Jesuspa nisqan jina, paypa discipulon kananchispaqqa bautizakunanchismi (leey Mateo 28:19, 20). Ichaqa, ¿iman bautizakuy? ¿Imatan ruwana bautizakunapaq?

1. ¿Iman bautizakuy?

Bautizakuy simiqa “unuman chinkaykuy” ninantan nin. Jesuspas bautizakushaspaqa Jordán mayupin unuman chinkaykachisqa karqan, chaymantataq “unumanta lloqsimurqan” (Marcos 1:9, 10). Jesusta cheqaq qatikuqkunapas chhaynatan bautizakunanku, unumanmi chinkaykachisqa kananku.

2. ¿Imaraykun bautizakunanchis?

Manaraq bautizakushaspaqa Jehová Diosmanmi entregakunanchis. ¿Imaynatan payman entregakusunman? Chaypaqqa sapallanchispin Diosman promesata ruwananchis payllata wiñay-wiñaypaq servinanchispaq, paypa munayninta ñaupaqman churananchispaqwan. Chaymantapas allintan yuyaykunanchis Jesuspa yachachisqanman jina kausananchispaq. Paymi nirqan: “Pipas qhepayta jamuyta munaqqa pay kikinta negakuchun, jinaspa [...] qhepayta jamushallachun”, nispa (Mateo 16:24). Bautizakuqtinchismi lliupas yachanqaku Jehová Diosman entregakusqanchista. Bautizakuspan Dioswanpas payta serviqkunawanpas juj sonqolla munanasqa kasunchis.

3. ¿Imatan ruwanayki bautizakunaykipaq?

Bautizakuyta munanki chayqa, Jehová Diosmantan allinta yachanayki, jinaspa paypi tukuy sonqo iñinayki (leey Hebreos 11:6). Sichus Jehová Diosmanta astawan yachanki, astawantaq paypipas iñinki chayqa, astawanmi payta munakunki. Chhaynapitaq kallpachakunki jujkunaman Diosmanta willanaykipaq, kamachikuyninkunata kasukunaykipaqpas (2 Timoteo 4:2; 1 Juan 5:3). “Jehová Diospaq jina” kausanki chayqa, atiwaqmi Diosman entregakuspa bautizakuyta (Colosenses 1:9, 10). a

 ASTAWAN YACHASUNCHIS

4. ¿Imatan yachasunman Jesuspa bautizakusqanmanta?

Jesuspa bautizakusqanmanta astawan yachanapaq leeychis Mateo 3:13-17 textota, jinaspa jamuq tapuykunaman jina parlariychis:

• ¿Wawallaraq kashaspachu Jesús bautizakurqan?

• ¿Juj chhikan unuchatachu umanman ch’aqchurqanku? ¿Imayna bautizasqataq karqan?

Jesusqa bautizakusqan qhepamanmi Diospa qosqan llank’ayta ruwayta qallarirqan. Leeychis Lucas 3:21-23; Juan 6:38 textokunata, jinaspa jamuq tapuyman jina parlariychis:

• ¿Ima llank’aytan Jesús tukuy sonqo ruwarqan bautizakusqan qhepaman?

5. Llapanchispas atisunmanmi bautizakuytaqa

Qallariypiqa yaqapaschá manchakusunman Diosman entregakuyta bautizakuytapas. Ichaqa, sichus Jehová Diosmanta yachashallanki chayqa astawanmi payta reqsinki, chaymi kallpachasunki Diosman entregakuspa bautizakunaykipaq. Chaymanta yachanapaq VIDEOTA qhawaychis.

Leeychis Juan 17:3; Santiago 1:5 textokunata, jinaspa jamuq tapuyman jina parlariychis:

• ¿Iman yanapawasunman bautizakunanchispaq?

1. Jehová Diosman entregakunapaqqa sapallanchispin payman prometekunanchis wiñaypaq payta servinanchispaq.

2. Bautizakuqtinchismi lliupas yachanqaku Jehová Diosman entregakusqanchista.

 6. Bautizakuqtinchisqa Jehová Diospa familianmi familianchis kapun

Bautizakuspaqa mundontinpi askha familiamanmi jaykushanchis. May llaqtamantaña, ima colorniyoqña kasunman chaypas chay familiapiqa sumaqtan kausasun, Bibliapi kamachikuykunaq yuyaychaykunaq kasqanman jina kausasun. Leeychis Salmos 25:14; 1 Pedro 2:17 textokunata, jinaspa jamuq tapuyman jina parlariychis:

• Kay versiculokunapi nisqanman jina, ¿ima bendicionkunatan chaskinki bautizakuspa?

 IMATAN YACHAMURQANCHIS

Jesuspa qatikuqnin kananchispaqqa bautizakunanchispunin. Chaypaqmi ichaqa Jehová Diospi tukuy sonqo iñinanchis, kamachikuyninkunata kasukunanchis, paymantaqmi entregakunanchis.

Yuyarisun

• ¿Iman bautizakuy? ¿Imaraykun bautizakunanchispuni?

• ¿Imaraykun manaraq bautizakushaspa Diosman entregakunanchis?

• ¿Imakunatan ruwana Diosman entregakunapaq bautizakunapaqpas?