DILONGI 22
Buidi Ngie Wulenda Samunina Zitsangu Zimboti?
Bo wumbuela longuka kiedika ki Kibibila, ngie wulenda yindula: ‘Baboso mvandi bafueti zaba kiedika akiki!’ Bukiedika, batu boso bafueti zaba mawu. Vayi kheti bobo, ngie wulenda ba boma bu kuzabikisa bankaka mambu moso widi mu kulonguka. Mu kibila akiokio, tuemmona buidi wulenda nungina boma widi ayi kubaka mayangi bo wunzabikisa bankaka zitsangu zimboti zidi mu Kibibila.
1. Buidi wulenda samunina batu boso mambu widi mu kulonguka?
Minlandikini mi Yesu batuba: “Tulendi bika ko kutuba mambu tumona ayi tuyuwa.” (Mavanga 4:20) Bawu bazola beni kiedika balonguka ayi baba tomba kuzabikisa kiawu kuidi batu bawombo. Buawu ngie mvaku wunyindudilanga? Boti buawu, mu lukinzu wulenda sadila luaku widi muingi kulonga basi dikanda diaku ayi bakundi baku mambu widi mu kulonguka mu Kibibila.—Tanga Kolosai 4:6.
Tala mua mambu wufueti vanga
-
Bo wunkolula na basi dikanda diaku ngie wulenda tubila abubu: “Yilongukizi diambu dinkiza mu sabala ayiyi.”
-
Monisa matangu ma Kibibila malenda bomba nkundi’aku widi mu kubela voti widi mu kukuazuka.
-
Bo batu bansalanga yaku bakukuvula, buidi wuviokisidi tsuka sabala? Wuba zabikisa mambu wulongukidi mu ndongukulu’aku yi Kibibila voti mambu wulongukidi mu lukutukunu.
-
Monisa kuidi bakundi baku khond’itu mayo dilongi didi mu jw.org.
-
Wuba tumisa muingi balandakana ndongukulu’aku yi Kibibila voti wulenda basudikisa buidi balenda dindila ndongokulu yi Kibibila mu jw.org.
2. Kibila mbi kusamuna va kimueka na kimvuka madi makani mamboti?
Minlandikini mi Yesu basa vanga ko to mangolo ma kusamuna kuidi batu bazaba, vayi mvandi basamunina mu phila yisulama mu khambu divunza. Yesu “wufila minlandikini miandi muingi kue samuna buadi buadi mu mavula moso”. (Luka 10:1) Mu phila ayoyo, batu ba mavula beni baba luaku lu kukuwa zitsangu zimboti ayi mvandi kusamuna va kimueka na bankaka, kutuadisa beni ndandu ayi mayangi kuidi bapostolo. (Luka 10:17) Buidi wummuena, ngie mvaku wulenda samuna va kimueka na kimvuka?
BUELA LONGUKA
Tala buidi wulenda nungina boma widi bu kusamuna ayi kubaka mayangi bo wumbuela mioko kisalu ki kusamuna.
3. Yave wunkuiza ba yaku
Batu bankaka bankuazukanga, mu kuzaba buidi bankaka bankuiza muena ba kutona kusamuna.
-
Ngie mvaku wummonanga boma bu kusamuna mambu widi mu kulonguka? Kibila mbi?
Tala VIDEO, bosi tubilanu kiuvu kinlanda.
-
Buidi matoko amomo badi Zimbangi zi Yave banungina boma baba bu kusamuna?
Tanga Yesaya 41:10, bosi tubilanu kiuvu kinlanda:
-
Ngie kuba boma bu kusamuna, buidi nsambu wulenda kusadisila?
Ngie Zebi?
Bawombo badi Zimbangi zi Yave, baba monanga boma boti bankuiza nunga kusamuna bankaka zitsangu zimboti. Mona kifuani ki khomba wumueka bantedilanga Sergey ku Russia. Nandi waba kukitadilanga dedi mutu wukhambulu wufuana muingi kukoluka na bankaka. Vayi bo katona kulonguka Kibibila nandi wutuba: “Kheti yiba beni boma bu kuzabikisa bankaka mambu yaba longuka, vayi mambu yilonguka mu Kibibila matsadisa kutona kukitadila mu phila yifuana.”
4. Yolukila mu lukinzu
Bo wunzabikisa bankaka mambu wulonguka mu Kibibila, yindula mambu wunkuiza tuba ayi phila yi kutubila. Tanga 2 Timoteo 2:24 ayi 1 Petelo 3:15, bosi tubilanu biuvu binlanda:
-
Bo wunsamuna bankaka mambu wunlonguka mu Kibibila, buidi wulenda sadila mambu madi mu matangu amomo?
-
Boti basi dikanda diaku ayi bakundi baku basinkuiza kikinina ko mambu wunkuiza balonga, Mbi wufueti vanga? Ayi mbi ngie fueti bika kuvanga?
-
Buidi wummuena, mbi bilutidi: Kuvana biuvu mu lukinzu voti ku bakuika bakikinina mambu wu balonga? Sudikisa.
5. Kulonga bankaka zitsangu zimboti kuntuadisanga mayangi
Yave wuvana Yesu kisalu ki kusamuna zitsangu zimboti. Buidi Yesu kaba muenanga kiyeku katambula? Tanga Yoane 4:34, bosi tubilanu biuvu binlanda:
-
Bidia bimboti bi tuvananga buvinya ayi mayangi. Buidi Yesu kadedikisila kuvanga luzolu lu Nzambi—na kusamuna zitsangu zimboti?
-
Ndandu mbi wunkuiza baka mu kusamuna zitsangu zimboti?
Mambu Mankinza Wufueti Vanga
-
Mu lukutukunu lumvangamanga va khati tsika sabala, teka matu mu zithuadusulu bamvananga matedi mbonosono yi masolo muingi wubuela zaba buidi bu kutonina kukoluka na mutu.
-
Wulenda kuaku kuvana dizina muingi wutona kuvanga biyeku mu lukutukunu lumvangamanga va khati tsika sabala. Kiyeku ki minlonguki mi Kibibila kinkuiza kusadisa kubuela ba lufiatu muingi kulonga bankaka mambu widi mu kulonguka.
-
Sadila ziquadro zintuba “Batu Bankaka Bantubanga “ voti “Abu Mutu na Kukuvula” muingi wuzaba buidi bu kuvutudila mvutu bo mutu kammanga kukikinina mambu wunlonga.
ABU MUTU NA KUKUVULA: “Zitsangu mbi zimboti ngie widi?”
-
Buidi ngie wulenda sadila luaku alolo muingi kulonga mutu beni mambu wulonguka mu ndongukulu’aku yi Kibibila?
MBI NGIE BELONGUKA
Kuzabikisanga zitsangu zimboti kuidi bankaka kutu tuadisanga beni mayangi ayi ngie wulenda kuituka bo wumvisa ti masi ko beni phasi kuvanga mawu.
Vutukila Mambu Mamfunu
-
Kibila mbi tufueti samunina kuidi bankaka zitsangu zimboti?
-
Buidi ngie wulenda vangila mawu mu lukinzu?
-
Buidi wulenda nungina boma bu kusamuna?
TALA MAMBU MANKAKA
Tala mambu manna mankuiza kusadisa kusamuna zitsangu zimboti mu kusadila nkanda wu kukotisila mutu mu khond’itu mayo jw.org.
Bu Kukabila Nkanda wu Kukotisila Mutu mu Khond’itu Mayo JW.ORG (1:43)
Bakula zikhadulu zinna zilenda kusadisa kusamuna zitsangu zimboti.
“Ngie Widi Wukubama Muingi Kuba Nlobi Wu Batu?” (Kibanga ki Nsungi, Ngonda Yivua 2020)
Tala bifuani bidi mu Kibibila bilenda kusadisa kuba kibakala muingi kusamuna zitsangu zimboti kheti widi ditoko.
Bakula buidi wulenda kolukila matedi Kibibila na basi dikanda diaku bakhambu zaba Yave.
“Como tocar o coração de parentes descrentes” (A Sentinela, 15 de Março de 2014)
