LESONA 22
E Faapefea Ona E Faailoa Atu le Tala Lelei?
A o e aʻoaʻoina upu moni o le Tusi Paia, e te ono mafaufau, ʻE tatau ona iloa uma e tagata lenei mea!’ O le mea moni lenā. E tatau ona iloa e tagata uma upu moni o le Tusi Paia! Ae e te ono lagona le popole e taʻu atu i isi mea ua e aʻoaʻoina. Seʻi o tatou iloiloina pe faapefea ona e foʻia le popole, ma faailoa atu ma le fiafia le tala lelei o loo i le Tusi Paia.
1. E faapefea ona e faailoa atu i isi tagata mea ua e aʻoaʻoina?
Na faapea mai soo o Iesu: “E lē mafai ona ma lē taʻu atu mea ua ma vāai ma faalogo i ai.” (Galuega 4:20) Na latou matuā faatāua le upu moni, ma mananaʻo e faailoa atu i tagata uma. Pe e faapena ou faalogona? Afai o lea, ia saʻili so o se avanoa e faailoa atu ai ma le faaaloalo i ou aiga ma au uō mea ua e aʻoaʻoina.—Faitau le Kolose 4:6.
Auala e amata ai
-
Pe a e talanoa i sou tauaiga, amata se talanoaga i le faapea atu: “E iai se mea manaia na ou aʻoaʻoina i lenei vaiaso.”
-
Ia faailoa atu se mau faalaeiau i sau uō o loo maʻi po o popole foʻi.
-
Pe a fesili atu se tasi e te lua faigaluega faatasi pe ā mai lou vaiaso, taʻu i ai se mea na e aʻoaʻoina mai i lau suʻesuʻega faale-Tusi Paia, po o se sauniga.
-
Faailoa i au uō la tatou tuatusi o le jw.org.
-
Valaaulia isi e auai i lau suʻesuʻega faale-Tusi Paia, pe faailoa iā i latou le auala e talosaga ai mo se suʻesuʻega faale-Tusi Paia i luga o le jw.org.
2. Aiseā e avea ai le talaʻi faatasi ma le faapotopotoga o se sini aogā?
Na faia e soo o Iesu isi mea e sili atu, nai lo le tau ina faailoa atu o le tala lelei iā i latou e masani ai. Na “aauina atu [e Iesu] i latou taʻitoʻalua . . . i aai uma” e talaʻi atu. (Luka 10:1) O le maopoopo o le auala na faia ai le talaʻiga, na maua ai e le toʻatele o tagata le avanoa e faalogo ai i le tala lelei. O le talaʻi faatasi o se vaega, na maua ai foʻi e soo le olioli. (Luka 10:17) Pe e mafai ona fai ma ou sini le talaʻi faatasi ma le faapotopotoga?
SAʻILIʻILI ATILI
Iloilo pe faapefea ona e foʻia le popole, ma tofo i le fiafia e maua mai i le faailoa atu o le tala lelei.
3. O le a fesoasoani Ieova iā te oe
E mananaʻo nisi e auai i le talaʻiga, ae e popole i le auala e tali mai ai tagata.
-
Pe e te fefe e faailoa atu i isi mea ua e aʻoaʻoina? Aiseā?
Faaali le VITIŌ, ona talanoa lea i le fesili lenei:
-
Na faapefea ona foʻia e nei talavou Molimau a Ieova le fefe?
Faitau le Isaia 41:10, ona talanoa lea i le fesili lenei:
-
Pe a e lagona le fefe e talaʻi atu, e faapefea ona fesoasoani le tatalo iā te oe?
E te silafia?
O le toʻatele o Molimau a Ieova, na manatu i le taimi muamua e faigatā ona latou faailoa atu i isi le tala lelei. O se faataʻitaʻiga, na lagona e Sergey le lē aogā, ma na faigatā ai ona ia talanoa i tagata. Ae ina ua ia suʻesuʻeina le Tusi Paia, na ia faapea mai: “E ui na lagona loʻu fefe, ae na amata ona ou talanoa atu i isi e faatatau i mea na ou aʻoaʻoina. Ou te leʻi faatalitalia o le a ou lagona le mautinoa ma le toʻa, pe a talanoa atu i isi e faatatau i le Tusi Paia. Na faamalosia ai foʻi loʻu faatuatua i nei talitonuga fou.”
4. Ia faaaloalo
Pe a faailoa atu le tala lelei, ia filifili lelei upu e fai atu, ma le auala e fai atu ai. Faitau le 2 Timoteo 2:24 ma le 1 Peteru 3:15, ona talanoa lea i fesili nei:
-
E faapefea ona e faatatauina nei fuaiupu pe a talanoa i isi e faatatau i le Tusi Paia?
-
Pe a lē fiafia nisi o ou tauaiga po o au uō iā te oe, o le ā e tatau ona e faia? O le ā e lē tatau ona e faia?
-
Aiseā e tāua ai le faaaogā o fesili faaoso naunau, nai lo o le faamalosia o i latou e talitonu i mea o loo e fai atu ai?
5. O le faailoa atu o le tala lelei e maua ai le fiafia
Na tuuina atu e Ieova iā Iesu le galuega o le faailoa atu o le tala lelei. O le ā le auala na vaai ai Iesu i lenei galuega? Faitau le Ioane 4:34, ona talanoa lea i fesili nei:
-
O le taumafaina o meaʻai lelei e faatumauina ai le ola ma maua ai le fiafia. Aiseā na faatusa atu ai e Iesu le faia o le finagalo o le Atua, lea e aofia ai ma le faailoa atu o le tala lelei, i le taumafaina o se meaʻai?
-
O ā faamanuiaga o le a e olioli ai pe a faailoa atu i isi le tala lelei?
Fesoasoani
-
I le sauniga amata o le vaiaso, mātau toleniga i le auala e amata ai talanoaga.
-
Talanoa i lou faiaʻoga i le auala e avea ai oe ma tagata aʻoga i le sauniga amata o le vaiaso. O faaeaga e tuuina atu i tagata aʻoga, e toleni ai i le auala e taʻu atu ai i isi mea ua latou aʻoaʻoina.
-
Faaaogā le vaega “Ua Faapea Mai Nisi” po o le vaega “Pe a Fesili Mai se Tasi” o loo i lenei tusi, e faataʻitaʻi ai le auala e te tali atu ai i fesili ma teteega masani.
PE A FESILI MAI SE TASI: “O ā mai?”
-
E faapefea ona e faaaogā lenā avanoa e taʻu atu ai se mea na e aʻoaʻoina mai i lau suʻesuʻega faale-Tusi Paia?
AOTELEGA
O le faailoa atu o le tala lelei i isi e maua ai le olioli, ma atonu e sili atu ona faigofie i lo le mea na e mafaufau i ai.
Fesili Autalu
-
Aiseā e tatau ai ona faailoa atu le tala lelei i isi?
-
E faapefea ona e talaʻi atu i se auala faaaloalo?
-
E faapefea ona e foʻia le popole e talaʻi atu?
MANATU FAAOPOOPO
Iloilo auala faigofie e fā e mafai ona e faailoa atu ai le tala lelei, e ala i le faaaogāina o le pepa o faamatalaga mo le jw.org.
Taulimaga Faataʻitaʻi o le Pepa o Faamatalaga mo le JW.ORG (1:43)
Iloilo nisi o uiga se fā e mafai ona fesoasoani iā te oe e faailoa atu ai le tala lelei.
“Po ua E Sauni e Avea Oe ma Faifaiva i Tagata?” (Le Olomatamata, Setema 2020)
Tagaʻi i le auala e fesoasoani ai se faaaʻoaʻoga faale-Tusi Paia iā i tatou, e maua ai le lototele e faailoa atu ai le tala lelei e tusa pe tatou te lāiti.
Mātau pe faapefea ona e talanoa atu e faatatau i le Tusi Paia i ou tauaiga e leʻi aʻoaʻoina e faatatau iā Ieova.
“Ia Pāʻia Loto o Tauaiga lē Talitonu” (Le Olomatamata, Mati 15, 2014)
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
