DJONDZO 22

U Nga Chumayelisa Ku Yini Mahungu Ya Ku Tsakisa?

CHAYA

Ku ta fikela swoswi se u djondze minchumu ya yinyingi ka Bibele, swi nga ha yentxeka u pimisa leswi: ‘Hinkwavu va fanele va swi tiva leswi ni nga swi djondza.’ I ntiyiso va fanele va swi tiva kambe swi nga yentxeka u chava ku va byela leswi u nga swi djondza. A hi voni swaku u nga ku hlulisa ku yini ku chava u tlhela u sungula ku byela van’wana hi mahungu ya ku tsakisa lawa ma nga ka Bibele.

1. U nga va byelisa ku yini vanhu lava u va tivaka hi leswi u swi djondzaka?

Vadjondzisiwa va Yesu va te: “Hina a hi nge tshiki ku vulavula hi leswi hi nga swi vona ni leswi hi nga swi twa.” (Mintirho 4:20) Vona a va wu rhandza hintamu ntiyiso lakakuva a va wu byela vanhu hinkwavu. Na wena u titwisa xileswo? Loko u titwisa xileswo pimisa hi leswi u nga swi yentxaka swaku u vulavula hi ndlela ya xihlonipho loko u byela maxaka ya wena ni vanghanu va wena hileswi u nga swi djondza. — Lerha Vakolosa 4:6.

Vona swin’wana leswi nga ku pfunaka ku sungula ku chumayela

Loko u bula ni maxaka sungula ku vulavula hi Bibele hi ku va byela leswi: “Ni djondze minchumu ya ku tsakisa vhiki leli.”
Kombisa ndzimana ya Bibele leyi tiyisanaka ka munghanu lweyi a vabyaka kumbe lweyi a karhatekaka.
Loko vakolega va wena va ku vutisa swaku u yentxe yini hi ku hela ka vhiki va byeli leswi u nga swi djondza ka djondzo ya wena ya Bibele kumbe ka mintlhanganu.
Komba vanghanu va wena site la jw.org.
Rhamba van’wana ka djondzo ya wena ya Bibele kumbe ku va komba leswi va nga kombelisaka xiswona djondzo ya Bibele hi ku tirhisa site la jw.org.

2. Hi mhaka muni swi li swa lisima ku chumayela ni bandla?

Valandzeli va Yesu a va yo chumayela mahungu ya ku tsakisa ka vanhu lava a va va tiva ntsena. Yesu a va rhume swaku “va famba hi vambirhi vambirhi . . . va ya ka madoropa” swaku va ya chumayela. (Luka 10:1) Machumayelelo lawa ma yentxe swaku vanhu va vanyingi va twa mahungu ya ku tsakisa, nakambe ku chumayela xikan’we swi yentxe swaku vadjondzisiwa va Yesu va tsaka. (Luka 10:17) Swi ngo yini na wena u tinyimisela ku chumayela ni bandla?

DJONDZA SWIN’WANA

Vona swaku u nga ku hlulisa ku yini ku chava u tlhela u tsaka hi ku chumayela mahungu ya ku tsakisa.

3. Yehovha a ta ku pfuna

Vanhu van’wana lava lavaka ku chumayela va chava hi ku pimisa leswi vanhu va nga ta va yamukelisa xiswona kumbe ku va yangulisa xiswona.

Wa chava ku bulela van’wana hi leswi se u nga swi djondza? Loko u chava, hi mhaka muni?

Sixtirani VHIDIYO, mi gama mi bula hi xivutiso lexi landzelaka.

VHIDIYO: Ni Khongele Ka Yehovha Ni Kombela Swaku A Ni Tiyisa (4:05)

Majovhem lawa ya Timboni ta Yehovha ma ku hlulise ku yini ku chava?

Lerhani Esaya 41:10, mi gama mi bula hi xivutiso lexi landzelaka:

Loko u chava ku chumayela, ku khongela swi nga ku pfunisa ku yini?

Indje a wu swi tiva?

Timboni ta Yehovha ta tinyingi a ti pimisa swaku a ti nge tshuki ti swi kotile ku chumayela, hi xikombiso Sergey a a titwa na a nga pfuni nchumu naswona a swi mu karhatela ku vulavula ni vanhu van’wana, kambe a game a sungula ku djondza Bibele. Yena a li: “Hambileswi a ni chava ni sungule ku vulavula ni vanhu van’wana hi leswi a ni swi djondza. Xa ku hlamalisa hi swaku leswo swi ni pfune ku kala ni nga ha chavi nchumu. Naswona ku byela van’wana hi leswi a ni swi djondza swi tiyise lipfumelo la mina.”

4. Kombisa xihlonipho

Loko u chumayela vanhu mahungu ya ku tsakisa pimisa hi leswi u nga ta va byela swona ni ndlela leyi u nga ta va byela hi yona. Lerhani 2 Timotiyu 2:24 na 1 Pedru 3:15, mi gama mi bula hi swivutiso leswi landzelaka:

U nga ti tirhisisa ku yini tindzimana leti loko u bula ni van’wana hi Bibele?
Swi nga yentxeka maxaka ya wena kumbe vanghanu va nga swi pfumeli leswi u va byelaka. U nga yentxa yini? Naswona i mpsini leswi u kalaka u nga fanelanga u swi yentxa?
Hi mhaka muni swi li swinene ku vulavula na vona hi xihlonipho ku tlula ku va sindzisa swaku va pfumela leswi u swi kholwaka?

5. Ku byela van’wana mahungu ya ku tsakisa swi hi yentxa hi tsaka

Yehovha a nyike Yesu ntirho wa ku chumayela mahungu ya ku tsakisa. Yesu a a wu vonisa ku yini ntirho lowu? Lerhani Yohani 4:34, mi gama mi bula hi swivutiso leswi landzelaka:

Ku dla swakudla swa swinene swa hi pfuna naswona swi hi yentxa hi tsaka, leswo swi nga fanisiwa ni ku yentxa ku rhandza ka Xikwembu loku ku patsaka ni ntirho wa ku chumayela mahungu ya ku tsakisa. Se hi mhaka muni Yesu a fananise ku yentxa ku rhandza ka Xikwembu ni ku dla swakudla?
Hi mhaka muni u pimisa swaku ku chumayela mahungu ya ku tsakisa swi nga hi yentxa hi tsaka?

U nga yentxa yini

Ka mintlhanganu ya xikarhi ka vhiki vona leswi u nga swi djondzaka swaku u sungula ku bula ni van’wana hi mahungu ya ku tsakisa.
Pimisa hi ku nyikela vito la wena swaku u veka minkombiso ka mintlhanganu ya xikarhi ka vhiki. Minkombiso leyo yi ta ku pfuna swaku u nga chavi ku vulavula ni van’wana hi leswi u swi djondzaka.
Tirhisa swivutiso leswi kumekaka ka buku leli, ka kwadru leli nge: “Van’wana Va Li”, kumbe leli nge: “Vanhu Van’wana Va Nga Ha Ku Vutisa Va Ku” swaku u tilunghiselela ku hlamula swivutiso leswi vanhu van’wana va tolovelaka ku swi yentxa.

VANHU VAN’WANA VA NGA HA KU VUTISA VA KU: “U ni ta nyuwani?”

Loko va ku vutisa leswo u nga yentxisa ku yini swaku u va byela leswi u nga swi djondza ka Bibele?

LESWI HI NGA SWI DJONDZA

Ku vulavula ni van’wana hi mahungu ya ku tsakisa a swi chavisi naswona swi hi yentxa hi tsaka.

Ku kambela leswi hi nga swi djondza

Hi mhaka muni hi chumayela mahungu ya ku tsakisa?
U nga chumayelisa ku yini hi ndlela ya xihlonipho?
U nga ku hlulisa ku yini ku chava swaku u chumayela mahungu ya ku tsakisa?

Ni hete djondzo leyi hi diya:

Zama ku yentxa leswi

Pimisa hi munhu lweyi u nga mu chumayelaka mahungu ya ku tsakisa. Pimisa hi leswi u nga ta mu byela swona, leswi u nga ta mu byelisa xiswona ni nkama lowu u nga ta mu byela hi wona.

Swin’wana:

Swin’wana leswi u nga swi fikelelaka