DILONGI 22

Bue wulenda tubila kuidi bankaka nsamu wumboti?

WILA MU

Bobuawu wukuiza luti longukila kiedika ki Bibila, buawu mawu bela phuila yi “kukizabikisa kuidi batu bankaka!” Bukiedika, batu bawombo batidi zaba kiedika ki Bibila. Vayi thangu zinkaka wulenda mona tsisi yikamba batu bankaka mambu mo wulembo longuka. Tueka ntala bue wulenda botudila tsisi ayi yangalala sala kisalu kitsamununu.

1. Bue wulenda kambila batu bo beta vuanda yaku va kimosi mambu mo wulembo longuka?

Balonguki ba Yesu batuba ti: “Tulendi vonga ko yolukila mambu momo tumona ayi momo tuwa.” (Mavanga 4:20) Bazodila ngolo kiedika, diawu babela phuila yitubila mambu beni kuidi batu boso. Buawu ngeyo phe weta muena? Ti buawu buididi, tomba butubila mu lukinzu loso mambu momo wulembo longuka kuidi bakhomba ziaku ba dikanda ayi kuidi bakundi baku.—Tanga Kolosayi 4:6.

Mua ndambu mayindu malenda kusadisa mosi wutona

Kuidi khomb’aku mosi wu dikanda wulenda tonina disolo di Bibila mu phila yayi: “Mu sabala yayi, ndilongukidi diambu dimosi dikitoko.”
Tanga verse mosi yilukindusu kuidi kundi’ama wulembu bedi voti wulembu tatakana mu mayindu.
Ti kundi’aku mosi wu kisalu wuyuvudi bue sabala yaku yiviokidi, wunkambi mambu mo wulongukidi mu ndongokolo’aku yi Bibila yi tsuka voti mu lukutukunu.
Monisa kuidi bakundi baku siti’eto yi internet jw.org.
Tedisa batu bankaka mu ndongokolo’aku yi Bibila voti wuba monisa bue bu bulombila ndongokolo yi Bibila mu jw.org.

2. Bila mbi samuna kithuadi ayi bakhomba zi kimvuka yididi lukanu lumboti wulenda kitudila?

Balonguki ba Yesu babe samuninanga ko kaka batu bo bazaba. Yesu ‘wuba tuma buadi buadi mu mavula moso.’ (Luka 10:1) Phila beni yo yi samunina yivana nzila kuidi batu bawombo bawa nsamu mboti. Samuna mu kithuadi yitula balonguki ba Yesu baba mu zikhini ziwombo. (Luka 10:17) Wulenda kitudila lukanu lusamuna kithuadi ayi bakhomba ba kimvuka?

TUVISA MBOTI MBOTI

Tutala phila mbi wulenda nungina botudila kifu kimmona tsisi ayi phila wulenda bakila mayangi mu zabikisa nsamu wumboti.

3. Yehova wela ba yaku

Batu bawombo bakala na phuila yisamuna vayi beta mona batu tsisi ayi mambu mo balenda kubakamba.

A bue, ngeyo phe tsisi weta mona mu tubila mambu mo melonguka? Bila mbi?

Tala VIDEO ayi vana mvutu mu kiuvu kiaki kilandikini.

VIDEO: Nabondelaki Yehovah apesa ngai mpiko (4:05)

Phila mbi mintueni mio tumueni mu video yayi, babotudila kifu ki mmona tsisi?

Tanga Yesaya 41:10 ayi vana mvutu mu kiuvu kiaki:

Ti tsisi weta mona mu samuna, bue lusambulu lulenda kusadisila?

Wubedi buzabilanga?

Va thonono, Bambangi zi Yehova bawombo babe muenanga ti, bedi nunga ko longa nsamu wu Kimfumu ki Nzambi. Buawu phe Sergey kabe muenanga. Weba kimonanga ti widi mutu mosi wuphamba kembulu mfunu ayi weba monanga phasi mu tubila mambu beni kuidi batu bankaka. Wutuba ti: “Buba ti tsisi ndibe monanga, nditona kamba mambu mo ndilonguka mu Bibila kuidi batu ba dikanda diama ayi bakundi bama. Dingitukulu, diambu beni diyiza kindisa minu kiama mu mambu mo ndibe longukanga.”

4. Ba luzitu

Mu thangu wulembu samuna nsamu wumboti, yindula mambu mo wukuiza tubi ayi phila yoyi wukuiza matubila. Tanga 2 Timote 2:24 ayi 1 Piela 3:15 ayi vana mimvutu mu biuvu biabi:

Bue wulenda sadila ziverse ziazi mu thangu wulembo tubila Bibila kuidi batu bankaka?
Thangu zinkaka bakhomba ziaku ba dikanda balendi ko mona khini mu thangu wulembo samuna. Mbi wulenda tula? Ayi mbi wufueti kambu tula?
Bila mbi yilutidi mboti yuvula biuvu bidiela va buangu kikuika diyindu diaku mu kingolo?

5. Samuna kueta tula mutu kaba mu zikhini

Yehova wulomba Yesu kasamuna nsamu wumboti. Bue Yesu keba muenanga lutumu beni? Tanga Yowani 4:34 ayi vana mimvutu mu biuvu biabi:

Dia, mfunu kuidi mu luzingu lu mutu ayi dia bidia bimboti kueta tuyangidika. Bila mbi vanga luzolo lu Nzambi, yinsundula samuna nsamu wumboti wu Kimfumu ki Nzambi yibela banga bidia kuidi Yesu?
Bila mbi samuna nsamu mboti wu Kimfumu ki Nzambi kueta tunatina zikhini?

Mayindu mamfunu

Mu thangu yi lukutukunu lusabala, sonika mayindu mamfunu mo malenda kusadisa wutona masolo ma Bibila ayi batu.
Tula masolo momo bana ba nzo-nkanda beta tula mu lukutukunu lusabala. Mu thangu wuntula masolo beni, mela kuvana kibakala wuluta tubila mambu momo wulembo longuka kuidi batu.
Sadila buangu kioki kidi mu buku yayi kitubidi “Batu bankaka beta tuba ti” voti “Balenda kuyuvusa”; mu diambu di wumeka vutula mimvutu mu biuvu biobi balenda kuyuvusa.

BALENDA KUYUVUSA: “A ngeyo, wuyikidi na?”