MATAUPU 22

E Mafai Pefea o Fakaasi Atu ne Koe a te Tala ‵Lei?

FAKATAGI/PEI

I te taimi e tauloto ei koe ki muna‵tonu mai te Tusi Tapu, kāti ka mafaufau koe, ‘E ‵tau o iloa ne tino katoa te mea tenei!’ E tonu, e ‵tau o iloa ne tino katoa a te mea tenā! Kae kāti ka polepole koe ma fakailoa atu au mea ne tauloto ki nisi tino. Ke onoono tatou ki auala ke fai ei ke galo te polepole tenā kae kamata o fakaasi atu mo te fiafia a te tala ‵lei mai te Tusi Tapu.

1. E mafai pefea o fakailoa atu ne koe au mea ne tauloto ki tino e masani mo koe?

Ne fai mai a soko o Iesu: “E se mafai eiloa o fakagata te mā fai‵pati ki mea ko oti ne lavea kae lagona ne māua.” (Galuega 4:20) Ona ko te fakatāua malosi ne lāua te munatonu, ne ma‵nako foki lāua ke folafola atu ki tino e tokouke e fetaui mo lāua. E mata, e penā foki ou lagonaga? Kafai e penā loa, ‵sala ki avanoaga ke mafai o fakaasi atu ne koe mo te āva ki ou kāiga mo taugasoa au mea ko oti ne tauloto.—Faitau te Kolose 4:6.

Nisi auala ke kamata ei

Kafai ko faipati atu ki ou kāiga, ke kamata te sau‵talaga ki se mataupu faka-te-Tusi Tapu mai te fai atu penei: “E isi se mea gali ne tauloto ne au i te vaiaso nei.”
Fakaasi atu se tusi faitau fakamalosi ki se taugasoa telā e masaki io me manavase.
Kafai e fesili atu se tino i te galuega me ne a mea ‵tupu ki a koe i te vaiaso, fai atu ki ei au mea ne tauloto mai tau akoga faka-te-Tusi Tapu io me mai se fakatasiga a te fakapotopotoga.
Fakaasi atu ki ou taugasoa a te ‵tou fakatuatusi ko te jw.org.
‵Kami mai a nisi tino ke ‵kau mai ki tau akoga faka-te-Tusi Tapu io me fakaasi atu te auala e mafai o fakamolemole latou ke fai se akoga i luga i te jw.org.

2. Kaia e fai ei a te talai fakatasi mo te fakapotopotoga pelā me se fakamoemoega tāua ke kausaki ki ei?

E uke atu a mea ne fai ne soko o Iesu i tafa o te folafola atu fua te tala ‵lei ki tino ne iloa ne latou. Ne uga ne Iesu a latou “taki tokolua ke ‵mua i a ia ki fakai katoa” o talai i ei. (Luka 10:1) A te auala ne fakatoka faka‵lei ei a te galuega talai tenā ne fai ei ke maua ne tino e tokouke a te avanoaga ke lagona ne latou a te tala ‵lei. E se gata i ei, a te talai fakatasi atu ne fai ei ke fia‵fia malosi a te kau soko. (Luka 10:17) E mata, e mafai foki o kausaki atu koe ke talai fakatasi mo te fakapotopotoga?

KELI MALOSI IFO

Mafaufau ki auala e mafai o manumalo koe i te polepole malosi kae maua te fiafia mai te talai atu o te tala ‵lei.

3. Ka fakatasi atu a Ieova ki a koe

A nisi tino kolā e ma‵nako o talai e mafai o pole‵pole ona ko kilokiloga a tino ki a latou io me māfai ko kaitāua mai a tino i te galuega talai.

E mata, e polepole koe ma fakaasi atu au mea ne tauloto? Kaia e fai mai koe penā?

Pei te VITIO, ko sau‵tala ei ki te fesili tenei.

VITIO: Ne ‵Talo Au ki a Ieova ke Maua te Loto Malosi (4:05)

Ne manumalo pefea a talavou Molimau konei i te lotou ma‵taku?

Faitau te Isaia 41:10, ko sau‵tala ei ki te fesili tenei:

Kafai e mataku koe ma talai atu ka fesoasoani atu pefea a ‵talo ki a koe?

E iloa ne koe?

E tokouke a Molimau a Ieova ne mafau‵fau me e se mafai eiloa o folafola atu ne latou a te tala ‵lei ki nisi tino. E pelā mo Sergey, ne mafaufau me seai sena mea e mafai o fai kae faigata foki ke fesokotaki a ia ki tino. Kae oti aka, ne sukesuke a ia ki te Tusi Tapu. Ne fai mai a ia: “Faitalia te mataku, ne kamata o faipati au ki nisi tino e uiga ki aku mea ne tauloto. Ne poi aka au me i te faipati atu ki nisi tino e uiga ki te Tusi Tapu ne fai ei ke lasi toku loto talitonu ki a au eiloa, ne fai foki ei ke ‵mautakitaki oku talitonuga ‵fou i loto i toku loto.”

4. Ke faipati mo te āva

Kafai ko fakailoa atu a te tala ‵lei ke mo a ma mafaufau fua ki au pati ka fai kae ke mafaufau foki ki te auala ka fai atu ei. Faitau te 2 Timoteo 2:24 mo te 1 Petelu 3:15, ko sau‵tala ei ki fesili konei:

E fakagalue aka pefea ne koe a fuaiupu konei māfai ko faipati atu ki nisi tino e uiga ki te Tusi Tapu?
E mafai o se lotoma‵lie ou kāiga io me ko ou taugasoa ki a koe. Ne a au pati ka fai atu? Ne a mea e se ‵tau o fai ne koe?
Kaia e ‵lei atu ei ke fakaaoga a fesili mo te atamai i lō te pati ‵toko atu o latou?

5. A te fakailoa atu o te tala ‵lei ka maua ei te fiafia

Ne tuku ne Ieova ki a Iesu a te galuega ke fakailoa atu a te tala ‵lei. Ne kilo atu pefea Iesu ki te galuega tenā? Faitau te Ioane 4:34, ko sau‵tala ei ki fesili konei:

A te kai ki meakai ‵lei e fai ei ke tumau tatou i te ola kae ke fia‵fia. Kaia ne fakatusa ei ne Iesu a te faiga o te loto o te Atua—e aofia ei te fakailoa atu o te tala ‵lei—ki te kai ki meakai?
Se a tau faka‵tau, ne a mea fakafia‵fia e mafai o maua mai te folafolaatuga o te tala ‵lei?

Manatu

I te fakatasiga i te vaiaso, ‵sala ki auala kolā e mafai ei o kamata ne koe a sau‵talaga.
Ke mafaufau o kau ki te akoga i fakatasiga i te vaiaso. Ka fesoasoani mai a tofiga kolā ka tuku atu ki a koe ke fakatoka ei koe ke folafola atu au mea ne tauloto ki nisi tino.
Ke fakaaoga te vaega ko te “Mea e Fai Mai ne Nisi Tino” io me “Kāti ka Fesili Mai se Tino” ke fakaakoako ei koe ki te auala ke tali atu ki fesili io me ko manatu ‵teke masani mai nisi tino.

KĀTI KA FESILI MAI SE TINO: “E isi ne au tala ‵fou?”

Ka fakaaoga pefea ne koe te avanoaga tenei ke fakailoa atu ki te tino au mea ne tauloto mai tau akoga faka-te-Tusi Tapu?

MANATU AOGA

A te folafolaatuga o te tala ‵lei ki nisi tino e maua ei te fiafia, kae kāti e faigofie fua i lō te mea telā e mafaufau koe ki ei.

Fesili

Kaia e ‵tau ei o folafola atu a te tala ‵lei ki nisi tino?
E fai pefea ne koe te mea tenā i se auala āva?
Ne a au mea e mafai o fai ke se polepole koe māfai ko talai atu?

Taimi ne oti ei te mataupu:

Mea e Mafai o Fai

Mafaufau ki se tino telā e mafai o folafola atu ne koe ki ei a te tala ‵lei. Mafaufau ki au pati ka fai, te auala ke fai atu ei, mo te taimi ke faipati atu ei koe.

Nisi mea:

Nisi mea e mafai o fai ne koe