Ginturo ni Jesus nga dapat magpabautismo ro mga Cristyano. (Basaha ro Mateo 28:19, 20.) Pero ano ro bautismo? Ag ano ro dapat obrahon para mabautismuhan?

1. Ano ro bautismo?

Ro bisaea nga “bautismo” hay naghalin sa Griego nga termino nga “itum-oy” sa tubi. Kat ginbautismuhan si Jesus, gintum-oy imaw sa Suba Jordan, ag rayon ‘nagtakas imaw sa tubi.’ (Marcos 1:9, 10) Pareho ni Jesus, ro matuod nga mga Cristyano hay ginabautismuhan paagi sa pagtum-oy o pag-eub-eob kanda sa tubi.

2. Ano ro ginapakita it bautismo?

Sa pagpabautismo, ginapakita it sangka tawo nga gindedikar na eon ro anang sarili kay Jehova nga Dyos. Paano na obrahon ro pagdedikar? Bago magpabautismo, ginasugid na kay Jehova paagi sa pangamuyo nga gusto na Imaw alagaron sa owa’t katapusan. Ginpromisa na nga si Jehova eang ro anang simbahon ag ro pinakaimportante sa anang kabuhi hay ro pag-obra it kabubut-on it Dyos. Ginpili na nga “lipatan ro anang kaugalingon, . . . ag magsunod” sa mga ginturo ag halimbawa ni Jesus. (Mateo 16:24) Paagi sa pagdedikar ag bautismo pwede eon imaw mangin maeapit nga amigo ni Jehova ag sa anang isigka-tumoeuo.

3. Ano ro obrahon it sangka tawo agud mabautismuhan?

Bago ka mabautismuhan, dapat mo tun-an ro parti kay Jehova ag pabakuron ro imong pagtuo kana. (Basaha ro Hebreo 11:6.) Habang nagadugang ro imong natun-an ag pagtuo kay Jehova, nagadugang man ing pagpalangga kana. Ngani, gusto mo gid isugid sa iba ro parti kana ag magkabuhi base sa anang mga nailaan. (2 Timoteo 4:2; 1 Juan 5:3) Kon ro sangka tawo “magkabuhi suno sa kabubot-on [ni Jehova], ag makahimo sa gihapon it anang nahamut-an,” pwede eon imaw magdedikar it anang kabuhi sa Dyos ag magpabautismo.—Colosas 1:9, 10. a

 TUN-I PA GID

4. Makatuon kita sa bautismo ni Jesus

Basaha ro Mateo 3:13-17 agud matun-an mo ro mga detalye parti sa bautismo ni Jesus. Talakaya rayon rayang mga pangutana:

• Eapsag baea si Jesus kat ginbautismuhan imaw?

• Paano imaw ginbautismuhan? Ginbubuan eang baea imaw sa ueo it tubi?

Pagkatapos it bautismo ni Jesus, gin-umpisahan na ro importante nga sugo nga gintao kana it Dyos iya sa eugta. Basaha ro Lucas 3:21-23 ag Juan 6:38, ag talakaya rayon rayang pangutana:

• Pagkatapos it bautismo ni Jesus, ano ro gin-una nana sa anang kabuhi?

5. Kaya mo gid magpabautismo

Basi naisip mo nga malisud magdedikar ag magpabautismo. Pero makabulig ro ing mga hatun-an sa Biblia nga makadesisyon nga magpabautismo. Agud makita ro mga nakaobra kara, tan-awa ro VIDEO.

Basaha ro Juan 17:3 ag Santiago 1:5, ag talakaya rayon rayang pangutana:

• Ano ro makabulig sa sangka tawo agud mabautismuhan?

1. Sa pagdedikar, ginasugid naton kay Jehova nga gusto naton imaw alagaron sa owa’t katapusan

2. Sa bautismo, ginapakita naton sa mga nagatan-aw nga nagdedikar eon kita sa Dyos

 6. Kon mabautismuhan kita, mangin parte eon kita it pamilya ni Jehova

Kon mabautismuhan eon kita, mangin parte kita it nahiusa nga pamilya sa bilog nga kalibutan. Maskin naghalin kita sa iba-ibang lugar ag ginbahuean, paeareho eang ro atong pagpati ag pagsueondan sa moral. Basaha ro Salmo 25:14 ag 1 Pedro 2:17, ag talakaya rayon rayang pangutana:

• Ano ro epekto it bautismo sa relasyon it sangka tawo kay Jehova ag sa iba nga nagasimba Kana?

 SUMARYO

Ginturo ni Jesus nga dapat magpabautismo ro mga Cristyano. Agud maobra ron, dapat may mabakud nga pagtuo kay Jehova ro sangka tawo, nagakabuhi base sa Anang mga nailaan, ag idedikar ro anang sarili Kana.

Review

• Ano ro bautismo, ag ham-an importante ra?

• Ano ro ginapakita it bautismo?

• Ano ro obrahon it sangka tawo agud madedikar na ro anang sarili ag magpabautismo?