ, noko membɔle ɔ bo menganle mɔɔ melɛsukoa la anwo edwɛkɛ mengilele awie mɔ. Ɔzinle me nwo kɛ Baebolo ne anu edwɛkɛ mɔɔ menganle mengilele menli la akee maanle menyianle anwodozo kpole la. Eza ɔmaanle ninyɛne mɔɔ melɛsukoa la hanle me ahonle kpalɛ.”
4. Da ɛbulɛ ali
Saa ɛlɛbɔ edwɛkpa ne nolo a, mmadwenle mɔɔ ɛbaha la angomekye anwo, dwenle kɛzi ɛbaha ye la noko anwo. Kenga 2 Timote 2:24; yɛɛ 1 Pita 3:15, na akee bɛzuzu kpuya ɛhye mɔ anwo:
-
Saa ɛlɛka Baebolo ne anu edwɛkɛ wɔahile awie mɔ a kɛzi ɛbava tɛkese ɛhye mɔ wɔali gyima ɛ?
-
Bie a wɔ mbusuafoɔ anzɛɛ ɛ gɔnwo mɔ bie nee wɔ ɛnrɛyɛ adwenle. Duzu a ɛbayɛ a? Duzu a ɔnle kɛ ɛyɛ a?
-
Duzu ati a ɔbayɛ kpalɛ kɛ ɛbalua nrɛlɛbɛ adenle zo wɔabiza kpuya tɛla kɛ ɛbaha ye kyengye kɛ bɛlie bɛli ɛ?
5. Edwɛkpa ne nolobɔlɛ maa yɛ nye die
Gyihova maanle Gyisɛse gyima kɛ ɔbɔ edwɛkpa ne nolo. Kɛzi Gyisɛse bule gyima zɔhane ɛ? Kenga Dwɔn 4:34, na akee bɛzuzu kpuya ɛhye mɔ anwo:
-
Yɛdi aleɛ kpalɛ a ɔmaa yɛtɛnla ngoane nu na yɛ nye die. Duzu ati a Gyisɛse vale Nyamenle ɛhulolɛdeɛ ɛyɛlɛ—mɔɔ bie a le edwɛkɛhanlɛ ne la—totole aleɛlilɛ nwo a?
-
Yɛbɔ edwɛkpa ne nolo a ɛnea a anyelielɛ boni a yɛbanyia a?
Nzuzulɛ
-
Bɛlɛyɛ dapɛne avinli debiezukoalɛ ne a, kpondɛ ndenle mɔɔ ɛbahola wɔalua zo wɔabɔ adwelielilɛ bo la.
-
Fa sie ɛ nye zo kɛ ɛbayɛ sukoavo gyimalilɛ ne bie. Sukoavo gyimalilɛ bahola aboa wɔ yeamaa wɔaziezie ɛ nwo kɛ ɛbaha mɔɔ ɛlɛsukoa la bie wɔahile awie mɔ.
-
Fa “Bie Mɔ Ka Kɛ” anzɛɛ “Bie A Awie Babiza Kɛ” foa ne mɔɔ wɔ ɛzukoalɛdeɛ ne mɔ anu la sukoa kɛzi ɛbabua kpuya mɔɔ bɛta bɛbiza nee edwɛkɛ gyɛne biala la.
BIE A AWIE BABIZA KƐ: “Na boni a ɛlɛkɔ zo a?”
-
Kɛzi ɛbalua adenle ɛhye azo wɔaha mɔɔ wɔzukoa ye wɔ Baebolo ne anu la bie wɔahile ahenle ɛ?
EDWƐKƐ TITILI
Yɛbɔ edwɛkpa ne nolo a ɔmaa yɛ nye die yɛɛ bie a ye ɛyɛlɛ ɛnyɛ se kɛ mɔɔ ɛnwu ye la.
Ndinu
-
Duzu ati a ɔwɔ kɛ ɛbɔ edwɛkpa ne nolo a?
-
Kɛ ɔkɛyɛ na wɔalua ɛbulɛ adenle zo wɔayɛ zɔ ɛ?
-
Kɛ ɔkɛyɛ na wɔali edwɛkɛhanlɛ ne anwo ɛzulolɛ biala mɔɔ ɛlɛ la anwo gyima ɛ?
KPONDƐ DƆƆNWO
Nea adenle sikalɛ nna mɔɔ ɛbahola wɔalua zo wɔava jw.org ngitanwolilɛ kaade ne wɔabɔ edwɛkpa ne nolo la.
Sukoa subane nna mɔɔ baboa wɔ yeamaa wɔabɔ edwɛkpa ne nolo la anwo debie.
“Wɔziezie Ɛ Nwo Kɛ Ɛbahye Menli Kɛ Mɔɔ Bɛkye Fɛlɛ La Ɔ?” (Ɛzinzalɛ Arane, September 2020)
Nea kɛzi Baebolo ne anu neazo bie bahola aboa yɛ yeamaa yɛabɔ edwɛkpa ne nolo, saa bɔbɔ yɛle ngakula a.
Nea kɛzi ɛbahola wɔaha Baebolo ne anu edwɛkɛ wɔahile wɔ mbusuafoɔ mɔɔ bɛtɛsukoale Gyihova anwo debie la.
“Maa Nɔhalɛ Ne Ɛha Ɛ Nwo Amra Ahonle” (Ɛzinzalɛ Arane, March 15, 2014)
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
