Zesu ə mo yɛ ma maanɛɛ ŋɔ kəlan nea di di batiisə (Matie 28:19, 20 ɓo, ɉɛɓɛ yili ninɛ). Kəlaa, lə ɓə da kɛ ma batɛɛmu ? Ə lɛɛ lə ɓə maanɛɛ nu ə gɛ diɛ pa batiisəi ?

1. Lə ɓə da kɛ ma batɛɛmu ?

“ Batɛɛmu ” kaa a Grɛkə-woo yii mukulaa ɓaa “ di ə́ lɔ ” ya mu. Ɓɛlowai di Zesu batiisə la ɉurdɛn yái, di nɔ ɲá mu, yili pulu “ ə kulɔ ɲái ” (Markə 1:9, 10). Yɛ pələi lɔ Zesu nwɛi ə kɛ la, da kɛi kilistalea leeleeɠaa batiisə, da di naa kəlee lɔ yái.

2. Lə ɓə batɛɛmu həɠɛɛ a nɛ ?

Batɛɛmu həɠɛɛ a nɛ yɛ ma nu aa gbɔɔ tɛɛ Zehova Yálá pɔ. Nu a gbɔɔ tɛɛ ləi Zehova Yálá pɔ ? Gɛɛ nii nu ho batɛɛmu həɠə, maanu a gbea nii gbɔɔ tɛɛ Zehova pɔ hwɛliwoo hu dɔnɔ koɉu, ə mo ma yɛ ma, gaa bɔ ə kɛ a ŋɔ kólókɛmun ŋɔ yɛnɛɛ kəlee yee mu. A mo Zehova ɓa yɛ ma, yaa tɔnɔ gbən ɓə gaa bɔ ə matoo ə lɛɛ ə niiɓa mɛni tɛɛ tɔwɔ ŋɔ yɛnɛɛ hu. A hwaa ma “ ə lənə gbɔɔ ɓa […] ə hwilɛn ” Zesu ŋɔ kalan-nwooɠaa pulu da ŋɔ kɔɔmaa (Matie 16:24). Nu a gbɔɔ tɛɛ Zehova pɔ hwɛliwoo hu ə lɛɛ ə batɛɛmu həɠə, yaa da Zehova di wɔ ɓəlannaa hu a wala-wala ə lɛɛ a kɛ a maalɛɠɛɛ Zehova batoonua diɛ.

3. Lə ɓə maanɛɛ nu ə gɛ diɛ pɛli batiisəi ?

Gɛɛ di ho nu batiisə, mɛni wala-wala ɓaa ə gbea nii Zehova kɔlɔnŋaa maakwɛli ə lɛɛ laanalaa kɛnɛ ə kɛ ɲəi yɛ hwilɛn na Zehova ɓa (Hebreu 11:6 ɓo). Ə́ wɔ mɛnikɔlɔnŋaa da ə́ wɔ laanalaa ta kaa lɔ kɛi pɛlɛi ma, ə́ wɔ wɛlikɛmaalaa vilɛnŋaa Zehova ɓa da yɛ pɛlɛ ma. Yili kaa pai gɛi Yálá Lawoo laahəli wɛli ə too yɛ́ ə lɛɛ yɛ́ tuwɔ yɛ pələi Yálá kaa la bɔ (Timote veelɛ 4:2 ; Ɉaan dɔlɔɔ 5:3). Nui a yɛnɛɛ kɛ a gu “ Námu liiɓa ”, maanu a kɛ bɔ ə ŋɔ yɛnɛɛ kwɛlɛ Zehova ɓa ə lɛɛ di batiisə. (Kolosə 1:9, 10). a

 Ə́ WƆ MƐNIKƆLƆNŊAA TA PƐLƐ MA

4. Kili yii gwa pɛli ɉɔlɔɓoi Zesu ŋɔ batɛɛmu hu

Matie 3:13-17 ɓo, pələi di Zesu batiisə la yɛ́ pɛli gaai, ə lɛɛ ka lono kɛ gɛɛmaalənŋaa ŋɛi mɛi.

• Di Zesu batiisə ɓɛlowai ə kɛ la a lon dala ?

• Di Zesu batiisə pələ kɛ ləi ? Yá wolo lɔ ɓə di gbɛŋɛn nwun ma ?

Gólói Yálá ə Zesu tɔɔ la, batiisiɛ pulu ɓə ə gɔwɔtɔɔ la. Lukə 3:21-23 da Ɉaan 6:38 ɓo, ə lɛɛ ka lono kɛ gɛɛmaalənŋɛi mɛi :

• Zesu ŋɔ batɛɛmu həɠɛɛ pulu, kóló ləkɛɛ ɓə ə dɛɛ tɔwɔ ŋɔ yɛnɛɛ hu ?

5. Batɛɛmu həɠɛɛ kaa a ə́ yee pɛlimaa mɛni

Ya pɛli kiɛ ɲɔui ə́ kpɔwɔ tɛɛ Zehova pɔ ə lɛɛ ə́ batɛɛmu həɠə. Kəlaa ə́ kaa lɔ kɛi tɛi tɔwɔ a bɛlɛ-pɛlɛɛ ə́ wɔ Yálá mɛni hu, yɛ́ gaa yɛ́ ma batɛɛmu həɠɛɛ kaa a ə́ yee pɛlimaa mɛni. Vidio ŋɛi kaa pələi nu taɠaa di pɛli batɛɛmu həɠəi la ə́ gaa. VIDIO kaa.

Ɉaan 17:3 da Ɉakə 1:5 ɓo, ə lɛɛ ka lono kɛ gɛɛmaalən ŋɛi mɛi.

• Nu ya pɛli ə kɛ pələ pɛlii ləi yɛ́ pɛli batɛɛmu həɠəi ?

1. Nu ya ə kpɔɔ tɛɛ Zehova pɔ hwɛliwoo hu, ya mo ma yɛ́ ma ə́ kaa bɔ ə́ ti ma ə́ wɔ yɛnɛɛ kəlee yee mu

2. Batɛɛmu a nɛ nu kəlee ɲɛi ɓa yɛ ma gwaa gu kpɔɔ tɛɛ Zehova pɔ hwɛliwoo hu

 6. Batɛɛmu a gu kɛ a Zehova yee bɛlɛn mun da

Zehova ɓatoonua leeleeɠaa yee lɔɔ gee yɛ pɛlɛ tɔnɔ mu nua yɛnɛɛ naa kəlee. Nu ya batɛɛmu həɠə, ya kɛ kea a bɛlɛi tii hu mun da. Pələi ma ku hwa həɠə la kɛɛnaa tɔnɔ, ku wɔ laanalaa hwilɛnŋaa mɛni tɔnɔ ɓa. Zehova ŋɔ Kəlaɠaa kpɔ di batiisiɛ, ɓɛi lɔpee gəlee da həɠə laa, di wɔ laanalaa kaa tanɔn ə lɛɛ mɛnii Biblə a mo ya ɓə da hiɛ la. Maatɛnɛ 25:14 da Piɛrə dɔlɔɔ 2:17 ɓo, ə lɛɛ ka lono kɛ gɛɛmaalən ŋɛi mɛi :

• Yɛ pələi vɛlisɛɛɠaa ŋɛi da nɛ la, batɛɛmu həɠɛɛ pulu mɛinɛɛɠaa ɓaa lə ?

 YII GU GALAN

Zesu ə mo yɛ ma maanɛɛ kilistalea di di batiisə. Ə gɛ nu yɛ pɛli yili kɛi maanɛɛ ə ŋɔ laanalaa huwala-wala yɛ hwilɛn na Zehova ɓa, ə ŋɔ yɛnɛɛ kɛ yɛ pələi Zehova kaa la bɔ ə lɛɛ ə gbɔɔ tɛɛ Zehova pɔ hwɛliwoo hu.

Nɛɛ ə́ kili pɔ

• Lə ɓə da kɛ ma batɛɛmu ə lɛɛ lə mɛni ɓa mɛni wala-wala ɓaa di nu batiisə ?

• Nu kpɔɔ tɛɛ mɛni Zehova pɔ hwɛliwoo hu da nu əi batiisə, mɛni hweelɛi tii da li ləi gee pɔ ?

• Mɛni ləkɛɛɠaa ɓə maanɛɛ nu ə gɛ yɛ́ teɠa pa ə́ kpɔ tɛɛ Zehova pɔ hwɛliwoo hu, ə lɛɛ yɛ́ teɠa pa batɛɛmu həɠə ?