Yesu ua longesele ngecize, mbatizimu ya pua cinanga ca tondeka kuli Vakua Kilistu. (Tandenu Mateo 28:19, 20.) Vuno mbatizimu, ya pua vika mpundu? Kaha vika na pande ku linga muntu linga a puisemo cinanga caco?

1. Mbatizimu ya pua vika?

Lizi ku “mbatiza” lia tunda ku ciNgelengu, kaha lia lomboloka ku “mbuitika” mu mema. Omo Yesu va mu mbatizile, va mu mbuitikile mu Ndonga ya Yondau kaha “ua tuntukile ku mema.” (Mako 1:9, 10) Ngeci mukemuo, Vakua Kilistu va vusunga navo ve ku va mbatiza mu ku va mbuitika muvila uose mu mema.

2. Vika ue ku muesa muntu nga va mu mbatiza?

Muntu nga va mu mbatiza, ue ku muesa ngecize na lihana kuli Yehova Njambi. Vati ue ku lihana? Ntsimbu kanda li ci hete litangua lia ku mu mbatiza, muntu ue ku vundila kua lika lieni kuli Yehova mu ku mu leka ngecize a tonda ku mu pangela ku miaka yose. Kaha ue ku kulahesa ku lemesa lika Yehova na ku tuameka cizango ceni ku lutue lua viose via linga mu muono. Ue ku hangula ku ‘liviana ivene,’ na ku kava vilongesa via Yesu na lungano lueni. (Mateo 16:24) Ku lihana na ku mu mbatiza, ce ku mu kuasa ku likuata vusamba vua kama na Yehova, kaha na vakuavo vakua ku mu lemesa.

3. Vati muntu a hasa ku kola mu lutsilielo na ku mbatizimu?

Mu hasa ku liviukisila via mbatizimu mu ku tualelelaho ku lilongesa via Yehova kaha na ku kaniamesa lutsilielo luenu muli ikeye. (Tandenu VaHevelu 11:6.) Omo mana enu a ku tantekeya Yehova na ku lutsilielo luenu vi kola kaha na cilemo cenu kuli ikeye ci ka kola. Mua vusunga, evi vi ka mi vuisa cizango ca ku ambuluilako vakuenu vi mu na ku lilongesa kaha na ku yoya muaya vitume via Yehova. (2 Timoteo 4:2; 1 Yoano 5:3) Kaha omo mu mona ngecize muli na ku yoya “ngue ca pande kuli Muangana [Yehova] na ku mu ya ku mutima mu viose” citava mu lihane na ku mi mbatiza.—Kolose 1:9, 10. a

 TANTEKEYENU VIKUAVO

4. Tu hasa ku lilongesa vimo ku mbatizimu ya Yesu

Tandenu Mateo 3:13-17 linga mu tantekeye mizimbu ikuavo ku tuala ha mbatizimu ya Yesu. Kaha simutuilenu ha vihula evi:

• Vuno Yesu ua puile kanike ua mundende mu va mu mbatizile ni?

• Vati va mu mbatizile? Vuno va mu sampangeyele lika mema ni?

Yesu ua putukile cipanga ca ku lifuila ca mu kundikile Njambi hano ha mavu, mu va mu mbatizile. Tandenu Luka 3:21-23 na Yoano 6:38, kaha simutuilenu ha cihula eci:

• Mu nima ya ku mu mbatiza, cipanga cika Yesu ua tuamekele mu muono?

5. Mbatizimu ya pua cinanga ci mu hasa ku puisamo

Ku singanieka ha ku lihana na mbatizimu, ci hasa ku tu vuisa liova ha katete. Vunoni nga mu tualelelaho ku lihakela kapandi, mu hasa ku heta ha ku livua ngecize citava mu puisemo cinanga caco. Linga mu mone vamo va lingilemo, talenu VIDEO.

Tandenu Yoano 17:3 na Tiango 1:5, kaha simutuilenu ha cihula eci:

• Vika vi hasa ku kuasa muntu ku liviukisila via mbatizimu?

1. Ku lihana kuli Yehova, ca pua ku mu leka ngecize tu ka mu pangela ku miaka yose

2. Mu ve ku tu mbatiza, tue ku muesa ku mbunga ngecize tua lihana kuli Njambi

 6. Mbatizimu ya lomboloka ku pua mutamba ua vusoko vua Yehova

Mu ve ku tu mbatiza, tue ku pua mutamba ua vusoko vua Yehova vua likuata kumo mu mavu ose. Vutuhu tua kala ku vihela na visemua vietu via liseza-seza, vunoni tu vose tua tsiliela mu viuma vimo lika kaha tue ku ononoka masiko amo lika. Tandenu Visamo 25:14 na 1 Petulu 2:17, kaha simutuilenu ha cihula eci:

• Vati mbatizimu ya kuata ku vusamba vua muntu na Yehova kaha na ku vakuavo Vakua Kilistu?

 VI MU NA LILONGESA

Yesu ua longesele ngecize Vakua Kilistu va tondeka ku va mbatiza. Linga muntu a puisemo eci cinanga, na pande ku kala na lutsilielo lua ku kaniama muli Yehova, ku yoya muaya vitume vieni kaha na ku lihana kuli Ikeye.

Mpupulule

• Mbatizimu ya pua vika, kaha vika ya puila ya seho?

• Haka ku lihana ca likuatela na mbatizimu?

• Vinanga vika na pande ku puisamo muntu linga a hete ku ku lihana na mbatizimu?