SAMBIRU 22
Kumbi Mungachita Wuli Kuti Muyambepu Kupharazgiya Ŵanthu Uthenga Wamampha?
Po musambiriya yapa uneneska wa mu Bayibolu, mungaŵanaŵana kuti, ‘Weyosi wakhumbika kuyiziŵa nkhani yeniyi!’ Mbuneneska, weyosi wakhumbika nadi kuwuziŵa uneneska wa mu Bayibolu. Kweni panyaki mungachita mantha kukambiyaku ŵanthu vo musambira. Tiyeni tiwoni vo mungachita kuti muleki kuchita mantha ndipuso kuti muyambi kupharazgiya ŵanthu anyaki uthenga wamampha wa mu Bayibolu.
1. Kumbi mungachita wuli kuti mupharazgiyengeku anyinu vo musambira?
Akusambira aku Yesu angukamba kuti: “Isi tilekengepu cha kulongoro vinthu vo tikuwona ndi kuvwa.” (Machitidu 4:20) Yiwu awuyanjanga ukongwa uneneska ndipu akhumbisiskanga kukambiyaku ŵanthu anandi. Kumbi namwi mungayanja kukambiyaku anyinu? Asani ndi viyo, yesesani kusaniya mpata wakuti mukambiyeku ŵanthu a mu banja linu kweniso anyinu vo musambira.—Ŵerengani Akolose 4:6.
Masachizgu ngo ngangakuwovyani
-
Asani mucheza ndi mubali winu, yambisani nkhani ya mu Bayibolu mwakukamba kuti: “Ndasambira chinthu chinyaki chakukondwesa sabata yinu.”
-
Mungamukambiyaku lemba lakuchiska munyinu yo watama pamwenga wafipa mtima.
-
Asani anyinu wo mugwira nawu ntchitu atikufumbani za umoyu, mungaŵakambiyaku vo mwasambira pa sambiru la Bayibolu pamwenga ku maunganu.
-
Mungalongo anyinu webusayiti ya jw.org.
-
Mungaŵapempha kuti aŵepu namwi asani musambira Bayibolu, pamwenga mungaŵalongo mo angapemphe sambiru pa jw.org.
2. Ntchifukwa wuli mukhumbika kupharazgiya limoza ndi mpingu?
Akusambira aku Yesu apharazgiyanga ŵanthu wo aŵaziŵanga pe cha. Yesu wangutuma akusambira ŵaki “ŵaŵiŵaŵi kuti adanjiyepu mutawuni yeyosi” kuchipharazga. (Luka 10:1) Ntchitu yakupharazga yeniyi yinguchitika mwandondomeku ndipu yinguwovya ŵanthu anandi kuti avwi uthenga wamampha. Akusambira ŵaki angukondwa so ukongwa kupharazgiya limoza. (Luka 10:17) Kumbi namwi mungapharazgiya limoza ndi mpingu?
SAMBIRANI VINANDI
Wonani vo mungachita kuti muleki kuchita mantha kupharazga uthenga wamampha ndipuso wonani likondwa lo mungasaniya.
3. Yehova waŵengi namwi
Ŵanthu anyaki wo akhumba kwambapu kupharazga atopa chifukwa chakuŵanaŵaniya vo ŵanthu angakamba ndipuso mo angachiŵalondere.
-
Kumbi namwi mutopa kukambiyaku ŵanthu vo mwasambira? Ntchifukwa wuli mwamuka viyo?
Woneriyani VIDIYO, pavuli paki kambiskanani fumbu lo le mumphata.
-
Kumbi achinyamata wo tawona mu vidiyo anguchita wuli kuti amalani ndi mantha?
Ŵerengani Yesaya 41:10, pavuli paki kambiskanani fumbu ili:
-
Asani muchita mantha kupharazga, ntchifukwa wuli mukhumbika kupemphera kwaku Yehova?
Kumbi muziŵa?
Akaboni aku Yehova anandi pakwamba awonanga kuti angafiska cha kupharazgiya ŵanthu uthenga wamampha. Mwakuyeruzgiyapu, pakwamba Sergey wajideleranga ndipuso wasuzgikanga kukambiskana ndi ŵanthu. Kweni pavuli paki iyu wangusambira Bayibolu. Iyu wangukamba kuti: “Chinanga kuti ndenga ndi mantha, kweni ndingwambapu kukambiyaku ŵanthu vo ndasambiranga. Ndinguzizwa ukongwa kuti kukambiyaku ŵanthu uthenga wa mu Bayibolu kungundiwovya kuti ndileki kujikayikiya. Kweniso kwachitiskanga kuti ndivigomezgengi ukongwa vo ndasambiranga.”
4. Muchitengi vinthu mwaulemu
Asani mukhumba kupharazgiya munthu uthenga wamampha, mukhumbika kuŵanaŵaniya uthenga wo mukambengi ndipuso mo muwukambiyengi. Ŵerengani 2 Timote 2:24 ndipuso 1 Peturo 3:15, pavuli paki kambiskanani mafumbu yanga:
-
Kumbi mungazigwiriskiya wuli ntchitu fundu za mumavesi yanga asani mukambiyaku ŵanthu uthenga wa mu Bayibolu?
-
Kumbi mungachita wuli asani abali ŵinu anyaki ndipuso anyinu asuska vo mukamba? Nanga ndi vinthu wuli vo mukhumbika cha kuchita?
-
Ntchifukwa wuli mukhumbika kugwiriskiya ntchitu mafumbu mwazeru mumalu mwakuŵakambiya waka vo atenere kugomezga?
5. Munthu wakondwa asani wapharazga uthenga wamampha
Yehova wangupaska Yesu ntchitu yakupharazga uthenga wamampha. Kumbi Yesu wayiwonanga wuli ntchitu yeniyi? Ŵerengani Yohane 4:34, pavuli paki kambiskanani mafumbu yanga:
-
Asani titurya chakurya chamampha, tija ndi liŵavu lamampha ndipuso tikondwa. Ntchifukwa wuli Yesu wanguyeruzgiya kurya chakurya ndi kuchita khumbu laku Chiuta lo lisazgapu kupharazga uthenga wamampha?
-
Ntchifukwa wuli muwona kuti munthu wangakondwa chifukwa chakupharazga uthenga wamampha?
Vo vingakuwovyani
-
Pa maunganu nga mkati mwa sabata, kawoneni masachizgu ngo ngangakuwovyani kuti muyambi kukambiskana ndi ŵanthu.
-
Fumbani yo watikusambizani Bayibolu kuti mungachita wuli kuti namwi mulembesi kuti mukambengi nkhani pa maunganu nga mukati mwa sabata. Kukamba nkhani zenizi kungakuwovyani kuti mukambiskanengi umampha ndi ŵanthu vo musambira.
-
Kuti muwoni mo mungamukiya mafumbu nganyaki, mungagwiriskiya ntchitu masachizgu ngo ngasanirika muchigaŵa chakuti “Ŵanthu Anyaki Akamba Kuti” pamwenga chakuti “Munthu Munyaki Wangafumba Kuti.”
MUNTHU MUNYAKI WANGAFUMBA KUTI: “Mwasoŵa, mulipu?”
-
Kumbi mungawugwiriskiya wuli ntchitu mpata wenuwu kuti mumukambiyeku vo mwasambira mu Bayibolu?
KUMBI MWASAMBIRANJI?
Munthu wakondwa asani wagwira ntchitu yakupharazga uthenga wamampha. Chinanga kuti yingawoneka yakusuzga pakwamba, kweni asani wayambapu wawona kuti ntchitu iyi njipusu.
Kuweriyamu
-
Ntchifukwa wuli mukhumbika kukambiyaku anyinu uthenga wamampha?
-
Kumbi mungachita wuli venivi mwaulemu?
-
Kumbi mungachita wuli kuti muleki kuchita mantha kupharazga?
FUFUZANI
Wonani nthowa zinayi zambula kusuzga zo mungakambiyaku ŵanthu uthenga wamampha mwakugwiriskiya ntchitu kadi lakuziŵisa za jw.org.
Masachizu nga vo Mungakamba Pakugaŵiya Kadi Lakuziŵisa Ŵanthu za JW.ORG (1:43)
Wonani mijalidu yinayi yo yingakuwovyani pakupharazga uthenga wamampha.
“Kumbi Mwanozgeka Kuja Alovi a Ŵanthu?” (Chigongwi cha Alinda, September 2020)
Wonani mo nkhani ya mu Bayibolu yingatiwovye kuti tije ndi chiganga pakupharazga uthenga wamampha chinanga tingaŵa anamana.
Wonani vo mungachita kuti muyambi kukambiskana ndi abali ŵinu wo ŵechendasambirepu vakukwaskana ndi Yehova.
“Asani Abali Ŵinu Mbakaboni Cha” (Chigongwi cha Alinda, March 15, 2014)
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
