Yesus ikofen bo doḇe snonggaku ḇeso i sya fandun fa sebaptis. (Kowasya Matius 28:19, 20.) Ḇape moḇsa sebaptis rai? Rosai na snonggaku oso ifrur kaku insama dakḇebaptis?

1. Ḇeso kaku Yesus i sya moḇsa sebaptis rai?

Wos ”baptis” ima wos Yunani dirya, knam ya iso ”panduk” ḇe war ya dori. Fafisu Yohanes ḇyebaptis Yesus anya, pyanduk Yesus baken ḇyeja kam ḇe war ya dori ro warḇeki Yordan, mura ”isasyar bur war ya”. (Markus 1:9, 10) Imnis rarirya, ḇeso kaku Yesus i sya sebaptis ido, na spanduk baken sena kam ḇe war ya dori.

2. Rofyor snonggaku oso ḇyebaptis, rosai imbe fyasnai ya?

Rofyor snonggaku oso ḇyebaptis, byuk kenem ḇyeja kwar fa dakfarmyan faro Allah Yahwe I. Moḇsa byuk kenem ḇyeja ḇe Yahwe I rai? Rofyor ḇyebaptis ḇaime, ḇyenadi ma ikofen ḇe Yahwe I imarisen dakfarmyan ḇe I isof fyoro-fyoro. Doḇe na isyom Yahwe I monda ma ifrur Yahwe marisen Ḇyena ḇe roi ḇefandun syadi ro kenem ḇyeja. Kyinfir fa ’fyamyun manggundi ma iso’ Yesus farkarkor ma nyan ḇyena ḇesya kwar. (Matius 16:24) Yesus byuk kenem ḇyeja fa ifarmyan faro Yahwe I ma ḇyebaptis, inja nane nafrur fa fyanam syadi faro Yahwe I ma snonggaku ḇese ḇeyaksyom faro Yahwe I sya.

3. Rosai snonggaku oso ifrur ḇepon kaku rofyor ḇyebaptis ḇaim?

Bebaptis ḇaim ido, wafarkor fa wafawi pyum Yahwe I ma nwa kakyar ḇesambraḇ faro I resari. (Kowasya Ibrani 11:6.) Wafawi pyum Yahwe I ma wakyar faro I kwar ido, nari waswar I. Mura, na wamarisen wakofenḇair I ḇe snonggaku ḇesesya ma wakenem raris moḇ imarisen raya. (2 Timotius 4:2; 1 Yohanes 5:3) Snonggaku oso ikenem pyum raris rosai Yahwe imarisen na kwar ido, nari imarisen byuk kenem ḇyeja fa dakfarmyan faro Yahwe I ma dakḇebaptis.​—Kolose 1:9, 10. a

 SWEWAR KAKU WER

4. Farkarkor kun ro fawar ḇero Refo ḇekur Yesus moḇ ḇyebaptis raya

Kowasya Matius 3:13-17 fa kofawi syadi Yesus moḇ ḇyebaptis raya. Raimnai kawos fakfuken nane:

• Yesus ḇyebaptis fafisu ḇye kapira kaker ke?

• Moḇsariso Yohanes ḇyebaptis Yesus i rai? Pyek war ya ḇe Yesus bruri monda ke?

Yesus ḇyebaptis raposa, ifrur fararur Yahwe iwan fa ifrur ro supswan ine. Kowasya Lukas 3:21-23 ma Yohanes 6:38, raimnai kawos fakfuken ine:

• Rofyor Yesus ḇyebaptis raposa, fararur ḇepon kaku rosaiso myam ro kenem ḇyeja?

5. Fasos pyum Au kwar ido na wakḇebaptis

Fafisu randak wafawi snonggaku Kristen sima fandun fa sbuk kenem sena fa sfarmyan ḇe Yahwe I ma sebaptis, na wamgak kero. Ḇape, wafasos pyum Au kwar ido, na wamgak ḇa bo wafrur roi ḇefandun kaku ine. Imbe wakfawi snonggaku ḇeyakfrur roi ine kwar ido, komam VIDIO.

Kowasya Yohanes 17:3 ma Yakobus 1:5, raimnai kawos fakfuken ine:

• Rosai na snonggaku oso ifrur kaku insama fyasos manggundi fa dakḇebaptis?

1. Kobuk kenem koḇena ḇe Yahwe I kuker koḇenadi ma kokofen ḇe I komarisen kofarmyan faro I isof fyoro

2. Koḇebaptis kada, kofasnaiḇair koisya kobuk kenem koḇena kwar fa kofarmyan faro Yahwe I

 6. Koḇebaptis kwar ido, na kaksun ro Yahwe kina Ḇyedi

Koḇebaptis kwar ido, na kaksun randum ma koḇeoser kuker Yahwe kina Ḇyedi ro supswan ine ḇesiper. Koramaker moḇ ḇesisye, mboi kona kakyar oser ma kokenem raris moḇ Yahwe imarisen raya. Kowasya Mazmur 25:14 ma 1 Petrus 2:17, raimnai kawos fakfuken ine:

• Snonggaku oso ḇyebaptis kwar ido, barakas rosai na ismai ya?

 FARKARKOR ḆYENA

Yesus ikofen bo doḇe snonggaku ḇeso kaku i sya fandun fa sebaptis. Rofyor snonggaku oso ḇyebaptis ḇaim, ḇepon ya iso nya kakyar ḇesambraḇ faro Yahwe I resari, ikenem raris moḇ Yahwe imarisen raya, ma byuk kenem ḇyeja fa dakfarmyan faro I.

Waswarepen Kaḇer

• Rariso sebaptis snonggaku ḇeso kaku Yesus i sya rai, ma rosai ḇefnai fa sebaptis?

• Snonggaku oso ḇyebaptis ido, rosai imbe fyasnai kaku ya?

• Moḇsa snonggaku oso byuk kenem ḇyeja fa dakfarmyan faro Yahwe I ma ḇyebaptis rai?