Yezu wahiloga wi Akristu anofwanyelela obatiziwa. (Kengesa Mateu 28:19, 20.) Mbwenye obatizo txini? Txini enakose muttu wi abatiziwe?

1. Obatizo txini?

Nzu ntti obatizo nindela mwa elogelo ya Egrego nintapulela “obwinihiwa.” Jijuwene yapadduwile mudhidhi obatiziwe Yezu Mmwinjeni wa Jordau, ‘maningo otene ahibwinihiwa.’ (Marko 1:9, 10) Ninziwa ejuwene sabwani mmaleliye obatiziwa, ohibudduwa mmanjenimwa. Moligana na Yezu, Akristu ebaribari agabatiziwaga maningo etene anobwinihiwa.

2. Obatiziwa enlagiha eni?

Mudhidhi ombatiziwa muttu, onolagiha wi ohivelela egumi yaye wa Yehova. Ovivelela onkosiwa dhavi? Muttu ahinatti obatiziwa, onomulobelela Yehova alogaga wi onfuna amulabele egumi yaye yotene. Iyene onogana omwebedha Yehova bahi vina okosa efunelo yaye enakale elobo yoroma enakosigiye mwigumini mwaye. Iyene onogana ‘ovikodda mwinyene . . . afwaraga’ masunziho na yotagiha ya Yezu Kristu. (Mateu 16:24) Ovivelela vina obatiziwa onomuttukulela muttu okana mandano oliba na Yehova vina na abale animulabela.

3. Txini enfwanyela muttu okosa wi abatiziwe?

Muttu ahinatti obatiziwa, jamakamaka osunza mwaha wa Yehova vina omuroromela. (Kengesa Ahebreu 11:6.) Mudhidhi onakanege weyo eziwelo vina nroromelo noliba, omukwela wawo Yehova onelege wunuwavi. Mwa venevo, weyo onelege ofuna olaleya mwaha waye mowiwanana na ejile enlogiye wi japama vina jabure. (2 Timóteo 4:2; 1 Joau 5:3) Muttu ‘agatonyihedhaga wi onokalawo wila amwagalalihe,’ Yehova, iyene txino onogana ovelela egumi yaye vina onobatiziwa.—Kolosi 1:9, 10. *

 KASUNZAVI

4. Ninosunza venjene na obatiziwa wa Yezu

Kengesa Mateu 3:13-17 wi osunze dhinji sabwa ya obatiziwa wa Yezu. Mugamala mutanaalele mavuzo aba:

• Yezu obatiziwe bali mwana?

• Iyene obatiziwe dhavi? Obatiziwe ekiwaga manje mang’onovi vamusorho?

Mmaleliye obatiziwa, Yezu wahiroma mabasa a vawoka amuttomeli Mulugu. Kengesa Luka 3:21-23 na Joau 6:38, mugamala mutanaalele nivuzo ntti:

• Mmaleli Yezu obatiziwa, mabasa gani ekiliye vamburoni voroma mwigumini mwaye?

5. Obatiziwa yogana enfwanyeliwe wakwanihedha

Ovivelela wa Yehova vina obatiziwa muttorho munddimuwa. Mbwenye mudhidhi onsunziwe mwaha wa Yehova vina ovirihagamo ejile enlogiye, onele okana nikuluvelo na okosa yogana eji yamakamaka. Kawone attu ena akosile ejuwene, karumiha VIDIYU.

Kengesa Joau 17:3 na Tiago 1:5, mugamala mutanaalele nivuzo ntti:

• Txini enamukamihedhe muttu ovisasanyedha wi abatiziwe?

1. Iyo ninvivelela wa Yehova, nigamwaddela wi ninfuna nimulabele egumi yehu yotene

2. Nigabatiziwa, ninowoniha vamentoni va attu ena wi nihimala ovivelela wa Mulugu

 6. Nigabatiziwa ninokosa mpaddi wa nikuru na anamudhi a Yehova

Nigamala obatiziwa, pankosihu mpaddi wa anamudhi owiwanana orugunuwa elabo yotene. Kintanala elabo obe elemelelo yawo, notene ninrumeela dhilobo modhene vina niniwelela malamulo akakene a Mulugu. Kengesa Masalmo 25:14 na 1 Pedro 2:17, mugamala mutanaalele nivuzo ntti:

• Muttu agamala obatiziwa, omarho gani onkaniye na Yehova vina na abale animwebedha?

 OGWADDELA

Yezu ohisunziha wi Akristu anofwanyela obatiziwa. Mbwenye wila ewodheye, enofuneya muttuya omuroromela Yehova, akalagawo mowiwanana na ejile enlogiye wi japama vina avivelele wa iyene.

Kobuwela Dhisunziliwe

• Obatiziwa txini, vina ekaleleni yamakamaka?

• Ovivelela na obatiziwa dhiniwanana dhavi?

• Dhilobo gani dhinfwanyela okosa muttu ahinatti ovivelela vina obatiziwa?