Yeˍsuˆ kʼoˆ laˇ ve Hkriꞈ yaˇ lehˬ Baˆtiˆsaˬ gʼa haꞈ yuˬ ve yoˬ. (Maꞈhtehˍ 28:19, 20 gʼaw sheˍ.) Yaꞈ hkʼaˇ, Baˆtiˆsaˬ haꞈ yuˬ ve lehˬ aˬ htoꞈ ma kʼoˆ gaˇ ve le? Leh chaw teˇ gʼaˇ Baˆtiˆsaˬ haꞈ yuˬ gʼa tuˬ aˬ htoꞈ ma gʼa te ve le?

1. Baˆtiˆsaˬ haꞈ yuˬ ve lehˬ aˬ htoꞈ ma kʼoˆ gaˇ ve le?

Heˍlaˍsaˆ tawˇ hkawˇ hkʼaw “Baˆtiˆsaˬ” haꞈ yuˬ ve lehˬ iˉ kaˆ hkʼaw “tuˍ keu ve” tehꞈ kʼoˆ gaˇ ve yoˬ. Yeˍsuˆ Baˆtiˆsaˬ haꞈ yuˬ htaˇ, yawˇ Yawˇdanˍ gʼuiˬ ma hkʼaw awˬ to tuˍ keu leh ‘iˉ kaˆ hkʼaw lo tawˆ la ve yoˬ.’ (Maˍkuˆ 1:9, 10) Awˬ tehˬ ve Hkriꞈ yaˇ kaꞈ Yeˍsuˆ hkʼa shuˍ te ve yoˬ. Yawˇ hui Baˆtiˆsaˬ haꞈ yuˬ htaˇ, iˉ kaˆ hkʼaw awˬ to tuˍ keu ve yoˬ.

2. Baˆtiˆsaˬ haꞈ yuˬ ve lehˬ aˬ htoꞈ ma hpeuꞈ maw piˇ ve le?

Chaw teˇ gʼaˇ Baˆtiˆsaˬ haꞈ yuˬ htaˇ, yawˇ Yaˬhoˉvaˬ htaꞈ awˬ to chiˇ aꞈ piˇ˗oˬ ve tehꞈ shu htaꞈ hpeuꞈ maw piˇ chehˇ ve yoˬ. Awˬ to chiˇ aꞈ piˇ ve lehˬ aˬ htoꞈ ma kʼoˆ gaˇ ve le? Chaw teˇ gʼaˇ Baˆtiˆsaˬ maˇ haꞈ yuˬ sheˍ htaˇ, yawˇ Yaˬhoˉvaˬ ve kanˉ co co taiˍ taiˍ te gaˇ ve tehꞈ bon lawˬ ve awˬ hkʼaw lo kʼoˆ piˇ ve yoˬ. Yawˇ Yaˬhoˉvaˬ htaꞈ ceh tiˉ oˉ kʼoˍ pui leh Yaˬhoˉvaˬ ve a loˍ htaꞈ awˉ lawˉ gʼaꞈ te tuˬ ka tiꞈ gʼa te ve yoˬ. Yawˇ “a shu yawˇ ve a loˍ htaꞈ baˬ taˉ” leh Yeˍsuˆ htaꞈ henˇ yuˬ leh yawˇ maˍ ve awˬ hkʼaˇ suh gʼaꞈ te tuˬ gʼa dawˇ cheˆ ve yoˬ. (Maꞈhtehˍ 16:24) Yawˇ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ ve lehˬ Yaˬhoˉvaˬ leh yawˇ htaꞈ oˉ kʼoˍ pui ve chaw geh meuˆ daꞈ maˇ la tuˬ te piˇ ve yoˬ.

3. Chaw teˇ gʼaˇ Baˆtiˆsaˬ maˇ haꞈ yuˬ sheˍ htaˇ aˬ htoꞈ ma gʼa te ve le?

Baˆtiˆsaˬ haꞈ yuˬ gʼa tuˬ nawˬ Yaˬhoˉvaˬ htaꞈ caˉ daꞈ ve awˬ lawn gʼa henˇ leh yawˇ htaꞈ gʼa yonˍ ve yoˬ. (Heˍbrehˇ 11:6 gʼaw sheˍ.) Nawˬ Yaˬhoˉvaˬ ve awˬ lawn shiˍ maˇ la leh yonˍ maˇ la htaˇ, nawˬ yawˇ htaꞈ haꞈ maˇ la tuˬ yoˬ. Chi hkʼoˆ kaꞈ, yawˇ ve awˬ liˇ awˬ hkʼaˇ htaꞈ nawˬ gʼaꞈ te gaˇ leh yawˇ ve awˬ lawn shu htaꞈ kʼoˆ maˍ piˇ gaˇ tuˬ yoˬ. (2 Tiˆmoˉseˍ 4:2; 1 Yoˇhanˬ 5:3) Chaw teˇ gʼaˇ ‘Yaˬhoˉvaˬ htaꞈ keunˍ daꞈ ve hkʼe te kʼai leh, teˇ ceuˬ le le awˬ hkʼaw lo Gʼuiˬ sha nyi hkʼaˇ suh tuˬ te ve kʼo,’ yawˇ kaꞈ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ tuˬ dawˇ cheˆ gʼa ve yoˬ.—Kawˇlawˇsehˇ 1:9, 10. a

 Henˇ shiˍ maˇ la tuˬ

4. Yeˍsuˆ Baˆtiˆsaˬ haꞈ yuˬ ve htaꞈ ngaˬ hui aˬ htoꞈ ma henˇ gʼa ve le?

Yeˍsuˆ Baˆtiˆsaˬ haꞈ yuˬ ve htaꞈ kʼawꞈ shiˍ maˇ la tuˬ, Maꞈhtehˍ liꞈ 3:13-17 gʼaw sheˍ. Peuˬ leh na hkawˇ chi teˇ hpaˍ htaꞈ tawˇ yaw daꞈ sheˍ:

• Yeˍsuˆ Baˆtiˆsaˬ haꞈ yuˬ htaˇ yaˇ ehˉ hpehꞈ chehˇ sheˍ ve laˇ?

• Yeˍsuˆ Baˆtiˆsaˬ haꞈ yuˬ htaˇ oˉ kʼoˍ hkʼoˆ lo iˉ kaˆ hpehꞈ pfuhˍ ve maˇ heˆ leh iˉ kaˆ ngeuˍ pfuhˍ˗aw laˇ? Hkʼe kʼo, yawˇ hkʼaˬ hkʼe te ve le?

Yeˍsuˆ Baˆtiˆsaˬ haꞈ yuˬ peuˬ hkʼawꞈ nawˉ, Gʼuiˬ sha yawˇ htaꞈ piˇ taˍ ve a yeˇ uiˍ jaˇ ve kanˉ tanˬ te ve yoˬ. Luˉkaꞈ liꞈ 3:21-23 leh Yoˇhanˬ liꞈ 6:38 gʼaw leh na hkawˇ chi htaꞈ tawˇ yaw daꞈ sheˍ:

• Yeˍsuˆ Baˆtiˆsaˬ haꞈ yuˬ peuˬ hkʼawꞈ nawˉ, yawˇ ve a shaꞈ teꞈ hkʼaˇ awˬ hkʼaw lo aˬ htoꞈ ma kanˉ htaꞈ coˇ caˇ leh te ve le?

5. Nawˬ dawˇ teh taˍ leh te gʼa ve lehˬ Baˆtiˆsaˬ haꞈ yuˬ ve

Chi teˇ hkui nawˬ awˬ to chiˇ aꞈ piˇ leh Baˆtiˆsaˬ haꞈ yuˬ tuˬ te maˇ gʼa tehꞈ dawˇ ve yoˬ hehˉ. Yaꞈ hkʼaˇ, nawˬ Yaˬhoˉvaˬ ve awˬ lawn henˇ leh yawˇ htaꞈ shiˍ daꞈ maˇ la ve kʼo, nawˬ kaꞈ awˬ to chiˇ aꞈ piˇ leh Baˆtiˆsaˬ haꞈ yuˬ gaˇ ve yoˬ. Oˇ hkʼe te ve chaw teˇ hpaˍ hpaˍ ve awˬ lawn htaꞈ nyi tuˬ, VDO hpaw sheˍ.

Yoˇhanˬ liꞈ 17:3 leh Yaˍkoˆ liꞈ 1:5 gʼaw leh na hkawˇ chi htaꞈ tawˇ yaw daꞈ sheˍ:

• Nawˬ Baˆtiˆsaˬ haꞈ yuˬ gʼa tuˬ aˬ htoꞈ ma gʼa te ve le?

1. Ngaˬ hui awˬ to chiˇ aꞈ piˇ ve lehˬ Yaˬhoˉvaˬ ve kanˉ co co taiˍ taiˍ te gaˇ ve tehꞈ bon lawˬ ve awˬ hkʼaw lo kʼoˆ piˇ ve

2. Ngaˬ hui Baˆtiˆsaˬ haꞈ yuˬ htaˇ, Yaˬhoˉvaˬ htaꞈ awˬ to chiˇ aꞈ piˇ˗oˬ ve tehꞈ shu htaꞈ hpeuꞈ maw piˇ ve

 6. Baˆtiˆsaˬ haꞈ yuˬ htaˇ Yaˬhoˉvaˬ ve yehˬ kʼa hkʼaw ve chaw hpehꞈ la ve

Ngaˬ hui Baˆtiˆsaˬ haꞈ yuˬ peuˬ hkʼawꞈ nawˉ, miˬ guiˬ chi hkʼoˆ Yaˬhoˉvaˬ ve yehˬ kʼa hkʼaw chehˇ la leh teˇ moˍ tiˉ hpehꞈ la ve yoˬ. Ngaˬ hui hkʼaˬ hkʼe ve chaw hpehꞈ leh hkʼaˬ kaˬ lo laˬ ve maˇ kʼoˆ, ngaˬ hui Liꞈ hpu hkʼaw kʼoˆ laˇ ve htaꞈ hkʼa shuˍ yonˍ leh gʼaꞈ te ve yoˬ. Chiˇ mvuh ve liꞈ 25:14 leh 1 Peˍtruˆ liꞈ 2:17 gʼaw leh na hkawˇ chi htaꞈ tawˇ yaw daꞈ sheˍ:

• Baˆtiˆsaˬ haꞈ yuˬ ve lehˬ ngaˬ hui Yaˬhoˉvaˬ leh yawˇ ve chaw geh meuˆ daꞈ ve htaꞈ heuˆ la kuiˬ hkʼaˬ hkʼe cawˬ ve le?

 A yeˇ uiˍ ve awˬ lawn

Yeˍsuˆ kʼoˆ laˇ ve, Hkriꞈ yaˇ lehˬ Baˆtiˆsaˬ gʼa haꞈ yuˬ ve yoˬ. Chaw teˇ gʼaˇ Baˆtiˆsaˬ haꞈ yuˬ gʼa tuˬ Yaˬhoˉvaˬ htaꞈ yonˍ maˇ la tuˬ gʼa te ve, yawˇ ve awˬ liˇ awˬ hkʼaˇ htaꞈ gʼa gʼaꞈ te ve, leh yawˇ htaꞈ awˬ to gʼa chiˇ aꞈ piˇ ve yoˬ.

Kʼawꞈ gʼaꞈ na ve

• Baˆtiˆsaˬ haꞈ yuˬ ve lehˬ aˬ htoꞈ ma kʼoˆ gaˇ ve le? Leh aˬ htoꞈ ma pa taw a yeˇ uiˍ ve le?

• Baˆtiˆsaˬ haꞈ yuˬ ve lehˬ awˬ to chiˇ aꞈ ve htaꞈ hkʼaˬ hkʼe te caˉ daꞈ ve le?

• Chaw teˇ gʼaˇ awˬ to chiˇ aꞈ piˇ leh Baˆtiˆsaˬ haꞈ yuˬ gʼa tuˬ aˬ htoꞈ ma gʼa te ve le?