22 NUENƆ

O Zue Le Yereue Nɛ Pya Dɔɔ̄na Doodoo Wa?

PLAY

Kuma sɔ̄ o gaa nɔ kaka ue Baibol, o dap kɛɛrɛ kɔ, ‘Ebee lee dɛ̄dɛɛ̄ nɛɛ suā nu ama a!’ Bu kaka, a bɔloo kɔ dɛ̄dɛɛ̄ nɛɛ a suā! Kerewo, bɔɔ dap a aa sɔ̄ o gbī ekɔ nu o waa nɔ nɛ pya dɔɔ̄na. Doo i kɔ kɛ̄ o dap be eeba lo bɔɔ sa bɔātɛ̄ enyɔɔnɛ pya dɔɔ̄na ponia le yereue Baibol doo.

1. Mɛ sīdee na o dap nyɔɔnɛ pya o suāloo ponia nu o enɔā aābu Baibol a?

Pya a wee nyɔɔnɛ dumɛ Jizɔs bee kɔ: “Ii dap aaloo ekɔ nu i bee muɛ sa dā.” (Doonu 4:20) Kaka ue bee wa nia mmɛ kɛ̄ ba gbī ekɔ nɛ dɛ̄dɛɛ̄ nɛɛ. Tɔɔ̄ge loo olo doo wo ni? Lo a le wo, su ɛrɛgeba dee a a ekpaā nɛ kɔā nu o enɔā nɛ pya o butɔ le pya o gbo, mɛ doo wo bu enwadɛɛ̄.—Buū Pya Kɔlɔsi 4:6.

Pio sīdee o dap bɔātɛ̄

Nuūnabee ziī ekobee ue a le bu Baibol sɔ̄ o gaa nyɔɔnɛ pya o manamana kɔnia ue tɛ̄maloo ekɔ: “Ɛrɛ nu m nɔ a mɛ nia gbɛnɛ a bu kaɛ ama.”
Nyɔɔnɛ o gbo loo dumɛ ale a ɛrɛ nu aa ye taɛ̄ŋɛ kɔnia ue eyere ye mɛm loo aābu Baibol.
Lo o koo kɛ̄tam bip a kɛ̄ loo a le doo, o dap ye yɔ kɔnia ziī nu a a nia o bee nɔ aābu Baibol ale bie enɔānu lo kaɛ.
Su i dɔ intanɛt jw.org tɔgɛ pya o gbo.
Kue pya dɔɔ̄na kɔ ba a nyɔɔnɛ a ɛŋɛtɛ̄ kɛ̄ sɔ̄ o waa nɔ Baibol ale o tɔgɛ wa kɛ̄ ba edap bara kɔ alu enyɔɔnɛ wa nɔnu nyɔɔ dɔ intanɛt jw.org doo.

2. Ena anua gbaaloo bɔŋanaloo si uwe zue ue dɔ kaāna biī a?

Pya a wee nyɔɔnɛ dumɛ Jizɔs bee si tam a eenyɔɔ aba zue ue nɛ pya Juu ba suāloo. Jizɔs bee wa “yere kɔ ba a za ye sī, baɛ le baɛ, nyima bu ɛrɛgeba buɛ̄” lo ezue ue. (Luk 10:1) Tam zue ue a bee lu enɔɔ leere ama bee kpaāna dee nɛ gbɛnɛ-edo nɛɛ kɔ ba a dā le yereue. Gbaa zue ue bee doonage kɔ pya a wee nyɔɔnɛ dumɛ Jizɔs a ɛrɛ gbɛnɛ ɛɛbu. (Luk 10:17) Olo dapge su gbaaloo bɔŋanaloo si uwe zue ue nua nu o seeasī ni?

NƆ YERELOO

Naa ɛp pio nu o dap doo lo ebe eeba bɔɔ sa ɛrɛ ɛɛbu a aaloo kɔ le yereue nɛ pya dɔɔ̄na.

3. Jɛhova ele a loo

Bɔɔ dap aa pio nɛɛ a gbī ezue ue tua sɔ̄ nyɔɔ kɛ̄ pya nɛɛ e’ɛp wa doo ale nyɔɔ dogo ba edoo wa loo.

Bɔɔ aa a lo ekɔ pio nu o enɔā nɛ pya dɔɔ̄na ni? E na anua a?

Bira lo VIDIO, lɛɛ o agara ebip a nyɔɔnɛ ama.

VIDIO: M Bee Yere Kara Kɔ Jɛhova A Nɛ Mɛ E’agaloo (4:05)

E na taa Pya Ekeebee ba le zege ama bee doo lo ebe eeba wa bɔɔ a?

Buū Aisaia 41:10, lɛɛ o agara ebip ama:

Sɔ̄ bɔɔ a aa lo ezue ue, mɛ sīdee na kara eyerebah a nɛ a?

O suāge ni?

Bee tɔɔ̄loo gbɛnɛ-edo Pya Ekeebee Jɛhova kɔ ba naale edabe zue le yereue nɛ pya dɔɔ̄na tua sɔ̄. Bu edoba, bee tɔɔ̄loo Sergey kɔ a naa lee dɛɛ̄ lɔgɔ nu, nyɔɔwo a bee ye agabah ekɔ ue nɛ pya nɛɛ. Mɛ a bee nɔ Baibol sɔ̄ pio sɔ̄ etɛ̄na. A bee kɔ: “Kaɛlɛɛ na bɔɔ, m bee bɔātɛ̄ ekɔ nu akiiloo nu m gaa nɔ nɛ pya dɔɔ̄na. Bee mɛ lu nyɛŋia loo kɛ̄ m ɛrɛ e’agaloo aāloo kɔ yereue Baibol nɛ pya dɔɔ̄na doo. A bee yerenage mɛm loo na yira a lege aā a.”

4. Nwadɛɛ̄ pya nɛɛ

Sɔ̄ o waa zue le yereue, o aa kɛɛrɛ aba nu o kɔ, mɛ kɛɛrɛnage kɛ̄ o kɔ doo. Buū 2 Timɔti 2:24 le 1 Pita 3:15, lɛɛ o agara pya ebip ama:

O dap su pya ue ama daānu sɔ̄ o gaa kɔ ue a le bu Baibol nɛ pya dɔɔ̄na doodoo wa?
Pio pya o butɔ le pya o gbo naale edap a nyɔɔnɛ yiga nu o gaa kɔ. Lo a sira doo wo, ena o doo a? Ena oo le edoo a?
Ena anua su kari bima ebip elee ee su bah ekpo wa aā kɔ ba a yiga nu o kɔ a?

5. Zuzue le yereue nua ɛɛbu

Jɛhova bee su tam zue le yereue yerebah Jizɔs. Jizɔs bee ɛp lo tam doodoo wa? Buū Jɔn 4:34, lɛɛ o agara pya ebip ama:

De le nuede wee doo kɔ i tɔɔ̄ bu nwanaloo sa i nɛ ɛɛbu. Ena anua Jizɔs su dodoo nu Bari gbī le zue le yereue dooreloo de nuede a?
Mɛ dua ɛɛbu na o kɛɛrɛ kɔ i dap ɛrɛ aāloo zue le yereue nɛ pya dɔɔ̄na ani?

Pio Nu Edoo

Sɔ̄ enɔānu taɛyɛɛ kaɛ aa kiisī, yere nukuādɛɛ̄ loo pya sīdee o dap yɔ pya nɛɛ kɔnia ue.
Gbī kɛ̄ edoo yere bee loo tɔkpa bu enɔānu taɛyɛɛ kaɛ. Nu edoo a le nɛ pya a le lo tɔkpa dap doo kɔ a waɛ a loo ekɔ nu o waa nɔ nɛ pya dɔɔ̄na.
Su kɛ̄ alu ekue “Pio Nɛɛ Kɔ” ale “Ziī Nɛɛ Dap Bip Kɔ” a le bu kpa ama nɔā kɛ̄ o dap agara pio ebip le ue pya nɛɛ kɔ lo ekpaɛ̄ a doo.

ZIĪ NƐƐ DAP BIP KƆ: “E loo a a?”