LECCIÓN 22
¿Chajariik ne intobʼinik aweh reh ruqʼorariik i kʼuhbʼaal?
Noq inanabʼeej iruqʼor i Santo Laj Huuj mareh inawaaj aqʼorom keh chuʼnchel i kʼachareel i kʼahchiʼ atijem. Eh atoobʼ mi jeʼ reʼ, ruum chi chuʼnchel taqeh kʼachareel ko ruman chi ne inkinabʼeej. Xa reʼ laʼ, mareh ne inchalik ayoʼjiik qʼorik chi riij i kʼahchiʼ atijem. Qil chajariik ne tirutobʼeej reh chi maʼ ne ta tiyoʼjik qʼorik chi riij i kʼahchiʼ atijem pan Santo Laj Huuj eh nikʼwach ne inasuqkileej i qʼoroj kʼuhbʼal.
1. ¿Nikʼwach ne tiqʼorik kuukʼ afamilia chi riij i kʼahchiʼ atijem?
Reʼ taqeh rajtahqaneel i Jesús jeʼ wilih xkiqʼor: «Reʼ hoj maʼ jaruuj chik neenqakanaaʼ ruqʼorariik ribʼiral taqe i qilom, taqe i qibʼiram» (Hechos 4:20). Xti looqʼ naq chi keh i korik wilik pan ruqʼorbʼal i Dios eh ruum aj reʼ xa ajwach naq eh inkaaj kiqʼorom. ¿Jeʼ na reʼ inawikʼraaj i hat? Wilaʼ jeʼ reʼ, chasikʼ ruwiiʼ nikʼwach ne tiqʼorik pan chaqʼlamiil ruukʼ taqeh afamilia taqeh awamigo chi riij i kʼahchiʼ atijem (chawil Colosenses 4:6).
Ehtalil reh chi ne natoqʼaaʼ qʼorik
-
Noq ne natoqʼaaʼ qʼorik ruukʼ jenoʼ afamilia chi riij i Santo Laj Huuj jeʼ wilih chaqʼor «Reʼ xamaano wilih xnutijej jenaj holohik naʼojbʼal pan Santo Laj Huuj».
-
Noq yowaabʼ jenoʼ awamigo chakʼuhtaaj reh jenoʼ texto reʼ ne ruyeew rukowiil rukʼux.
-
Noq reʼ taqeh awuchʼihiil chi kamanik ne inkipahqaaj aweh chajariik xabʼan pan rukuxiik i xamaano, chaqʼor keh jenoʼ naʼojbʼal xatijej pan atijinik chi riij i Santo Laj Huuj oon reʼ i xatijej pan jenoʼ moloj iibʼ reh i molaabʼ.
-
Chakʼuhtaaj keh taqeh awamigo i qayeʼaabʼ pan internet jw.org.
-
Chaqʼor reh jenoʼ chi ne tiruchʼihleej pan atijinik chi riij i Santo Laj Huuj oon chakʼuhtaaj reh nikʼwach ne irupahqaaj jenoʼ rutijiniik chi riij i Santo Laj Huuj pan jw.org.
2. ¿Chaaj woʼ reet ko ruman chi ne inaqʼor i kʼuhbʼaal ruukʼ amolaabʼ?
Reʼ taqeh rajtahqaneel i Jesús xa maʼ reʼ ta keh i kifamilia xkiqʼor i kʼuhbʼaal. Reʼ Jesús «xutaqʼaaj taqe chi kaʼkabʼiil, reh chi peet xiooj chuwach i reh pantaq tinamit» reh ruqʼorariik i kʼuhbʼaal ar (Lucas 10:1). Ruum chi tuslik wach i qʼoroj kʼuhbʼaal inbʼaan, kʼih taqeh kʼachareel inkibʼiraj chi riij i runimaal rajaawriik i Dios. Eh reʼ taqeh rajtahqaneel i Jesús suq naq kikʼux chi qʼoroj kʼuhbʼaal pan kʼihaal (Lucas 10:17). ¿Eh chajariik inaqʼor chi ne natoqʼaaʼ i qʼoroj kʼuhbʼaal ruchʼihiil taqeh hermano?
CHATZʼIR RIIJ I KʼAHCHIʼ ATIJEM
Naqilom chajariik ne nabʼan reh chi maʼ ne ta inchalik ayoʼjiik eh chi suq akʼux chi qʼoroj kʼuhbʼaal.
3. Reʼ Jehová ne inwihʼik awuukʼ
Juʼjun taqeh kʼachareel reʼ inkaaj kiqʼorom i kʼuhbʼaal inchalik kiyoʼjiik chi riij i ne inkiqʼor taqeh kʼachareel oon chi riij nikʼwach rukʼulariik i kʼuhbʼaal ne inkibʼan.
-
Noq reʼ hat inawaaj qʼorik chi riij i kʼahchiʼ atijem, ¿inchalik na ayoʼjiik? ¿Chaaj woʼ reet?
Chawil taq i VIDEO eh tiqʼoroq taq chi riij:
-
¿Chajariik xkibʼan taqeh kʼijool reh qʼorik eh chi maʼxta kiyoʼjiik?
Chawil taq Isaías 41:10 eh tiqʼoroq taq chi riij:
-
¿Chaaj woʼ reet ko ruman chi ne nabʼan atiij mi tiyoʼjik chi qʼoroj kʼuhbʼaal?
¿Mi awehtʼal naq?
Kʼih taqeh testigo reh Jehová inkikapaaj naq chi maʼ ne ta naq inkibʼan i qʼoroj kʼuhbʼaal. Jeʼ rukabʼ jenaj winaq Sergey i rubʼihnaal irukapaaj naq chi maʼxta kamaj eh irukʼaxkileej naq qʼorik ruukʼ tokoom. Xa reʼ laʼ noq xutoqʼaaʼ tijinik chi riij i Santo Laj Huuj reʼ reh iruqʼor: «Atoobʼ ta kinyoʼjik naq xnukowej wiibʼ reh qʼorik chi riij i kʼahchiʼ nutijem pan Santo Laj Huuj. Jeʼ reʼ noq reʼ kʼahchiʼ nutijem pan Santo Laj Huuj xkahnik pan nukʼux».
4. Hat oq chaqʼlaam
Reh ruqʼorariik i kʼuhbʼaal reh jenoʼ kʼachareel, chakapaaj chajariik i naʼaqʼorom reh eh nikʼwach naʼaqʼorom reh. Chawil taq i 2 Timoteo 2:24 eh 1 Pedro 3:15, eh tiqʼoroq taq chi riij:
-
¿Nikʼwach ne nakoj i naʼojbʼal wilih noq ne tiqʼorik ruukʼ taqeh kʼachareel chi riij i Santo Laj Huuj?
-
Mareh reʼ taqeh afamilia oon awamigo maʼ jenaj ta wach inkikapaaj awuukʼ. ¿Chajariik ne nabʼan? ¿Eh chajariik i maʼ ne ta inabʼan?
-
¿Chaaj woʼ reet ko ruman chi ne qojqʼorik kuukʼ pan chaqʼlamiil chuwach chi ne inqamin keh i nakikojom wach?
5. Qʼorik chi riij i runimaal rajaawriik i Dios iruyeew rusuqkiil qakʼux
Reʼ Jehová xuyeew rukamaj i Jesús chi qʼoroj kʼuhbʼaal. ¿Chajariik xuqʼor i Jesús chi riij i kamanik reʼreʼ? Chawil taq i Juan 4:34 eh tiqʼoroq taq chi riij:
-
Rubʼanariik qawaʼ irubʼan chi wilik qakʼachariik eh suq qakʼux. ¿Chaaj woʼ reet xuqʼor i Jesús chi reʼ ruwaʼ reʼ rubʼanariik iraaj i Dios jeʼ rukabʼ i qʼoroj kʼuhbʼaal?
-
Raaj i hat, wilaʼ xaqʼor i kʼuhbʼaal, ¿chajariik taqeh kooch ne inakʼul?
Juʼjun taqeh naʼojbʼal
-
Pan moloj iibʼ xilak xamaano, chakoj rehtaal nikʼwach ne inatoqʼaaʼ qʼorik ruukʼ taqeh i ehtalil inkikʼuhtaj ar.
-
Tiqʼoroq ruukʼ inkʼuhtanik aweh chi riij i Santo Laj Huuj chi riij chajariik i naʼabʼanam reh chi ne tiʼikʼik chi kʼuhtanik pan moloj iibʼ. Reʼ kamanik ne inkiyeew aweh ne tirutobʼeej reh qʼorik chi riij i kʼahchiʼ atijem ruukʼ tokoom.
-
Reh chi ne tichol qʼorik chi riij i pahqanik ne inkibʼan aweh chatijej awiibʼ ruukʼ ahaʼ iruqʼor «Reʼ inkiqʼor i juʼjun» eh «Mareh ne inkiqʼor aweh» reʼ wilik pan huuj wilih.
MAREH NE INKIQʼOR AWEH: «¿Mi suq akʼux? ¿Chajariik xabʼan chuwach i xamaano?».
-
Wilaʼ kʼahchiʼ kipahqaam aweh tiqʼoroq chi riij i kʼahchiʼ atijem pan Santo Laj Huuj.
KʼOLOQ PAN AKʼUX
Qʼorik chi riij i runimaal rajaawriik i Dios irubʼan chi suq qakʼux eh chi maʼ kʼaxik ta qʼorik chi riij jeʼ rukabʼ inakapaaj i hat.
Reʼ xkahnik pan akʼux
-
¿chajariik ne iruyeew rukowiil akʼux reh qʼorik chi riij i runimaal rajaawriik i Dios?
-
¿Nikʼwach ne tiqʼorik chi riij i kʼahchiʼ atijem pan Santo Laj Huuj pan chaqʼlamiil?
-
¿Chajariik naʼabʼanam reh chi maʼ ne ta chik tiyoʼjik?
CHAREQ RUMAN
Chawil kijibʼ ruwiiʼ reh nikʼwach ne naqʼor i kʼuhbʼaal ruukʼ rukojariik i kʼisa huuj reh i qayeʼaabʼ jw.org.
Naʼojbʼal reh ruqʼahsaljiik i kokʼ huuj reh i qayeʼaabʼ pan internet jw.org (1:43)
Chanabʼeej kijibʼ naʼojbʼal reʼ ne tirutobʼeej qʼorik chi riij i runimaal rajaawriik i Dios.
Chawil jenaj ehtalil isamaj pan Santo Laj Huuj reh chi ne inwihʼik akowiil reh qʼoroj kʼuhbʼaal atoobʼ ta hat halakʼun.
Chawil nikʼwach ne tiqʼorik ruukʼ afamilia chi riij i Santo Laj Huuj reʼ ko majaaʼ inkinabʼeej chi riij i Jehová.
Puede que también le interese
PAHQANIK CHI KIIJ TAQEH TESTIGO REH JEHOVÁ
¿Nikʼwach i tijinik chi riij i Santo Laj Huuj inkiyeew taqeh testigo reh Jehová?
Ruukʼ i tijinik inkiyeew taqeh testigo reh Jehová xa ahaʼ paʼ wilik i Santo Laj Huuj ne irubʼan chi ne nakoj. Jeʼ woʼ chik, ne irubʼan chi ne nayuqʼeej taqeh awas achaaq oon taqeh amigo inawaaj.
