Yesu wavova vo Akristu bafwete vubwa. (Tanga Matai 28:19, 20.) Kansi, o luvubu aweyi luvangamenanga? Nkia mambu o muntu kafwete lungisa vitila kavubwa?

1. O luvubu aweyi luvangamenanga?

O mvovo “vubwa” mu mvovo wa Kingerekia watuka una ye nsasa vo “dimunua” muna maza. Vava Yesu kavubwa, wadimunua muna Nkoko a Yodani, i bosi, ‘watomboka muna maza.’ (Maku 1:9, 10) Nze i Yesu, Akristu akieleka vava bevubwanga bedimunuanga muna maza.

2. Vava muntu kevubwanga, adieyi kesonganga?

Vava muntu kevubwanga, osonganga vo oyekwele kala zingu kiandi kwa Yave wa Nzambi. Aweyi o muntu keyekolwelanga zingu kiandi? Vitila kavubwa, osambanga kwa Yave vo yandi kazolele sadila yakwele mvu. Osianga nsilu vo Yave kaka kesambila yo sia luzolo lwandi vana fulu kiantete muna zingu kiandi. ‘Okuyivaninanga o nkalu yo . . . kwamanana landa’ malongi ye mbandu a Yesu. (Matai 16:24) O kukiyekola yo luvubu lukumvananga e lau dia kala ye kikundi kiambote yo Yave ye asambidi akaka a Yave.

3. Nkia mambu o muntu kafwete vanga vitila kavubwa?

Vitila wavubwa ofwete longoka mambu matadidi Yave yo kala yo lukwikilu lwasikila muna yandi. (Tanga Ayibere 11:6.) Ekolo zayi waku uwokelanga yo lukwikilu lwaku lukumamanga, o zola kwaku mpe muna Yave kuwokela. Kalukatikisu ko vo, okala yo luzolo lwa samuna mambu ma Yave yo lemvokela e nkanikinu miandi. (2 Timoteo 4:2; 1 Yoane 5:3) Vava muntu kesonganga muna zingu kiandi vo ozolele ‘yangidika Yave muna mawonso,’ obakanga nzengo za kukiyekola kwa Nzambi yo vubwa.—Kolosai 1:9, 10. a

 ZAYA DIAKA MANKAKA

4. Mana tulenda longoka muna luvubu lwa Yesu

Muna zaya mayingi mu kuma kia luvubu lwa Yesu, tanga Matai 3:13-17. I bosi, vana e mvutu za yuvu eyi:

• Nga Yesu mwan’a nsedia kakala vava kavubwa?

• Aweyi kavubilwa, nga maza kaka kasiwa vana ntu?

Vava Yesu kavubwa, wayantika e salu kiamfunu kavewa kwa Nzambi. Tanga Luka 3:21-23 ye Yoane 6:38, i bosi, vana e mvutu za kiuvu eki:

• Vava Yesu kavubwa, nkia salu kasia vana fulu kiantete muna zingu kiandi?

5. O luvubu i kani diamfunu olenda lungisa

E ngindu za kukiyekola kwa Yave yo vubwa zilenda kumwesa wonga. Kansi, ekolo olongokanga mambu mayingi mu kuma kia Yave yo sadila mana kevovanga, ediadi dikuvana unkabu mu baka e nzengo zazi zamfunu. Muna zaya awana bavanga wo kala, tala e VIDEO.

Tanga Yoane 17:3 ye Yakobo 1:5, i bosi, vana e mvutu za kiuvu eki:

• Adieyi dilenda sadisa muntu mu kala wakubama muna vubwa?

1. Tukukiyekolanga vava tuvovesanga Yave muna sambu vo yandi tuzolele sadila yakwele mvu

2. Vava tuvubwanga, tusonganga vo tuyekwele kala zingu kieto kwa Nzambi

 6. Vava tuvubwanga tukotanga muna kanda dia Yave

Vava tuvubwanga tukotanga muna kintwadi kia wan’a ngudi mu nz’amvimba. Kanele vo tuzingilanga mu nsi zaswaswana ye kisi nsi kiaswaswana, yeto awonso tukwikilanga yo lemvokela mambu mau mamosi. Tanga Nkunga 25:14 ye 1 Petelo 2:17, i bosi, vana e mvutu za kiuvu eki:

• Avo muntu ovubilu, nkia mpila kikundi kekalanga kiau yo Yave ye asambidi andi ankaka?

 MAMBU MASINA MA LONGI DIADI

Yesu walonga vo Akristu bafwete vubwa. Muna lungisa diambu diadi diamfunu, o muntu kafwete kwikila muna Yave, lemvokela nkanikinu miandi yo kukiyekola kwa yandi.

Nkia Mambu Olongokele?

• O luvubu aweyi luvangamenanga? Ekuma lwinina o mfunu?

• Nkia ngwizani ina vana vena kukiyekola yo vubwa?

• Nkia mambu o muntu kafwete vanga vitila kakiyekola yo vubwa?