LĒSONI 22
ʻE Anga-Fēfē Haʻo Vahevahe ʻa e Ongoongo Leleí?
ʻI hoʻo ako ʻa e ngaahi moʻoni ʻo e Tohi Tapú, te ke fakakaukau nai, ‘ʻOku totonu ke ʻilo eni ʻe he taha kotoa!’ Ko e moʻoni, ʻoku fiemaʻu ki he taha kotoa ke ne ʻilo! Kae kehe, te ke ongoʻi manavasiʻi nai ʻi hono tala ki he niʻihi kehé ʻa e meʻa kuó ke akó. Tau lāulea angé ki he founga te ne tokoniʻi koe ke ikuʻi ʻa e manavasiʻi ko iá pea vahevahe fiefia ʻa e ongoongo lelei ʻo e Tohi Tapú.
1. ʻE lava fēfē ke ke vahevahe ʻa e meʻa kuó ke akó mo e kakai ʻokú ke ʻiló?
Naʻe pehē ʻe he ongo ākonga ʻa Sīsuú: “ʻE ʻikai lava ke tuku ʻema lea ʻo fekauʻaki mo e ngaahi meʻa kuó ma mamata mo fanongo ki aí.” (Ngāue 4:20) Naʻá na saiʻia ʻaupito he meʻa naʻá na ako meia Sīsuú ʻo na loto ke tala ia ki he tokotaha kotoa. ʻOkú ke maʻu ʻa e ongoʻi tatau? Kapau ko ia, kumi ki he ngaahi faingamālie ʻa ia ʻe lava ke ke fakamatalaʻi anga-fakaʻapaʻapa ki ho fāmilí mo e ngaahi kaungāmeʻá ʻa e meʻa kuó ke akó.—Lau ʻa e Kolose 4:6.
Ngaahi founga ke kamata aí
-
ʻI he talanoa mo e fāmilí, kamataʻaki ha kaveinga Fakatohitapu ʻo pehē: “Naʻá ku ako ha meʻa fakamānako ʻi he uiké ni.”
-
Vahevahe ha konga Tohi Tapu fakalototoʻa mo ha kaumeʻa ʻa ia ʻokú ne puke pe hohaʻa.
-
ʻI hono ʻeke atu ʻe ha kaungāngāue pe ʻokú ke fēfē hake, tala ange ʻa e meʻa kuó ke ako ʻi hoʻo ako Tohi Tapú pe fakataha ʻa e fakatahaʻangá.
-
Fakahaaʻi ki ho ngaahi kaungāmeʻá ʻa e uepisaiti jw.org.
-
Fakaafeʻi ʻa e niʻihi kehé ke kau mo koe ʻi hoʻo ako Tohi Tapú, pe fakahaaʻi ange ʻa e founga ke kole ai ki ha ako Tohi Tapu ʻi he jw.org.
2. Ko e hā ko ha taumuʻa lelei ai ke malanga fakataha mo e fakatahaʻangá?
Ko e kau ākonga ʻa Sīsuú naʻa nau fai ʻa e meʻa lahi ange ʻi hono vahevahe pē ʻa e ongoongo leleí mo e kakai naʻa nau ʻiló. Naʻe fekauʻi atu kinautolu ʻe Sīsū “ʻo tautau toko ua ke nau muʻomuʻa ʻiate ia ki he kolo” kotoa ʻo malanga. (Luke 10:1) Ko e ngāue fakaemalanga fokotuʻutuʻu maau ko iá naʻá ne ʻoange ʻa e faingamālie ki he kakai tokolahi ange ke fanongo ki he ongoongo leleí. Ko e malanga fakatahá naʻe toe ʻomai ai ʻa e fiefia lahi ki he kau ākongá. (Luke 10:17) Te ke lava foki mo koe ʻo ʻai ia ko hoʻo taumuʻa ke malanga fakataha mo e fakatahaʻangá?
KELI LOLOTO ANGE
Ako ki he founga ʻe lava ke ke ikuʻi ai hoʻo manavasiʻí pea hokosia ʻa e fiefia ʻoku maʻu mei hono vahevahe ʻa e ongoongo leleí.
3. ʻE kau ʻa Sihova mo koe
Ko e niʻihi ʻoku nau loto ke malangá te nau ongoʻi ilifia nai fekauʻaki mo e anga ʻa e fakakaukau mai ʻa e kakaí pe ko e tali te nau fai maí.
-
ʻOkú ke manavasiʻi ʻi hono vahevahe ʻa e meʻa kuó ke akó? Ko e hā hono ʻuhingá?
Huluʻi ʻa e VITIOÓ, pea lāulea leva ki he fehuʻi hokó.
-
Naʻe ikuʻi fēfē ʻe he kau talavou Fakamoʻoni ko ení ʻenau ilifia?
Lau ʻa e ʻAisea 41:10, pea lāulea leva ki he fehuʻi ko ení:
-
ʻI hoʻo ilifia ke malangá, ʻe anga-fēfē tokoni atu ʻa e lotú?
Naʻá ke ʻiloʻi?
Ko e Kau Fakamoʻoni ʻa Sihova tokolahi naʻa nau ʻuluaki fakakaukau heʻikai ʻaupito lava ke nau tala ʻa e ongoongo leleí ki he niʻihi kehé. Ko e fakatātaá, ko Sergey naʻá ne ongoʻi ʻikai hano mahuʻinga pea naʻe faingataʻa kiate ia ke talanoa ki he niʻihi kehé. Ka naʻá ne ako leva ʻa e Tohi Tapú. ʻOkú ne pehē: “Neongo ʻeku manavaheé, naʻe kamata ke u talanoa mo e niʻihi kehé fekauʻaki mo e meʻa naʻá ku akó. ʻI heʻeku ʻohovalé, ko e talanoa ki he niʻihi kehé fekauʻaki mo e Tohi Tapú naʻá ne ʻai moʻoni au ke u loto-maʻu. Ko e talanoa ki he niʻihi kehé naʻá ne fakaivimālohiʻi ʻeku tuí tonu.”
4. Hoko ʻo anga-fakaʻapaʻapa
ʻI hono vahevahe ʻa e ongoongo leleí, ʻoua ʻe fakakaukau pē ki he meʻa ke leaʻakí kae toe pehē ki he founga te ke leaʻaki iá. Lau ʻa e 2 Tīmote 2:24 mo e 1 Pita 3:15, pea lāulea leva ki he ngaahi fehuʻi ko ení:
-
ʻE lava fēfē ke ke ngāueʻaki ʻa e ngaahi faleʻi ko ení ʻi he talanoa ki he kakaí fekauʻaki mo e Tohi Tapú?
-
ʻE ʻikai nai ke loto-tatau mo koe ʻa e ngaahi kāinga pe ngaahi kaumeʻa ʻe niʻihi. Ko e hā ʻe lava ke ke faí? Ko e hā ʻoku ʻikai totonu ke ke faí?
-
Ko e hā ʻe lelei ange ai ke ngāueʻaki ha ngaahi fehuʻi fakapotopoto kae ʻikai ko e tala ange ʻa e meʻa ke faí?
5. Ko hono vahevahe atu ʻa e ongoongo leleí ʻoku fakatupu fiefia
Naʻe ʻoange ʻe Sihova kia Sīsū ʻa e ngāue ke vahevahe ʻa e ongoongo leleí. Naʻe anga-fēfē vakai ʻa Sīsū ki he ngāue ko iá? Lau ʻa e Sione 4:34, pea lāulea leva ki he ongo fehuʻi ko ení:
-
Ko hono kai ʻa e meʻakai leleí ʻoku ʻai ai ke tau moʻui mo tau fiefia. Ko e hā naʻe fakahoa ai ʻe Sīsū hono fai ʻa e finangalo ʻo e ʻOtuá, ʻo kau ai hono vahevahe ʻa e ongoongo leleí, ki hono kai ʻa e meʻakaí?
-
Ko e hā ʻa e fiefia ʻokú ke fakakaukau ʻe maʻu mei hono vahevahe atu ʻa e ongoongo leleí?
ʻAhiʻahiʻi eni
-
ʻI he fakataha lolotonga ʻa e uiké, ako ki he ngaahi founga ʻe lava ke ke kamataʻi ai ha fetalanoaʻaki.
-
Talanoa ki hoʻo faiakó fekauʻaki mo e founga ʻe lava ke ke hoko ai ko ha tokotaha ako ʻi he fakataha lolotonga ʻa e uiké. ʻE tokoniʻi koe ʻe he ngaahi kongá ke ke ongoʻi mateuteu ange ke talanoa ki he niʻihi kehé fekauʻaki mo e meʻa ʻokú ke akó.
-
Ngāueʻaki ʻa e konga “ʻOku Pehē ʻe he Niʻihi” pe “ʻE ʻEke Nai ʻe ha Taha” ʻi he tohi ko ení ke teuteu ki he founga ke ke tali ai ʻa e fehuʻi anga-mahení mo e fakafepakí.
ʻE ʻEKE NAI ʻE HA TAHA: “Naʻá ke ʻi fē ai pē?”
-
Te ke ngāueʻaki fēfē ʻa e faingamālie ko ení ke tala ange ki ha taha fekauʻaki mo e meʻa kuó ke ako ʻi hoʻo ako Tohi Tapú?
FAKANOUNOU
Ko hono vahevahe ʻa e ongoongo leleí mo e niʻihi kehé ʻoku fakafiefia pea ʻoku faingofua pē ia.
Fakamanatu
-
Ko e hā ʻa e ʻuhinga lelei ke vahevahe ai ʻa e ongoongo leleí mo e niʻihi kehé?
-
ʻOku lava fēfē ke ke fai ia ʻi ha founga fakaʻapaʻapa?
-
ʻE lava fēfē ke ke ikuʻi ha manavasiʻi fekauʻaki mo e malangá?
AKO LAHI ANGE
Fakakaukau ki he founga faingofua ʻe fā ʻe lava ke ke vahevahe ai ʻa e ongoongo leleí ʻo ngāueʻaki ʻa e kaati fetuʻutaki jw.org.
Ako ki he ʻulungaanga ʻe fā ʻe lava ke ne tokoniʻi koe ʻi hono vahevahe ʻa e ongoongo leleí.
“ʻOkú Ke Mateuteu ke Toutai Tangata?” (Ko e Taua Leʻo, Sepitema 2020)
Sio ki he anga hono ʻomai ʻe ha faʻifaʻitakiʻanga ʻi he Tohi Tapú ʻa e loto-toʻa ki hono vahevahe ʻa e ongoongo leleí neongo kapau ʻoku tau kei siʻi.
Ako ki he founga ʻe lava ke ke talanoa ai fekauʻaki mo e Tohi Tapú mo ha kāinga kuo teʻeki ke nau ako fekauʻaki mo Sihova.
“Aʻu ki he Loto ʻo e Ngaahi Kāinga Taʻetuí” (Ko e Taua Leʻo, Maʻasi 15, 2014)
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
