Yesu kɛɛ esa akɛ Kristofoi fɛɛ ahã abaptisi amɛ. (Kanemɔ Mateo 28:​19, 20.) Shi mɛni ji baptisimɔ? Ni mɛni kɛ mɛni esa akɛ mɔ ko afee koni anyɛ abaptisi lɛ?

1. Mɛni ji baptisimɔ?

Greek wiemɔ ni atsɔɔ shishi akɛ “baptisi” lɛ shishi ji, “ni akɛ nɔ ko muu fɛɛ baawo” nu mli. Be ni abaptisiɔ Yesu lɛ, akɛ egbɔmɔtso muu lɛ fɛɛ wo Yordan Faa lɛ mli, ni no sɛɛ lɛ, “ewó ehe nɔ kɛje nu lɛ mli.” (Marko 1:​9, 10) Kɛ́ aabaptisi anɔkwa Kristofoi lɛ, akɛ amɛgbɔmɔtso muu lɛ fɛɛ woɔ nu mli, tamɔ bɔ ni afee Yesu lɛ nɔŋŋ.

2. Kɛ́ mɔ ko hã abaptisi lɛ lɛ, mɛni no tsɔɔ?

Kɛ́ mɔ ko hã abaptisi lɛ lɛ, no tsɔɔ akɛ, ejɔɔ ewala nɔ ehã Yehowa Nyɔŋmɔ. Mɛni mɔ ko feɔ kɛjɔɔ ewala nɔ ehãa Yehowa? Dani abaabaptisi lɛ lɛ, ekome too esɔleɔ ni ekɛɔ Yehowa akɛ ebaafee nɔ ni Yehowa sumɔɔ kɛya naanɔ. Ewoɔ Yehowa shi akɛ ebaajá ekome too pɛ, ni akɛ, ebaahã Nyɔŋmɔ suɔmɔnaa nii ni ebaafee lɛ he ahia lɛ fe nɔ fɛɛ nɔ. Ehalaa akɛ ‘ebaakwa ehe ni eya nɔ enyiɛ’ Yesu tsɔɔmɔi lɛ asɛɛ, ni ekase lɛ hu. (Mateo 16:​24) Ewala nɔ ni ejɔɔ ehãa Yehowa kɛ baptisimɔ ni ehãa abaptisiɔ lɛ lɛ, hãa ekɛ Yehowa kɛ ejálɔi krokomɛi lɛ bɔɔ naanyo waa.

3. Mɛni kɛ mɛni esa akɛ mɔ ko afee koni anyɛ abaptisi lɛ?

Ehe miihia ni okase Yehowa he nii ni oná hemɔkɛyeli ni mli wa yɛ emli dani abaanyɛ abaptisi bo. (Kanemɔ Hebribii 11:6.) Be ni Yehowa he nilee ni oyɔɔ lɛ faa ni hemɔkɛyeli ni oyɔɔ yɛ emli lɛ mli waa lɛ, suɔmɔ ni oyɔɔ kɛhã lɛ lɛ hu mli baawa. Kɛkɛ lɛ, obaasumɔ ni ogba mɛi ehe sane ni ofee nɔ ni esumɔɔ. (2 Timoteo 4:2; 1 Yohane 5:3) Kɛ́ mɔ ko ‘nyiɛ bɔ ni sa Yehowa, bɔ ni afee ni esa ehiɛ kwraa lɛ,’ ewaŋ akɛ ebaakpɛ eyiŋ akɛ ebaajɔɔ ewala nɔ ehã Nyɔŋmɔ ni ehã abaptisi lɛ.​—Kolosebii 1:​9, 10. a

 KASEMƆ PII OFATA HE

4. Nɔ ni wɔbaanyɛ wɔkase yɛ Yesu baptisimɔ lɛ mli

Nyɛkanea Mateo 3:​13-​17 lɛ, koni nyɛna Yesu baptisimɔ lɛ he saji babaoo. No sɛɛ lɛ nyɛsusua sanebimɔi nɛɛ ahe:

• Ani Yesu ji gbekɛ ŋmɔŋ be ni abaptisi lɛ lɛ?

• Te abaptisi lɛ ahã tɛŋŋ? Ani atsɔ̃ nu loo atsɔ nu ashwie eyiteŋ kɛkɛ?

Be ni abaptisi Yesu sɛɛ nɔŋŋ kɛkɛ ni eje nitsumɔ ni nɔ bɛ ni Nyɔŋmɔ kɛhã lɛ lɛ shishi. Nyɛkanea Luka 3:​21-​23 kɛ Yohane 6:​38 lɛ, ni nyɛsusua sanebimɔ nɛɛ he:

• Be ni abaptisi Yesu sɛɛ lɛ, mɛɛ nitsumɔ ehã no he hia lɛ fe fɛɛ?

5. Obaanyɛ oshɛ baptisimɔ he

Ekolɛ, obaasusu akɛ onyɛŋ ojɔɔ owala nɔ ohã Nyɔŋmɔ ni ohã abaptisi bo. Shi be ni oyaa ohiɛ lɛ, ebaashɛ he ko ni obaanu he waa akɛ esa akɛ okpɛ yiŋ ni he hiaa nɛɛ. Bɔ ni afee ni ona mɛi komɛi ni fee nakai lɛ, jiemɔ VIDIO lɛ.

Nyɛkanea Yohane 17:3 kɛ Yakobo 1:5 lɛ, ni nyɛsusua sanebimɔ nɛɛ he:

• Mɛni kɛ mɛni esa akɛ mɔ ko afee koni anyɛ abaptisi lɛ?

1. Kɛ́ osɔle okɛɛ Yehowa akɛ obaasɔmɔ lɛ kɛya naanɔ lɛ, no tsɔɔ akɛ, ojɔɔ owala nɔ ohã lɛ

2. Kɛ́ ohã abaptisi bo lɛ, ohãa mɛi naa faŋŋ akɛ, ojɔɔ owala nɔ ohã Nyɔŋmɔ

 6. Kɛ́ abaptisi mɔ ko lɛ, ebatsɔɔ Yehowa weku lɛ mli nyo

Kɛ́ abaptisi wɔ lɛ, wɔbatsɔɔ weku ko ni yɔɔ jeŋ fɛɛ ni efee ekome lɛ mli nyo. Eyɛ mli akɛ wɔjɛ hei srɔtoisrɔtoi kɛ shihilɛi srɔtoisrɔtoi amli moŋ, shi wɔheɔ nɔ kome too lɛ nɔŋŋ wɔyeɔ, ni wɔhiɔ shi yɛ kitãi ni yɔɔ Biblia lɛ mli lɛ anaa. Nyɛkanea Lala 25:​14 kɛ 1 Petro 2:​17 lɛ, ni nyɛsusua sanebimɔ nɛɛ he:

• Yɛ ŋmalɛi nɛɛ anaa lɛ, kɛ́ abaptisi mɔ ko lɛ, namɛi batsɔmɔɔ enanemɛi?

 EMLI OTI

Yesu kɛɛ esa akɛ Kristofoi fɛɛ ahã abaptisi amɛ. Dani abaabaptisi mɔ ko lɛ, esa akɛ ená hemɔkɛyeli ni mli wa yɛ Yehowa mli, efee nɔ ni Yehowa sumɔɔ, ni ejɔɔ ewala nɔ ehã lɛ.

Mɛni Okase?

• Mɛni ji baptisimɔ, ni mɛni hewɔ ehe hiaa lɛ?

• Kɛ́ mɔ ko hã abaptisi lɛ lɛ, mɛni no tsɔɔ?

• Mɛni kɛ mɛni esa akɛ mɔ ko afee koni enyɛ ejɔɔ ewala nɔ ehã Nyɔŋmɔ ni ehã abaptisi lɛ?