سبق نمبر 22
تُسی دُوجیاں نُوں خوشخبری کیویں سنا سکدے او؟
جیویں جیویں تُسی بائبل دِیاں سچائیاں سکھدے او تواڈا دل کردا اے کہ زیادہ توں زیادہ لوکاں نُوں ایہناں سچائیاں بارے پتہ چلے۔ ایہہ بوہت ای ضروری اے کہ سارے لوک ایہناں سچائیاں بارے جانن۔ پر شاید توانوں دُوجیاں نُوں ایہہ سچائیاں دَسدے ہوئیاں تھوڑی جہی گھبراہٹ یاں ڈر محسوس ہوئے۔ ایس سبق چ اَسی ویکھاں گے کہ اَسی اپنی گھبراہٹ تے قابو کیویں پا سکنے آں تے خوشی نال لوکاں نُوں خدا دی بادشاہی دی خوشخبری کیویں سنا سکنے آں۔
1. تُسی اپنے جانن والیاں نُوں بائبل دِیاں سچائیاں بارے کیویں دَس سکدے او؟
یسوع مسیح دے شاگرداں نے کہیا کہ اَسی اوہناں گلاں بارے چپ نئیں رہ سکدے جیہڑیاں اَسی ویکھیاں تے سُنیاں نیں۔ (اعمال 4:20) اوہ اوہناں سچائیاں دی بڑی قدر کردے سن جیہڑیاں اوہناں نے یسوع کولوں سکھیاں سن۔ ایس لئی اوہ زیادہ توں زیادہ لوکاں نُوں ایہناں بارے دَسنا چاہندے سن۔ جے تُسی وی اوہناں وانگوں محسوس کردے او تے فیر اپنے گھر دے جیاں تے دوستاں نُوں پاک کلام دِیاں سچائیاں بارے دَسن دی پوری کوشش کرو، پر بڑے پیار تے عزت نال۔—کُلسّیوں 4:6 نُوں پڑھو۔
خوشخبری سنان دے کجھ طریقے
-
اپنے گھر والیاں نال بائبل دے کسے موضوع تے گل شروع کرن لئی تُسی کہہ سکدے او ”ایس ہفتے میں اِک بڑی دلچسپ گل سکھی اے۔“
-
جے تواڈا کوئی دوست یاں رشتےدار پریشان یاں بیمار اے تے اوہنوں حوصلہ دین لئی بائبل چوں کوئی ایت پڑھو۔
-
جدوں کم دی جگہ تے کوئی بندہ تواڈا حال چال پچھدا اے تے اوہنوں دَسو کہ تُسی عبادت یاں بائبل کورس دے دوران کیہہ کجھ سکھیا۔
-
اپنے دوستاں نُوں ساڈی ویبسائٹ jw.org وکھاؤ۔
-
کسے دوست یاں رشتےدار نُوں اپنے بائبل کورس چ بیٹھن دی دعوت دَوو یاں اوہنوں ایہہ دَسو کہ اوہ ساڈی ویب سائٹ jw.org تے بائبل کورس کرن دی درخاست کیویں کر سکدا اے۔
2. توانوں کلیسیا نال مِل کے مُنادی کیوں کرنی چاہی دی اے؟
یسوع دے شاگرداں نے صرف اوہناں لوکاں نُوں ای خوشخبری نئیں سنائی سی جنہاں نُوں اوہ جان دے سن۔ یسوع مسیح نے دو دو کر کے اپنے شاگرداں نُوں اوہناں شہراں تے تھانواں تے مُنادی کرن لئی گھلیا جِتھے اوہنے آپ جانا سی۔ (لُوقا 10:1) اِنج خدا دی بادشاہی دی خوشخبری زیادہ توں زیادہ لوکاں تک پونچی۔ ایہدے علاوہ اِک دُوجے نال مِل کے کم کرن دی وجہ توں شاگرداں نُوں بڑی خوشی وی ملی۔ (لُوقا 10:17) کیہہ تُسی وی کلیسیا دے بھین بھراواں نال مِل کے مُنادی کرن دا منصوبہ بنا سکدے او؟
ہور سوچوچار لئی
سکھو کہ تُسی اپنی گھبراہٹ تے قابو کیویں پا سکدے او تے بادشاہی دی خوشخبری سنان توں خوشی کیویں حاصل کر سکدے او۔
3. یہوواہ تواڈی مدد کرے گا
جیہڑے لوک مُنادی کرنا چاہندے نیں اوہناں نُوں اکثر ایس گل دا ڈر ہوندا اے کہ لوک اوہناں بارے کیہہ کہن گے یاں فیر اوہناں نُوں کیہو جیہا جواب دین گے۔
-
کیہہ دُوجیاں نال بائبل وچوں گل کردے ویلے توانوں وی گھبراہٹ محسوس ہوندی اے؟ جے ہاں تے کیوں؟ جے نئیں تے کیوں نئیں؟
ویڈیو چلاؤ تے فیر ایس سوال تے گل بات کرو:
-
ایہناں نوجواناں نے اپنے ڈر تے قابو کیویں پایا؟
یسعیاہ 41:10 نُوں پڑھو تے فیر ایس سوال تے گل بات کرو:
-
جے توانوں خوشخبری سنان توں ڈر لگے تے توانوں دُعا کیوں کرنی چاہی دی اے؟
کیہہ توانوں پتہ اے؟
بوہت سارے یہوواہ دے گواہ سوچدے سن کہ اوہ کدی وی خوشخبری نئیں سنا سکدے۔ ذرا سرگے دی مثال تے غور کرو۔ اوہنوں دُوجیاں نال گل کرنا بڑا اوکھا لگدا سی۔ پر فیر اوہنے بائبل کورس کرنا شروع کیتا۔ اوہنے دَسیا کہ ”میں گھبراہٹ دے باوجود دُوجے لوکاں نُوں اوہ گلاں دَسنا شروع کیتا جیہڑیاں میں بائبل وچوں سکھ رہیا ساں۔ مینوں ایہہ ویکھ کے بڑی حیرانی ہوئی کہ دُوجیاں نُوں بائبل دِیاں سچائیاں بارے دَسن دی وجہ توں میرے اندر گل بات کرن دا اعتماد پیدا ہو گیا۔ ایہدے نال نال جو گلاں میں سکھ رہیا ساں اوہناں تے میرا ایمان ہور وی پکا ہویا۔“
4. احترام نال گل کرو
دُوجیاں نُوں خوشخبری سناندے ویلے صرف ایہہ ای نہ سوچو کہ تُسی کیہہ گل کرو گے سگوں ایہہ وی سوچو کہ تُسی کیویں گل کرو گے۔ 2-تیمُتھیُس 2:24 تے 1-پطرس 3:15 نُوں پڑھو تے فیر ایہناں سوالاں تے گل بات کرو:
-
دُوجیاں نال بائبل چوں گل کر دے ویلے اَسی ایہناں ایتاں چ دِتے گئے اصولاں تے کیویں عمل کر سکنے آں؟
-
جے تواڈے کجھ دوستاں تے رشتےداراں نُوں تواڈی گل چنگی نہ لگے تے فیر تُسی کیہہ کر سکدے او؟ تے توانوں کیہہ نئیں کرنا چاہی دا؟
-
دُوجیاں نُوں اپنی گل منن تے مجبور کرن دی بجائے ایہہ بہتر کیوں ہوئے گا کہ اَسی اوہناں کولوں سمجھداری نال سوال پچھئے؟
5. دُوجیاں نُوں خوشخبری سنان نال خوشی مِلدی اے
یہوواہ خدا نے یسوع مسیح نُوں خوشخبری سنان دا کم دِتا۔ یسوع مسیح لئی ایہہ کم کِنّاں ضروری سی؟ یوحنا 4:34 نُوں پڑھو تے فیر ایہناں سوالاں تے گل بات کرو:
-
کھانا کھان نال نہ صرف اَسی زندہ رہنے آں سگوں سانوں خوشی وی مِلدی اے۔ یسوع مسیح دی نظراں چ خدا دی مرضی تے چلنا یعنی دُوجیاں نُوں خوشخبری سنانا کھانا کھان وانگوں کیوں سی؟
-
دُوجے لوکاں نُوں خوشخبری سنان نال توانوں کیہڑیاں خوشیاں مِل سکدیاں نیں؟
مشورے
-
مسیحی زندگی تے خدمت والی عبادت چ ایہو جہے طریقے سکھو جنہاں دے ذریعے تُسی دُوجیاں نال گل بات شروع کر سکدے او۔
-
مسیحی زندگی تے خدمت والی عبادت چ طالبِعلم دے طور تے اپنا ناں لکھواؤ۔ ایس عبادت چ مِلن والے حصے تواڈی مدد کرن گے کہ تُسی دُوجیاں نُوں اوہ گلاں ہور چنگی طرحاں دَس سکو جیہڑیاں تُسی سکھ رہے او۔
-
ایس کتاب دے حصے ”کجھ لوکاں دی رائے“ یاں ”شاید کوئی پچھے“ نُوں استمال کردے ہوئیاں مشق کرو کہ تُسی اوہناں اعتراضاں یاں سوالاں دا جواب کیویں دَوو گے جیہڑے لوک اکثر پچھدے نیں۔
شاید کوئی پچھے: ”ہور سنا یار، اَج کل کیہہ ہو رہیا اے؟“
-
جیہڑا بندہ تواڈے کولوں ایہہ سوال پچھدا اے تُسی اوہنوں ایہہ کیویں دَسو گے کہ تُسی بائبل کورس چ کیہہ کجھ سکھ رہے او؟
خلاصہ
دُوجیاں نُوں خوشخبری سنان نال خوشی مِلدی اے تے ایہہ کم ایناں وی اوکھا نئیں جِنّاں شاید تُسی سوچ رہے او۔
دہرائی
-
سانوں دُوجے لوکاں نُوں خوشخبری کیوں سنانی چاہی دی اے؟
-
تُسی دُوجیاں نال بائبل چوں گل کردے ویلے عزت کیویں وکھا سکدے او؟
-
مُنادی کردے ویلے تُسی اپنی گھبراہٹ تے قابو کیویں پا سکدے او؟
ہور جانن لئی
ایس ویڈیو چ ویکھو کہ تُسی کیہڑے چار طریقیاں نال رابطے دا کارڈ استمال کر کے گواہی دے سکدے او۔
ایس مضمون چ ایہو جہیاں چار خوبیاں بارے سکھو جیہڑیاں دُوجیاں نُوں خوشخبری سنان چ تواڈی مدد کرن گیاں۔
کیا آپ انسانوں کو جمع کرنے کے لیے تیار ہیں؟ (مینارِنگہبانی، ستمبر 2020)
ایس ویڈیو چ ویکھو کہ چھوٹے بچے وی بائبل چ دِتی اِک مثال توں حوصلہ پا کے خوشخبری سنان دے قابل کیویں بن سکدے نیں۔
ایس مضمون چ سکھو کہ تُسی اپنے گھر دے اوہناں جیاں نال گل کیویں کر سکدے او جیہڑے یہوواہ بارے نئیں جان دے۔
اُن رشتےداروں کے دل تک پہنچیں جو سچائی میں نہیں (مینارِنگہبانی، 15 مارچ 2014)