LESOGNE 22
Ino ty Azo’o Atao mba Hirehafagne i Talily Soay?
Fa mahafantatse ty hamarenagne amy Baiboly ao rehe hinane zao. Va’e hieretseretse rehe tie: ‘Mila mahafantatse itoy ka o ndatio iaby!’ Tena maregne zay. Faie va’e hatahotse hirehake amo o ndatio ty raha nianara’o rehe. Andao hodinehentikagne tie ino ty hagnampe azo hahavany hirehake amy ty hafa i talily soay.
1. Ino ty azo’o atao mba hirehafagne ze raha nianara’o amy ty ndaty fanta’o?
Nirehake i mpiana i Jesosy rey tie: “Tsy azo’ay atao ty tsy hirehake sasa miomba ze raha nitrea’ay naho nirei’ay.” (Asan’ny Apostoly 4:20) Tena tea iareo ty raha nianara’e, le te hizara aze amy ze kila ndaty iareo. Izay ka vao ty tsapa’o? Mipaliava hirike areke hirehafa’o amy ty keleia’o naho amy ty nama’o ze raha nianara’o. Faie anò am-pagnajagne ty fanoagne izay.—Vakio ty Kolosianina 4:6.
Azo’o oharegne retoa:
-
Naho te hirehake foto-kevetse amy Baiboly ao amy ty keleia’o rehe, le azo’o atao ty mirehake tihoe: “Nisy raha fanjaka nianarako zay tamy ty heregnandro toy.”
-
Naho misy nama’o marare ndra minekoneko, le irehafo andinin-teny mampahery.
-
Naho misy mpiara-miasa ama’o magnontane azo miomba ty raha natao’o tamy i fara heregnandroy, le rehafo ama’e ty raha nianara’o amy ty boke toy ato, ndra tam-pivoriagne agne.
-
Atorò ty nama’o ty tragnom-porarotse jw.org.
-
Taono ty nama’o ndra ty keleia’o naho fa hianatse Baiboly rehe, ndra atorò iareo i fomba fangatahagne hianatse Baiboly amy jw.org aoy.
2. Nagnino ro toko’e hatao’o tanjogne ty hiarake hitory amo o fiangonagneo?
Tsy tihoe nirehake i talily soay tamy ty ndaty fanta’e avao i mpiana i Jesosy rey. ‘Nagnirake iareo tsikiroedroe mba hitory tamy ze tanàgne iaby’ ty Jesosy. (Lioka 10:1) Vita lamigne soa o asa fitoriagne natao iareo iohoe, le tena maro ty ndaty naharey i talily soay. Tena fale ka i mpiana i Jesosy rey satria tsy nandeha irery fa niarake nitory. (Lioka 10:17) Nagnino naho atao’o tanjogne ka ty hiarake hitory amo o fiangonagneo?
ANDAO HANDINEKE TY PITSOPITSO’E
Hodinehentikagne ato tie ino ty hagnampe azo tsy hatahotse fa hahavany hirehake i talily soay. Ho trea’o ato ka tie nagnino ro mahafale ty manao o asa iohoe.
3. Hanohagne azo ty Jehovah
Te hitory ty ndaty ila’e faie matahotse reke tie akore ty ho fihevera o ndatio aze, ndra ty ho fihetse i ndatỳ ama’e.
-
Matahotse hirehake ty raha nianara’o amy ty hafa vao rehe? Ino ty anto’e?
Alefaso i VIDEO oy, sady iharò midineke ty fagnonteneagne toy.
-
Ino ty nagnampe o tanora Vavolombelo i Jehovah rehoe mba tsy hatahotse?
Vakio ty Isaia 41:10, sady iharò midineke ty fagnonteneagne toy:
-
Nagnino ro magnampe azo ty vavake naho matahotse hitory rehe?
Raha mahaliagne
Maro ty Vavolombelo i Jehovah nieretseretse tie tsy ho vita’e ty hirehake i talily soay amy ty hafa. Hoe izay ohatse ty nahazo i Sergey. Tsy natoky ty tegna’e reke sady tsy nahay nirehake ty heve’e. Faie nianatse Baiboly reke naho fa tafara tatoy. Hoe reke: “Ndra tie natahotse aza raho, le nirehake ty raha nianarako tamy ty hafa avao. Gaga raho fa nagnampe ahy hatoky tegna ty firehafagne amy ty hafa ty miomba o Baibolio. Vao mainke nino ty raha nianarako ka raho.”
4. Manehoa fagnajagne
Naho fa mirehake i talily soay rehe, le tsy toko’e ty raha horehafe’o avao ty eretserete’o fa ty fomba hirehafa’o aze ka. Vakio ty 2 Timoty 2:24 naho ty 1 Petera 3:15, sady iharò midineke ty fagnonteneagne retoa:
-
Akore ty azo’o ampiharagne o andinin-teny reo naho fa mirehake amy ty hafa miomba o Baibolio rehe?
-
Va’e tsy hagneke ty raha rehafe’o ty keleia’o ndra ty nama’o ila’e. Ino ty toko’e hatao’o? Ino ty tsy toko’e hatao’o?
-
Nagnino ro soa ty mifampirehake amy iareo am-pagnajagne, fa tsy mamoresé iareo amy ty raha toko’e hinoa’e?
5. Mahafale ty mirehake i talily soay
Nimea i Jehovah andraikitse hagnambara i talily soay ty Jesosy. Akore ty fihevera i Jesosy o asa iohoe? Vakio ty Jaona 4:34, sady iharò midineke ty fagnonteneagne retoa:
-
Mahavy antikagne ho velogne sady ho falefale ty homagne hanegne mahasalama. Nagnino ro nampitovie i Jesosy amy ty mihinagne ty manao ty zoton’arofon’Andrianagnahare, agnisa izay ty fitoriagne i talily soay?
-
Naho ty heve’o, ino ty mahafale antikagne naho fa mirehake i talily soay?
Soso-kevetse
-
Naho fa amy ty fivoriagne andavanandro, le dineho ty azo’o atao mba hanombohan-drehake naho fa mitory.
-
Agnonteneo i mpampianatse azoy tie akore ty atao naho te handrambe anjara amy ty fampiofagnagne amy ty fivoriagne andavanandro rehe. Hagnampe azo ho vognogne hirehake amy ty hafa ty raha nianara’o o fampiofagnagne iohoe.
-
Ampiasao ty fizaràgne tihoe “Misy ty Mirehake Fa” ndra “Va’e Hisy ty Hagnontane Tie” amy ty lesogne tsikiraidraike ato fa hagnampe azo hamale ze fagnonteneagne naho ze fanoheragne va’e hiseho.
VA’E HISY TY HAGNONTANE TIE: “Ino ty vaovao elaela zay?”
-
Akore ty azo’o agnararaotagne io mba hirehafagne ze raha nianara’o amy Baiboly ao?
FAMINTIGNAGNE
Mahafale ty magnambara i talily soay amy ty hafa sady mora ty manao izay fa tsy arake ty eretsereta’o aze.
Fameregnagne
-
Nagnino rehe ro toko’e hirehake i talily soay amy ty hafa?
-
Akore ty anoa’o izay am-pagnajagne?
-
Naho matahotse hitory i talily soay rehe, akore ty azo’o andreseagne izay?
FAGNAZAVAGNE FAGNAMPE’E
Dineho ato ty fomba efatse tsotra azo’o irehafagne i talily soay amy ty alala ty karatse jw.org.
Misy toetse efatse hagnampe azo hirehake i talily soay ty ato.
Misy tantara raike ty amy Baiboly ao hagnampe antikagne hanagne herim-po hirehafagne i talily soay ndra tie mbe ajaja aza tikagne.
Henteo ato tie, akore ty ahafaha’o mirehake amy ty keleia’o tsy vavolombelogne ty miomba i Jehovah naho o Baibolio.
“Mikezaha Hahay Hanohigne ty Fo ty Longo’o” (Fitalakesan-davitse 15 Marsa 2014)
Va'e ho Tea'o Ka
FAGNONTENEAGNE FAPETRA O NDATIO
Inogne ty Atao Tihoe Fianaragne Baiboly?
Afake mampiasa ze Baiboly tea’o rehe naho fa mianatse Baiboly amy ty Vavolombelo i Jehovah. Maimaimpoagne i fianaragney sady afake taone’o hiarake hianatse ama’o ka ty keleia’o ndra ty ragne’o.
