JORHENGUARHIKUA 22
¿Nénajtsï uaa chá aianhpini ambakiti aianhperakueri ambe?
Ambe engajtsï jorhenguarhini jaka Bibliaeri ambe, jamberijtsï eratsejka: “¡Iámindu kʼuiripuechaksï jatsipirindi para míteni i ambe!”. Ka ísïisti, iáminduechaksï jatsisti para míteni ini ambe. Peru jamberijtsï chéni pʼikuarheraaka aianguani máteruechani ambe engajtsï jorhenguarhini jaka. Ju je exeni ambejtsï uaa úni parajtsï nóteru chéni pʼikuarherania ka ueenantsï tsitini aianguani máteruechani ambakiti aianhperakuani enga Biblia jorhentpijka.
1. ¿Nénajtsï uaa aianguani ambe engajtsï jorhenguarhini jaka imeechani engajtsï chá míteaka?
Jesúsiri chúxapatichaksï uandaspti: “Jucha nómindu uaaka no uandantani engachi exeka ka kurhandini” (Ukuecha 4:20). Ka jimbokaksï kánikua jukaparharasïreenga jurhimbikua Bibliaeri ambe, uékasïrendiksï iáminduechani aianguani. ¿Chájtsï májkueni pʼikuarherasïni? Jiájkani, jánguarhinta je aianguani janhanharhikua jingoni chaari parientichani ka amiguechani imeeri ambe engajtsï jorhenguarhini jaka (arhinta je Kolosasi 4:6).
Máru ambe engajtsï uaaka úni
-
Parajtsï ueenani uandontskuarheni Bibliaeri ambe parienti ma jingoni, uaakajtsï arhini “I semana jorhenguarhiska ambe ma enga kánikua jukaparhakueka”.
-
Enga chaari amigu ma pʼamenchani jauaka o uandanhiani jarhani, arhikunta je tekstu ma enga uinhaperantaaka.
-
Engaksïni ánchikuarhitarhu, chaari kompanieruecha kurhamarhiaka nénaksïni nicheski i fini de semana, aiangua je ambe ma engajtsï jorhenguarhika Bibliaeri jorhenguarhikuarhu o tánguarhikuarhu.
-
Exeraa je chaari amiguechani pájinani internetiri jw.org.
-
Pʼímarhia je máteruechani paraksï chánksïni jingoni jarhani jiáni engaksïni niuaka jorhendani Bibliaeri ambe o exeraa je nénaksï uaa kurhajkuarhini Bibliaeri jorhenguarhikua ma pájinarhu jw.org.
2. ¿Andisï xáni jukaparhakue eskajtsï jánguarhintaaka uérani aianhpini kúnguarhikua jingoni?
Jesúsiri chúxapatichaksï no solu aianguaspti ambakiti aianhperakuani imeechani engaksï míteapka. Jesúsi axaaspti “tsimandani, ka ísï axaaspti para eskaksï nipiringa orhepani iápuru iretecharhisï” parakaksï jimeesïsï aianhpepiringa (Lukasʌ 10:1). Ísï eska Jesúsi na axaapka, kánikua marhuaspti parakaksï uánikua kʼuiripuecha kurhaapiringa ambakiti aianhperakuani. Ka ístuksï Jesúsiri chúxapaticha sési pʼikuarheraspti márku aianhpini (Lukasʌ 10:17). ¿Ka nájtsï exesïni parajtsï chájtu jánguarhintani uérani aianhpini kúnguarhikua jingoni?
JORHENGUARHI JE SÁNDERU AMBE
Ju je exeni ambeksïni uaa jarhuatani parajtsï no chéni ka tsípini pʼikuarherani aianhpini ambakiti aianhperakuani.
3. Tata Diosï Jeoba chánksïni jingoni jauati
Máru kʼuiripuecha engaksï uéjka aianhpini, uandanhiasïndiksï ambe engaksï kʼuiripuecha uandaaka o ambe engaksï eratseaka imeecheri ambe.
-
Ka chaia, engajtsï eratsejka uandontskuarhekuani máteruechani ima ambeeri engajtsï jorhenguarhini jaka, ¿chéntsï pʼikuarherasïni o nómbe? ¿Andi?
Exe je BIDEUNI ka uandontskuarhi je íri ambe:
-
Eska na xarharajka bideurhu, ¿i tumbiichaksï ambe úspi paraksï nóteru chéni pʼikuarherania?
Arhinta je Isaías 41:10 ka uandontskuarhi je íri ambe:
-
¿Andijtsïsï jatsi para kómarhini Tata Diosïni engajtsï chéaka aianhpini?
¿Mítespijtsï ini ambe?
Uánikuecha engaksï iásï Jeobaeri testiguekia, eratsesïrendiksï eskaksï no méni úpiringa aianhpini. Ma acheeti enga Sergey arhinhajka ísï pʼikuarherasïrendi enajki no ma ambe jukaparhapi ka kánikua úkua jukanchasïrendi máteruecha jingoni uandontskuarheni. Peru ma jurhiani ueenaspti jorhenguarhini Bibliaeri ambe. Ima uandantasïndi: “Nájkirukani chéni pʼikuarherenga jánguarhintaspka aianguani máteruechani ambe engani jorhenguarhini japka. Ískurini pakataspti engani kuenta íntskukuarhepka eskani úsïreenga uandontskuarhekuani máteruechani Bibliaeri ambe ka engani aianguauenga máteruechani ambe engani jakajkujka úspti eskani sánderu mintsikapiringa Tata Diosïni”.
4. Janhanharhikua jingoni uandontskuarhekua je máteruechani
Ante dejtsï nemani aianguni Bibliaeri ambe, asï imani ambejku eratsi je ambe engajtsï uandaaka, sino ístu na engajtsï arhiaka. Arhinta je 2 Timoteo 2:24 ka 1 Pedru 3:15, ka uandontskuarhi je íri ambe:
-
¿Nénajtsï úpirini ísï úni eskaksï na arhijka i tekstuecha engajtsï uandontskuarhekuauaka máteruechani Bibliaeri ambe?
-
Jamberiksï máru chaari parienticha o amiguecha no májkueni eratseati eska chá. ¿Ambejtsï uaa úni? ¿Ka ambejtsï no jatsipirini para úni?
-
¿Andisï sánderu sésii janhanharhikua jingoni uandontskuarhekuani parientichani ka no arhiani ambe engaksï jatsiska para jakajkuni?
5. Aianhpini ambakiti aianhperakuani úsïndi eskachi tsípikua jingoni irekaaka
Jeoba, Jesúsini jurajkukuspti ánchikuarhitani para aianhpini ambakiti aianhperakuani. ¿Jesúsi néna exesïreni ini ánchikuarhitani? Arhinta je Juanu 4:34 ka uandontskuarhi je íri ambe:
-
Imani ambe arhani engajtsïni marhuachejka, úsïndi eskachi tsípiti jauaka ka eskachi sési pʼikuarheraaka. ¿Andisï uandapi Jesúsi eska úni ambe enga Tata Diosï uéjka, komu aianhpini, ísïiska komueska tʼireni?
-
Nájtsï exesïni, ¿nénajtsï pʼikuarheraa engajtsï aianguauaka máteruechani ambakiti aianhperakuani?
Ambe engajtsï uaaka úni
-
Tánguarhikuarhu enga entre semana jimbo jarhajka, exe je na engajtsï uaaka ueenani uandontskuarhekuani máteruechani.
-
Uandontskuarhi je imani jingoni engaksïni Bibliaeri ambe jorhendajka ima ambeeri engajtsï jatsika para úni parajtsï nitamatarani parti ma tánguarhikuarhu enga entre semana jimbo jarhajka. I partichaksïni jarhuataati sánderu sési preparadu jarhani parajtsï uandontskuarhekuani máteruechani ima amberi engajtsï jorhenguarhini jaka.
-
Úra je particha “Máruksï i ambe uandasïndi” ka “Máruksï i ambe kurhanguarhisïndi” engaksï i librurhu jaka parajtsï ensaiarini na engajtsï uaaka mókuantani imani kurhamarhikuechani engaksïni kʼuiripuecha úchiauaka ka ójkutakuechani engaksï uandaajka.
MÁRUKSÏ I AMBE KURHANGUARHISÏNDI: “¿Nájtsï jámaxaki? ¿Náksïni nichexaki?”.
-
¿Nénajtsï úpirini ini ambe úrani parajtsï ueenani aianguani ambe engajtsï jorhenguarhikia Bibliaeri jorhenguarhikuarhu?
AMBE ENGACHI JORHENGUARHIKA
Aianguani máteruechani ambakiti aianhperakuani, úsïndi eskachi tsípikua jingoni irekaaka ka ueenani ísï úni, jamberi sánderu fásiliisti eskajtsï na eratsejka.
Ambejtsï jorhenguarhiski
-
¿Ambeksïni uaa jarhuatani parajtsï ueenani aianhpini ambakiti aianhperakuani?
-
¿Nénajtsï uaa janhanharhikua jingoni aianhpini?
-
¿Ambejtsï uaa úni parajtsï nóteru chénia aianhpini?
ÍSTU EXE JE INI AMBE
Exe je tʼámu ambe parajtsï úni aianhpini úraparini tarjeta para jw.org inchani.
Exe je tʼámu ambe engaksïni uaaka jarhuatani para aianhpini ambakiti aianhperakuani.
“¿Uékasïntsï aianhpiri máeni?” (Aianhpiri, septiembri de 2020)
Exe je Bibliaeri uandantskua ma engajtsïni jarhuatajka balori jatsini para aianhpini nájkirukachi sapichkueuaka.
Arhinta je na engajtsï uaaka uandontskuarheni Bibliaeri ambe chaari parienticha jingoni engaksï nótki mítejka Tata Diosï Jeobani.
“Néna mintsitarhu niárakuani familiarichani engaksï no jakajkutiika” (Aianhpiri, 15 de marsu de 2014)
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
