EISHOMO 23
Okubatizibwa n’Ekigyendererwa Kihikire!
Yesu akeegyesa ngu omuntu kubaasa kuba Omukristaayo aine kubatizibwa. (Shoma Matayo 28:19, 20.) Kwonka shi okubatizibwa niki? Omuntu aine kukora ki kuhika aha kigyendererwa ekyo?
1. Okubatizibwa niki?
Ekigambo “okubatiza” omu Rugriika nikimanyisa “okwibika” omu maizi. Obu Yesu yaabatizibwa omu Mugyera Yorudaani, ‘akaruga [ahansi] omu maizi,’ bwanyima y’okwibikwa. (Mako 1:9, 10) Nikyo kimwe, n’Abakristaayo abaabuzima nibabatizibwa barikwibikwa omu maizi.
2. Okubatizibwa nikworeka ki?
Omuntu yaabatizibwa, naayoreka ngu ayehaireyo ahari Yehova Ruhanga. Omuntu naayehayo ata ahari Yehova? Atakabatiziibwe, naashaba omu mubonano, arikugambira Yehova ngu naayenda kumuheereza ebiro byona. Naaraganisa kuramya Yehova wenka n’okwebembeza okukora ebi arikukunda. Kandi naacwamu kweihaho obugabe bwe ‘n’okugumizamu naakuratira’ eky’okureeberaho kya Yesu n’ebi yaayegyeise. (Matayo 16:24) Omuntu yaayehayo akabatizibwa naagira omukago murungi na Yehova n’Abakristaayo bagyenzi be.
3. Omuntu naabaasa kutunguuka ata kuhika aha kubatizibwa?
Noobaasa kwetebeekanisiza okubatizibwa orikwega ahari Yehova, kandi okatandika kumwikiririzamu. (Shoma Abaheburaayo 11:6.) Waayongyera kumanya Yehova n’okumwikiririzamu, noija kwongyera kumukunda. Reero, noija kwenda kubuurira abandi ebirikumukwataho n’okugyendera aha mitindo ye. (2 Timoseo 4:2; 1 Yohaana 5:3) Omuntu yaaba naatwaza “nk’oku aba [Yehova] bashemereire,” kubaasa kumushemeza omu bwijwire, naabaasa kucwamu kwehayo n’okubatizibwa.—Abakolosai 1:9, 10. a
SHWIJUMA GYE
Yetegyereze eki turikubaasa kwegyera aha kubatizibwa kwa Yesu n’oku omuntu arikubaasa kwetebeekanisiza eidaara rikuru eri.
4. Nitubaasa kwegyera aha kubatizibwa kwa Yesu
Shoma Matayo 3:13-17, kumanya obushonshorekye oburikukwata aha kubatizibwa kwa Yesu. Bwanyima garukamu ebibuuzo ebi:
-
Yesu akabatizibwa ari omwereere?
-
Akabatizibwa ata? Mbwenu shi bakamushukaho otwizi?
Yesu ku yaaherize kubatizibwa akatandika kukora omurimo gw’omutaano ogu Yehova yaamuhaire. Shoma Luka 3:21-23 na Yohaana 6:38, kubaasa kugarukamu ekibuuzo eki:
-
Bwanyima ya Yesu kubatizibwa, akeebembeza murimo ki?
5. Okubatizibwa n’ekigyendererwa ekirikubaasika
Omu kubanza, okwehayo okabatizibwa nikibaasa kukutiinisa. Kwonka, noobaasa kutunguuka ohikye aha kugira obumanzi bw’okucwamu aha nshonga nkuru egi. Kubaasa kureeba oku abantu abamwe bakozire ekyo, zaana VIDIYO.
Shoma Yohaana 17:3 na Yakobo 1:5, kubaasa kugarukamu ekibuuzo eki:
-
Niki ekirikubaasa kuhwera omuntu kwetebeekanisiza okubatizibwa?
-
Omuntu naayehayo ahari Yehova arikumugambira ngu naayenda kumuheereza ebiro byona
-
Omuntu yaaba naabatizibwa, abareebi nibwo barikumanya ngu ayehaireyo ahari Ruhanga
6. Omuntu yaabatizibwa naaba omwe aha b’eka ya Yehova
Omuntu yaabatizibwa naayegaita aha ka emwe omu nsi yoona eine obumwe. N’obu turaabe nituruga omu myanya etarikushushana kandi tukuriire omu mbeera zitarikushushana, nitwikiriza ebirikushushana, kandi nitugyendera aha mitindo erikushushana ey’emicwe. Shoma Zaaburi 25:14 na 1 Petero 2:17, kubaasa kugarukamu ekibuuzo eki:
-
Okubatizibwa nikukwata kuta aha mukago gw’omuntu na Yehova n’abandi abarikumuramya?
ABAMWE NIBAGIRA NGU: “Tinyeteekateekire kubatizibwa.”
-
Ku oraabe nikwo orikwehurira otyo, nooreeba ngu okubatizibwa n’ekigyendererwa eki oine kutaho?
OMU BUGUFU
Yesu akeegyesa ngu Abakristaayo baine kubatizibwa. Omuntu kubaasa kubatizibwa, aine kuba naikiririza kimwe omuri Yehova, arikugyendera aha mitindo ye, kandi ayehaireyo ahariwe.
Okweijutsya
-
Okubatizibwa niki, kandi ahabw’enki nikwetengyesa?
-
Okwehayo n’okubatizibwa biine kakwate ki?
-
Ni madaara ki agarikuhitsya aha kwehayo n’okubatizibwa?
JUMBURA EBINDI
Manya eki kirikumanyisa okubatizibwa n’eki kitarikumanyisa.
Manya oku omuntu arikubaasa kutunguuka kuhika aha kubatizibwa.
“Okugirira Yehova Rukundo n’Okusiima Nibihitsya aha Kubatizibwa” (Omunaara gw’Omurinzi, Maaci 2020)
Reeba oku okucwamu kw’omushaija omwe kubatizibwa kwabaire nikwegamira aha kirikukira okugira enyehurira.
“Bakaba Nibenda ngu Nyemanyire Amazima” (Omunaara gw’Omurinzi, Febwari 1, 2013)
Yetegyereze ahabw’enki okubatizibwa n’ekigyendererwa kihikire, n’oku orikubaasa kukwetebeekanisiza.
“Nyine Kubatizibwa Shi?” (Eminyeeto Nibabuuza—Eby’okugarukamu Ebirikukora, aka 2, eshuura 37)
a N’obu omuntu yaakuba yaabatiziibwe omu diini endiijo, naaba aine kugaruka kubatizibwa. Ahabw’enki? Ahakuba ediini egyo ekaba etarikwegyesa amazima ga Baibuli.—Reeba Ebyakozirwe 19:1-5 n’Eishomo 13.
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
