Tqʼama Jesús qa il tiʼj tuʼn tbautisarin jun xjal tuʼn tok te t-xnaqʼtzbʼen moqa tdiscípulo (uʼjinktza Mateo 28:​19, 20). ¿Tiʼ aju bautismo? ¿Ex tiʼ jaku bʼant tuʼn jun xjal tuʼn tbautisarin?

1. ¿Tiʼ aju bautismo?

Aju yol bautisarin atz tzajni tiʼj jun yol griego ex a t-xilen «tuʼn tkux bʼaj» tjaqʼ aʼ. Tej tbautisarin Jesús, kuxbʼaj t-xmilal toj nim aʼ Jordán ex jatz toj aʼ (Marcos 1:​9, 10). Ax ikx kye axix tok okslal, in kux bʼaj kyxmilal toj aʼ aj kybautisarin.

2. ¿Tiʼ in kubʼ tyekʼin jun xjal aj tbautisarin?

Aj tbautisarin jun xjal, in kubʼ tyekʼin qa o txi tqʼamaʼn te Jehová tuʼn tajbʼen te. ¿Tzeʼn in bʼant jlu tuʼn? Naʼmxtoq tbautisarin, in bʼant jun naʼj Dios tuʼn jatumel in xi tqʼamaʼn te Jehová tuʼn tajbʼen te te jumajx ex qa kbʼel tqʼoʼn tajbʼil tnejel toj tanqʼibʼil. Ax ikx, in kubʼ t-xkʼayin tibʼ «teju tex tajbʼil» ex in nok lepeʼ tiʼj techel kyaj tqʼoʼn Jesús ex in xi tbʼiʼn qe t-xnaqʼtzbʼil (Mateo 16:​24). Aj t-xi tqʼamaʼn jun xjal te Jehová tuʼn tkubʼ tbʼinchaʼn tajbʼil ex aj tbautisarin, in tzaj tqʼoʼn jlu ambʼil te tuʼn tten jun tbʼanel tamiwbʼil tukʼil ex kyukʼil tmajen.

3. ¿Tiʼ il tiʼj tuʼn tbʼant tuʼn jun xjal tuʼn tbautisarin?

Qa in kubʼ t-ximana tuʼn tbautisarina moqa tuʼn tbʼyana, il tiʼj tuʼn tel tnikʼa tiʼj Jehová ex tuʼn tten qʼuqbʼil tkʼuʼja tiʼj (uʼjinktza Hebreos 11:6). Tuʼntzunju, qa mas ma tzʼel tnikʼa tiʼj Jehová ex qa mas ma chʼiy qʼuqbʼil tkʼuʼja tiʼj, mas kʼokel tkʼujlaʼna. Tuʼn jlu kbʼel t-ximana tuʼn tpakbʼana ex tuʼn tanqʼina ik tzeʼn in tzaj tqʼamaʼn Tyol Dios (2 Timoteo 4:2; 1 Juan 5:3). Aj tanqʼin jun xjal ik tzeʼn taj Jehová, jaku kubʼ t-ximen tuʼn t-xi tqʼamaʼn te tuʼn tajbʼen te ex tuʼn tbautisarin (Colosenses 1:​9, 10). a

 QO JYON MAS TQANIL

4. ¿Tiʼ xnaqʼtzbʼil in nel qiʼn tiʼj tbautismo Jesús?

Qo xnaqʼtzan tiʼj alkye tten bautisarin Jesús. Kyuʼjinktze Mateo 3:​13 a 17 ex che yoline kyiʼj xjel lu:

• ¿Junpe tal neʼ Jesús tej tbautisarin?

• ¿Tzeʼn bautisarin? ¿Oʼkxpe jax qʼoʼn chʼin aʼ toj twiʼ?

Tej otoqxi bautisarin Jesús, xi tzyet tuʼn t-xi tbʼinchaʼn aqʼuntl xi toqxenin Jehová te. Kyuʼjinktze Lucas 3:​21 a 23 ex Juan 6:​38, ex che yoline tiʼj xjel lu:

• Tej otoqxi bautisarin Jesús, ¿alkye aqʼuntl mas nim toklen bʼant tuʼn?

5. Jaku bautisarina

Jakulo tzaj xobʼa aj tkubʼ t-ximana tuʼn t-xi tqʼamaʼna te Jehová tuʼn tajbʼena te ex tuʼn tbautisarina. Noqtzun tuʼnj, qa mas ma tzʼel tnikʼa tiʼj Jehová, kʼonil tiʼja tuʼn tkubʼ t-ximana tuʼn tajbʼena te. Tuʼn tok kyojtzqiʼne tiʼ bʼant kyuʼn junjun xjal tuʼn kybautisarin, kyqʼonke kywitze tiʼj VIDEO.

Kyuʼjinktze Juan 17:3 ex Santiago 1:5, ex che yoline tiʼj xjel lu:

• ¿Tiʼ jaku tzʼonin tiʼj jun xjal tuʼn tbʼaj tbʼinchaʼn tten tuʼn tbautisarin?

1. Toj jun naʼj Dios, in xi qqʼamaʼn te Jehová tuʼn qajbʼen te te jumajx.

2. Aj qbautisarin, in kubʼ qyekʼin kywitz txqantl qa o txi qqʼamaʼn te Jehová tuʼn qajbʼen te.

 6. Ktela kyxol tmajen Jehová aj tbautisarina

Aj qbautisarin, in qo ten kyxol tmajen Jehová ateʼ twitz tkyaqil Txʼotxʼ. Noq alkyexku qxeʼchel ex noq tiʼxku o bʼaj qiʼj, aʼyex xnaqʼtzbʼil nimen quʼn ex aʼyex tkawbʼil Jehová in chex qbʼiʼn. Kyuʼjinktze Salmo 25:​14 ex 1 Pedro 2:​17, ex che yoline tiʼj xjel lu:

• Ik tzeʼn in tzaj kyqʼamaʼn versículo lu, ¿tiʼ tbʼanel jaku tzaj qe aj qbautisarin?

 TOJ CHʼIN YOL

Tqʼama Jesús qa il tiʼj tuʼn tbautisarin jun xjal tuʼn tok te t-xnaqʼtzbʼen. Ex tuʼn tbʼant jlu tuʼn, il tiʼj tuʼn tchʼiy qʼuqbʼil tkʼuʼj tiʼj Jehová, tuʼn t-xi tbʼiʼn qe tkawbʼil ex tuʼn t-xi tqʼamaʼn te tuʼn tajbʼen te.

Aju ma qo yolin tiʼj

• ¿Tiʼ aju bautismo ex tiquʼn nim toklen?

• ¿Tiʼ t-xilen aju tuʼn t-xi tqʼamaʼn jun xjal te Jehová tuʼn tajbʼen te ex tuʼn tbautisarin?

• ¿Tiʼ kbʼantel tuʼn jun xjal naʼmxtoq txi tqʼamaʼn te Jehová tuʼn tajbʼen te ex tuʼn tbautisarin?