22 YACHACHIKUY
¿Imaynatan jujkunaman Diosmanta willawaq?
Bibliamanta yachasqaykiman jinaqa yaqapaschá nirqanki: “¡Kaytaqa lliupas yachanankupunin!”, nispa. Chhaynapunin, Bibliaq yachachisqantaqa jujkunapas yachanankun. Ichaqa yaqapaschá manchakushanki yachasqaykimanta jujkunaman willayta. ¿Imatan ruwawaq mana manchakuspa kay allin willakuykunata jujkunaman willanaykipaq? Chaymantan kunan yachasun.
1. ¿Imaynatan Bibliamanta yachasqaykita reqsisqaykikunaman willawaq?
Juj kutinmi Jesuspa qatikuqninkuna nirqanku: “Manapunin imachus rikusqaykumanta imachus uyarisqaykumantawan willaytaqa upallakusaqkuchu”, nispa (Hechos 4:20). Paykunaqa ancha allinpaqmi qhawarirqanku Bibliamanta yachasqankuta, chaymi jujkunaman willaytapuni munarqanku. ¿Chhaynatachu qanpas qhawarinki Bibliapi yachasqaykita? Chhaynaqa, ima tumpallapas familiaykikunaman amigoykikunamanpas willay Bibliapi yachasqaykimanta (leey Colosenses 4:6).
¿Imaynatan Bibliamanta rimayta qallariwaq?
-
Pi familiaykiwanpas rimaspaqa yaqapaschá niwaq: “Kay semanapin juj munay yachachikuyta yacharuni”, nispa.
-
Sichus mayqen amigoykipas llakisqapas onqosqapas kashan chayqa, kallpachanapaq jinan juj textota Bibliamanta leepuwaq.
-
Llank’aqmasiykikunachus tapusunkiman: “¿Imatan samasqayki p’unchaykuna ruwarqanki?” nispa chayqa, yaqapaschá willawaq chay semanapi Bibliamanta imachus yachasqaykita, willawaqmi juñukuypi yachasqaykitapas.
-
Pi amigoykimanpas yachachiy internetpi jw.org nisqaman jaykunanpaq.
-
Jujkunata invitay Biblia estudiasqaykiman jamunankupaq, yachachiwaqmi internetpi jw.org nisqapi Bibliamanta yachachiqta mañakunanpaqpas.
2. ¿Imaraykun allinpuni hermanokunawan kuska jujkunaman Diosmanta willay?
Jesuspa qatikuqninkunaqa manan reqsisqanku runakunallamanchu Diosmantaqa willaqku. Jesús kikinpunin qatikuqninkunata “iskay-iskaymanta ñaupachirqan lliu [...] llaqtakunaman ayllukunamanwan” Diosmanta willanankupaq (Lucas 10:1). Chhaynata willasqankuwanmi askha runakunaman willayta atirqanku. Chaymantapas paykunaqa kusisqan kasharqanku kuska Diosmanta willaspa (Lucas 10:17). ¿Munawaqchu qanpas iñiq t’aqapi hermanokunawan kuska Diosmanta willayta?
ASTAWAN YACHASUNCHIS
¿Iman yanapawasunman mana manchakunanchispaq, aswanpas kusisqa Diosmanta willananchispaq? Chaymanta kunan yachasun.
3. Jehová Diosmi yanapasunki
Wakinmi piensanku: “Diosmanta willaqtiy mana uyariwanqakuchu chayri, jujnirayta qhawawanqaku chayri”, nispa.
-
Qanri, ¿imaninkitaq? ¿Bibliamanta jujkunaman willawaqchu, icha manchakushankichu? ¿Imarayku?
VIDEOTA qhawaychis, chaymantataq jamuq tapuyman jina parlariychis:
-
¿Imatan chay videopi wayna-sipaskuna ruwarqanku manaña manchakunankupaq?
Leeychis Isaías 41:10 textota, chaymantataq jamuq tapuyman jina parlariychis:
-
Jujkunaman Diosmanta willayta manchakushanki chayqa, ¿imatan Diosmanta mañakuwaq?
¿Yacharqankichu?
Manaraq Jehová Diospa testigon kapushaspan askha piensarqanku manapuni Diosmanta willayta atinankupaq. Sergey sutiyoq runamanta yachasun. Payqa mana valeqpaqsi qhawarikuq, runakunawan rimaytapas nishutas manchakuq. Ichaqa Bibliata estudiaspas jujkunaman Diosmanta willanan kasqa. Paymi nin: “Manchaliña karqani chaypas, tukuy atisqaytan ruwarqani Diosmanta jujkunaman willanaypaq. Payqa yanapawarqanmi amaña mana valeqpaq jina qhawarikunaypaq, yanapawallarqantaqmi Bibliaq yachachikuyninkuna sonqoypi allinta saphichakunanpaqpas”, nispa.
4. Respetowan jujkunata rimapayay
Pitapas Diosmanta rimapayanaykipaqqa allintan piensanayki imamantachus rimanki chaypi, imaynatachus rimapayanki chaypipas. Leeychis 2 Timoteo 2:24; 1 Pedro 3:15 textokunata, chaymantataq jamuq tapuykunaman jina parlariychis:
-
Kay textokunata leesqanchisman jina, ¿imaynatan jujkunaman Bibliamanta rimapayawaq?
-
¿Imatan ruwawaq familiaykikuna amigoykikunapas mana uyarisuqtiyki? ¿Imatan mana ruwanaykichu?
-
¿Imaraykun respetowanpuni pitapas rimapayanayki, manataq mana munashaqtachu “creenaykin” ninayki?
5. Allin willakuykunamanta jujkunaman willayqa kusikunapaqmi
Jehová Diosmi Jesusta kamachirqan allin willakuykunata jujkunaman willananpaq. ¿Imaynatan Jesús qhawarinman karqan chay kamachikuyta? Leeychis Juan 4:34 textota, chaymantataq jamuq tapuykunaman jina parlariychis:
-
Yachasqayki jina, allin mijunata mijuspaqa kusisqan, qhalin kausanchis. ¿Imaraykun Jesús mijunawan tupanachirqan Diospa munaynin ruwayta?
-
Qhawarisqaykiman jina, ¿kusisqachu kawaq jujkunaman Diosmanta willaspa?
Yaqapaschá kaykuna yanapasunkiman
-
Chaupi semana juñunakuypi makilla uyariy imaynatas piwanpas rimayta qallariwaq chayta.
-
Yachachiqniykita tapuy imaynatas juñunakuypi participanaykipaq matriculakuwaq chayta. Chhaynapin allinta yachanki jujkunaman Diosmanta willayta.
-
Kay libropi “Wakin runakunan ninku” nisqata, “Yaqapaschá pipas tapusunkiman” nisqatawan allinta qhawariy, chhaynapin yachanki jujkunaq tapukusqanman imayna kutichiyta.
YAQAPASCHÁ PIPAS TAPUSUNKIMAN: “¿Imaynallan kashanki? ¿Imatan kay p’unchaykuna ruwasharqanki?”, nispa.
-
¿Imaynatan Bibliamanta willayta qallariwaq chhaynata pipas tapusuqtiyki?
IMATAN YACHAMURQANCHIS
Diosmanta jujkunaman willayqa ancha kusikunapaqmi, personaykipas atillawaqmi Diosmanta jujkunaman willaytaqa.
Yuyarisun
-
¿Iman yanapasunkiman Diosmanta jujkunaman willanaykipaq?
-
¿Imaynatan jujkunaman respetowan Diosmanta willawaq?
-
¿Imatan ruwawaq Diosmanta willayta ama manchakunaykipaq?
ASTAWAN YACHANAYKIPAQ
jw.org nisqa tarjetawanqa tawa formapin Diosmanta willawaq, chaymantan kay videopi willashan.
¿Iman yanapasunki allin willakuykunata willanaykipaq? Chaymantan kay qelqapi yachanki.
“¿Listochu kashanki runakunata challwanaykipaq?” (Qhawaq, 2020 watapi setiembre killa)
¿Imaynatan wayna-sipaschakuna mana manchakuspa Diosmanta willankuman? Chaymantan kay videopi willashan.
¿Imaynatan mana iñiq familiaykikunaman Jehová Diosmanta willawaq? Chaymantan kay qelqapi willashan.
“Mana iñiq familianchispa sonqonman chayasun” (Qhawaq, 2014 watapi 15 marzo)
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
