LECCIÓN 22
Willanaykipaj kallpachakuy
Bibliamanta yachakuspaqa “tukuy runas kayta yachananku tiyan”, nispa ninchej. Jinapis yachakusqanchejta wajkunaman willariyta manchikunchej. Kaypi yachakusun imaynatachus tukuyman willaspa kusisqa kanata, imachus mana manchachikunapaj yanapanawanchejta ima.
1. ¿Imatá ruwasunman wajkunaman willarinapaj?
Maypi kashaspapis imata ruwashaspapis yachakusqanchejta familiaresninchejman, amigosninchejman respetowan willarina (Colosenses 4:6 leey). Bibliamantaqa willariytapuni munanchej, Jesuspa discipulosninpis chayta ruwarqanku. Chayrayku nerqanku: “Mana chʼinlla kayta atiykumanchu, willanaykupuni tiyan imastachus rikusqaykuta, uyarisqaykutapis”, nispa (Hechos 4:20).
Predicayta qallarinapaj wakin yuyaychaykuna
-
Familiaresniykiwan parlarishaspaqa Bibliamanta parlarinaykipaj kayta niwaj: “Bibliapi kayta yacharikorqani”, nispa.
-
Uj amigoyki onqosqa chayri llakisqa kashan chayqa, kallpacharinaykipaj jina Bibliapi uj versiculota rikuchiwaj.
-
Trabajomanta compañerosniyki imaynachus kashasqaykita tapurisojtinku, willariwaj Bibliamanta yachakusqaykita chayri reunionpi yachakusqaykita.
-
Amigosniykiman yacharichiwaj jw.org nisqaman yaykuyta.
-
Pi rejsisqallaykitapis wajyariwaj khuska estudianaykichejpaj, manachayrí waj testigo yachachinanpaj jw.org nisqapi formulariota juntʼachinanpaj yanapariy.
2. ¿Imaraykutaj hermanoswan khuska predicananchej tiyan?
Hermanoswan khuska predicayqa yanapawanchej ashkha runasman sumaj willaykunata predicanapaj. Jesuspa discipulosninpis chayllatataj ruwarqanku, paykunaqa mana rejsisqasnillankumanchu predicarqanku. Jesusqa paykunata “iskaymanta iskay kacharqa, ñaupaqenta rinankupaj tukuy llajtasman” (Lucas 10:1). Khuska predicaspaqa may kusisqas kasharqanku (Lucas 10:17). ¿Qanpis hermanoswan khuska predicanaykipaj kallpachakuyta atiwajchu?
ASTAWAN YACHAKUNA
Kaypi yachakusun mana manchachikuspa predicayta atisqanchejta, sumaj willaykunata predicaspataj kusisqa kasqanchejta.
3. Predicanapajqa Jehová yanapawanchej
Wakenqa predicayta munaspapis manchachikunchej runas mana uyarinawanchejta chayri imatapis ninawanchejta.
-
Qanrí, ¿Bibliamanta yachakusqaykita wajkunaman willariyta atillankichu chayri manchachikunkichu?
VIDEOTA qhawariychej, chantá yachakojta tapuriy.
-
¿Imatataj wakin jóvenes ruwasqanku predicayta mana manchachikunankupaj?
Isaías 41:10 leeriychej, chantá yachakojta tapuriy:
-
Runasman willariyta manchachikojtinchej, ¿imaraykutaj Diosmanta mañakunanchej allin kanman?
Astawan yachanaykipaj
Niraj Jehovaj testigon kashaspa, ashkhasqa yuyarqanku ni jaykʼaj predicayta atinankuta. Ajina karqa Sergey sutiyoj runawan. Payqa yuyarqa ni imapaj valesqanta, chantapis mana waj runaswan parlariyta atillajchu. Jinapis uj pʼunchay Bibliata estudiayta qallarisqa. Pay nin: “Manchachikuspapis imatachus yachakusqayta wajkunaman willariytapuni munarqani. Chay willarisqayqa mayta kallpachawarqa, Bibliamanta yachakusqaypis sonqoyman yaykorqa”, nispa.
4. Respetowan willarina
Pillamanpis willarinapajqa ñaupajmantaña piensarina imatachus ninapi, imaynatachus willarinapipis. 2 Timoteo 2:24; 1 Pedro 3:15 leeriychej, chantá yachakojta tapuriy:
-
Kay leerisqanchejman jina, ¿imaynatataj wajkunaman willarina kasqa?
-
Familiaresninchej chayri amigosninchej mana uyariyta munawajtinchej, ¿imatá ruwasunman? Chanta, ¿imatataj mana ruwanachu kanman?
-
Paykunawan parlarishaspa, ¿imaraykutaj respetowanpuni willarinanchej kanman?
5. Sumaj willaykunata willayqa mayta kusichiwanchej
Jehovaqa Jesusta kamacherqa sumaj willaykunata willananta. ¿Imaynatá Jesús qhawarqa chay llankʼayta? Juan 4:34 leeriychej, chantá yachakojta tapuriy:
-
Kausanapajqa sumaj mikhunasta mikhunchej, kusisqataj kanchej. Diospa munayninta ruwayta Jesús mikhunawan kikinchaspa, ¿imatá niyta munasharqa?
-
¿Imajtintaj wajkunaman Bibliamanta willarispa kusisqapuni kanchej?
Wakin yuyaychaykuna
-
Chaupi semana tantakuypi kashaspa sumajta qhawariy imaynatachus hermanos rikuchiyta ruwasqankuta.
-
Yachachejniykiman niy, qanpis chay hermanos jinallataj predicanaykipaj wakichikuyta munasqaykita. Chaytaj mana manchachikuspa runasman willarinaykipaj yanapasonqa.
-
Pillamanpis willarinaykipaj, pillapis imata tapusojtin kutichinaykipaj “Wakin runas ninku”, “Ichá wakin tapusonqanku” nisqa yanapaswan yanapachikuy.
ICHÁ WAKIN TAPUSONQANKU: “¿Imayná kashanki, allillanchu rishasunki?”, nispa.
-
Ajinata tapusojtinku, ¿imatachus Bibliapi yachakusqaykita willariwajchu?
¿IMASTÁ YACHAKUNCHEJ?
Kaypi yachakunchej sumaj willaykunata willareyqa kusichiwasqanchejta, Bibliapi yachakusqanchejtapis mana manchikuspa willariyta atisqanchejta.
Yuyarikunapaj
-
¿Pitaj yanapawasun runasman sumaj willaykunata willarinapaj?
-
¿Imaynatá familiaresninchejman, amigosninchejmanpis willarisunman?
-
¿Imatá ruwasunman mana manchachikuspa willarinapaj?
ASTAWAN YACHAKUNAYKIPAJ
¿Imaynatataj jw.org nisqa tarjetitata runasman jaywarisunman? Chayta yachanaykipaj kay videota qhawariy.
Internetpi jw.org nisqaman yaykunapaj tarjetitawan willanapaj (1:43)
¿Imastaj yanapawasunman sumaj willaykunata runasman willamunapaj? Chayta yachanaykipaj kayta leeriy.
“Runa japʼej pescador kanaykipaj kallpachakuy” (Torremanta Qhawaj, septiembre de 2020)
¿Imaynatá wawaspis runasman willarinkuman mana manchachikuspa? Chayta yachanaykipaj kay videota qhawariy.
¿Imaynatá mana testigo familiaresninchejman Bibliamanta willarisunman? Chayta yachanaykipaj kayta leeriy.
“Mana creente familiaresninchejta yanapana” (Torremanta Qhawaj, 15 de marzo de 2014)
Kaykunatapis qhawaykurillawajtaj
¿IMATÁ TAPUKUNKU JEHOVAJ TESTIGOSNINMANTA?
¿Imaynatá Jehovaj testigosnin Bibliamanta yachachinku?
Jehovaj testigosnenqa, gratis Bibliamanta yachachiyku, qanpis gustasusqan Bibliawan yachakuyta atiwaj. Chantapis familiaykita, amigosniykitapis invitariwaj qanwan khuska yachakunankupaj.
