Yesu wakaiisha ayi Mwineklistu alyeelete kubombekwa. (Amubelenge Mateyo 28:19, 20.) Ano ino kubombekwa cilaamba nshi? Alimwi ino muntu alyeelete kucita buyani kwaamba ayi ashike pakubombekwa?

1. Ino kubombekwa cilaamba nshi?

Liswi lyakwaamba ayi “kubombekwa” lyakaswa kuliswi lyamuci Giliki lisansulula “kupisha” mumaanshi. Yesu ndyaakalinga kubombekwa, bakamupisha mumaanshi mu Mulonga wa Joodani, lyalo ‘wakaswa mumaanshi.’ (Maako 1:9, 10) Bweenka mbuli Yesu, Beneklistu bancine abalo balabombekwa kwiinda mukubapisha mubili woonse mumaanshi.

2. Ino kubombekwa kulatondesha nshi?

Kwiinda mukubombekwa, muntu alatondesha ayi wakalyaaba kuli Yehova Lesa. Ino kulyaaba kulacitwa buyani? Muntu kaatana kubombekwa, alataanguna kupaila kuli Yehova, kumulwiita ayi alisuni kumusebensela kwamuyayaya. Alashomesha ayi alaakunoopaila Yehova eenkabo alimwi akubika kuyanda kwakwe Lesa panembo lya shintu shoonse mubuumi bwakwe. Alasala “kushiya akusuula shoonse shimusangalasha akutolelela kukonkela” njiisho shakwe Yesu alimwi acakubonenaako cakwe. (Mateyo 16:24) Kulyaaba akubombekwa kulamupa coolwe cakuba abushicibusa buyumu a Yehova alimwi abashominyina.

3. Ino muntu inga wacita buyani kwaamba ayi aye panembo akubombekwa?

Kamutana kubombekwa, mulyeelete kutaanguna kwiiya pali Yehova akuba alushomo luyumu. (Amubelenge Bene Ebulu 11:6.) Lusuno lwanu pali Yehova lulaakuya panembo na mukeeye shiinji akuyumya lushomo lwanu. Lyalo mulaakusuna kwaabanamo lubasu muncito yakushimikila alimwi akukonkela njiisho shakwe Lesa. (2 Timoti 4:2; 1 Joni 5:3) Na muntu watalika ‘kukala buumi busuni Yehova akucita shimusangalasha lyoonse,’ inga wasalawo kulyaaba kuli Lesa akubombekwa.—Bene Kolose 1:9, 10. a

 AMWIIYILEWO ASHIMWI

4. Nsheenga tweeya pamakani akubombekwa kwakwe Yesu

Amubelenge Mateyo 3:13-17 kwaamba ayi mwiiye shiinji pamakani akubombekwa kwakwe Yesu. Lyalo amubandike miipusho iyi:

• Sa Yesu wakabombekwa kaali kateta?

• Ino Yesu wakabombekwa buyani? Sa bakamusanselabo maanshi?

Yesu ndyaakabombekwa wakatalika ncito ilibetele Lesa njaakamupa pacishi capanshi. Amubelenge Luka 3:21-23 alimwi a Joni 6:38, akubandika mwiipusho uyu:

• Ino nincito nshi Yesu njaakabika panembo mubuumi bwakwe pesule lyakubombekwa?

5. Kubombekwa ncintu nceenga mwacikonsha kucita

Ciindi cakutaanguna ndyemwanyumfwa makani akulyaaba akubombekwa, inga mwayeeya anga ncintu nceenga tamucikoonshi. Nacibi boobo, inga mwacikonsha kuya panembo, lyalo akushiba kabotu kuyandika kwa kubombekwa. Kwaamba ayi mubone bantu bakacikonsha kucita boobo, amweebele VIDYO.

Amubelenge Joni 17:3 a Jemusi 1:5, akubandika mwiipusho uyu:

• Ino nshiinshi sheenga shacafwa muntu kulibambila kubombekwa?

1. Tulalyaaba kuli Yehova kwiinda mukumulwiita ayi tulisuni kumusebensela kwamuyayaya

2. Bushiku ndyetutoobombekwa, tulatondesha bantu boonse batoobonaako kwaamba ayi twakalyaaba kuli Lesa

 6. Na twabombekwa, tulaba lubasu lwa mukwashi wakwe Yehova

Na twabombekwa, tulaba lubasu lwa mukwashi ucatene nsengwe yoonse. Nabi kwaamba ayi tulaswa mumisena ipusenepusene alimwi abukaalo bupusenepusene, tulashoma makani omwi alimwi akukonkela njiisho shakulilemeka shomwi. Amubelenge Kulumbaisha 25:14 alimwi a 1 Pita 2:17, akubandika mwiipusho uyu:

• Ino kubombekwa kulakuma buyani bushicibusa muntu mbwaacite a Yehova alimwi abashominyina?

 CITEENTE CINENE

Yesu wakaiisha ayi Beneklistu balyeelete kubombekwa. Kwaamba ayi muntu acikoonshe kucita boobo, alyeelete kuba alushomo luyumu muli Yehova, kukonkela njiisho shakwe Lesa shiluleme, alimwi akulyaaba kuli Nguwe.

Kwiindulukaamo

• Ino kubombekwa cilaamba nshi, alimwi ino nceebonshi kulayandika?

• Ino kulyaaba alimwi akubombekwa shileendelana buyani?

• Ino muntu alyeelete kucita buyani kaatana kulyaaba akubombekwa?