LIJIGANYO 22
Ana Mpaka Alalichile Chamtuli Ngani Syambone?
Pakulijiganya yindu yisyesyene yajikusajiganya Baibulo, mpaka aganisyeje kuti, ‘jwalijose akusosekwa kulijiganyatu yeleyi.’ Kusala yisyene jwalijose akusosekwa kumanyilila yakulijiganya wawojo. Nambo mwine mpaka akoleje woga kuti ŵasalile ŵane yakulijiganyayo. Kwende tukambilane yampaka atende kuti akakolaga woga soni yampaka atende kuti atande kwasalila ŵane ngani syambone sya m’Baibulo.
1. Ana ŵandu ŵakwamanyilila mpaka ŵasalile chamtuli yalijiganyisye?
Ŵakulijiganya ŵa Yesu ŵatite: “Uwe ngatuleka kuŵecheta yele yitwayiweni ni kuyipikana.” (Masengo 4:20) Jemanjaji ŵayinonyelega yaŵalijiganyaga kutyochela kwa Yesu, mwamti ŵaliji ŵakusachilila kwasalila ŵane yalijiganyisyeyo. Ana wawojo akusasakasoni ali mkwasalila ŵane yalijiganyisye? Naga yili myoyo, apateje ndaŵi jakwasalila ŵamwiŵasa mwawo soni achimjawo yindu yalijiganyisye, nambo atendeje yeleyo mwakwachimbichisya.—Aŵalanje Akolose 4:6.
Mwampaka atandile kambilana
-
Pakukunguluka ni jwamwiŵasa mwawo, amsalile ngani jine ja m’Baibulo. Mpaka atande chamti myi: “Yanalijiganyisye wiki ajino yili yakusangalasya.”
-
Mpaka amŵalanjile lilemba lyakulimbikasya mjawo jwakulwala kapena jwakulaga nganisyo.
-
Mundu jwakwawusya ya umi wawo, kombolekasoni kumsalila yindu yalijiganyisye palijiganyo lya Baibulo kapena pamisongano jampingo.
-
Ŵalosyeje achimjawo webusayiti ja jw.org
-
Ŵaŵendeje ŵane kuti aŵe nawo yalumo pa lijiganyo lya Baibulo, kapena ŵalosye yampaka atende kuti aŵende lijiganyo pa jw.org.
2. Ligongo chichi akusosekwa kola chakulinga chakulalichila yimpepe ni mpingo?
Ŵakulijiganya ŵa Yesu nganagambaga kulalichila ngani syambone kwa ŵandu ŵakwamanyililape. Yesu ‘ŵatumilesoni ŵaŵili ŵaŵili kumusi uliwose’ kukulalichila. (Luka 10:1) Kulalichila mu litala lyeleli kwakamuchisye ŵandu ŵajinji kuti asipikane ngani syambone. Konjechesya pelepa, ŵakulijiganyaŵa ŵasangalalaga ligongo lyakuti ŵaŵaga yalumo pakulalichilapo. (Luka 10:17) Ana uli nombe nawo ngakola chakulinga chakuti alalichileje yalumo ni mpingo?
KULIJIGANYA YEJINJI
Kwende tulijiganye yampaka atende kuti akakolaga woga mnope soni kuti apate chisangalalo chachikusayika ligongo lyakulalichila ngani syambone.
3. Yehofa chachakamuchisya
Ŵane mpaka alepeleje kulalichila ligongo lyakwajogopa ŵandu soni yindu yampaka asimane nawo pakulalichilapo.
-
Ana wawojo akusajogopa kwasalila ŵane yindu yalijiganyisye? Asale ligongo lyakwe?
Alolele FIDIYO, kaneko akambilane chiwusyo achi.
-
Ana ŵachinyamata ŵa Mboniŵa ŵatesile yamtuli kuti amalane ni woga?
Aŵalanje Yesaya 41:10, kaneko akambilane chiwusyo achi:
-
Ana lipopelo mpaka lyakamuchisye chamtuli pakogopa kulalichila?
Ana akumanyilila?
Ŵa Mboni sya Yehofa ŵajinji ŵayiwonaga kuti nganaŵa akombwele kulalichila. Mwachisyasyo, Sergey, jwaliwonaga kuŵa jwangali mate soni yamsawusyaga kuŵechetana ni ŵandu. Nambo ali atandite kulijiganya Baibulo, jwatite, “Atamose kuti naliji jwawoga, nambope natandite kwasalila ŵane yanalijiganyagayo. Yakusangalasya mnope yaliji yakuti, kwasalila ŵane ya m’Baibulo kwangamuchisye kuti mbe jwakulimba mtima soni kuti ngole chikulupi chakulimba.”
4. Ŵachimbichisyeje ŵane
Pakulalichila ngani syambone akagambaga kuganichisya yachakaŵechete nambo aganichisyesoni muchakaŵechetele. Aŵalanje 2 Timoteo 2:24; soni 1 Petulo 3:15, kaneko akambilane yiwusyo ayi:
-
Ana mpaka akamulichisye masengo chamtuli malembaga pakuŵecheta ni ŵane ya m’Baibulo?
-
Ana akusosekwa kutenda chichi ŵamwiŵasa mwawo soni achimjawo pakwasisya? Nambi ni yapi yangakusosekwa kutenda?
-
Ligongo chichi mpaka yiŵe yambone kwawusya ŵandu yiwusyo mwalunda kulekangana ni kwambaga kwasalila yakutenda?
5. Kulalichila ngani syambone kukusatukamuchisya kuŵa ŵakusangalala
Yehofa ŵampela Yesu masengo gakulalichila ngani syambone. Nambo, ana Yesu ŵagawonaga mwamtuli masengoga? Aŵalanje Yohane 4:34, kaneko akambilane yiwusyo ayi:
-
Kulya yakulya yambone kukusakamuchisya kuti tukole umi wambone soni kuti tusangalaleje. Ana ligongo chichi Yesu jwasasile kuti kutenda yakusasaka Mlungu, yayikupwatikapo kulalichila, kuli mpela chakulya?
-
Ana kulalichila ngani syambone mpaka kumkamuchisye chamtuli mundu kuŵa jwakusangalala?
Yampaka Yakamuchisye
-
Pali pamsongano wamkati mwa wiki alijiganye yampaka yakamuchisye kuti atende kukunguluka ni ŵandu.
-
Amwusye mundu jwakwajiganya kuti ŵasalile yampaka atende kuti ŵapeje mbali pamsongano wamkati mwa wiki. Kolaga mbali pamsonganowu mpaka kwakamuchisye kuti akomboleje kwasalila ŵane yindu yakulijiganya.
-
Akamulichisyeje masengo mbali sya bukuji syakuti, “Yakusaŵecheta Ŵandu Ŵane” kapena “Jwine Mpaka Ŵawusye Kuti,” ni chakulinga chakuti ŵajanjeje ŵakwawusya soni ŵakwasisya.
JWINE MPAKA ŴAWUSYE KUTI: “Ana kusoŵaku ŵaliji kwapi?”
-
Ana mpaka akamulichisye masengo chamtuli upile welewu kumsalila mundu yalijiganyisye pa lijiganyo lya Baibulo?
YALIJIGANYISYE
Kulalichila ngani syambone kukusatukamuchisya kuŵa ŵakusangalala. Nambosoni patandite kulalichila chachiyiwona kuti yili yangasawusya.
Yiwusyo Yakuwilisya
-
Ligongo chichi akusosekwa kwasalilaga ŵane ngani syambone?
-
Ana mpaka ŵasalile ŵane chamtuli ngani syambone mwakwachimbichisya?
-
Ana mpaka atende yamtuli kuti amalane ni woga pamasengo gakulalichila?
YAKULINGA YINESONI
Aganichisye matala mcheche gampaka akuye pakusaka kwasalila ŵane ngani syambone pakamulichisya masengo kadi ja jw.org.
Alijiganye ndamo mcheche syampaka syakamuchisye kuti alalichile ngani syambone.
“Ana Akoseche Kuŵa Jwakulalichila?” (Sanja ja Mlonda, Sepetemba 2020)
Alolele chisyasyo cha m’Baibulo champaka chakamuchisye kuŵa ŵakulimba mtima kuti alalichile ngani syambone atamose kuti ali mwanache.
Alole yampaka atende kuti akambilane ya m’Baibulo ni ŵandu ŵamwiŵasa mwawo ŵangakummanyilila Yehofa.
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
