Hi Jesus nagtutdo nga an mga Kristiano kinahanglan magpabawtismo. (Basaha an Mateo 28:19, 20.) Pero ano an bawtismo? Ngan ano an kinahanglan buhaton han usa basi makab-ot ito nga tumong?

1. Ano an bawtismo?

An pulong nga “bawtismo” tikang ha Griego nga pulong nga nangangahulogan nga “pagtunlob” ha ilarom han tubig. Han ginbawtismohan hi Jesus, ginpailarom hiya ha tubig ha Salog Jordan, katapos, ‘hinaw-as hiya ha tubig.’ (Marcos 1:9, 10) Pariho kan Jesus, an tinuod nga mga Kristiano ginbabawtismohan pinaagi ha bug-os nga pagtunlob, o pagpailarom, ha tubig.

2. Ano an iginpapakita han bawtismo?

Pinaagi ha pagpabawtismo, iginpapakita han usa nga tawo nga igindedikar na niya an iya kalugaringon kan Jehova nga Dios. Paonan-o ginhihimo han usa nga tawo an dedikasyon? Antes magpabawtismo, iya iginsusumat kan Jehova ha pribado nga pag-ampo nga karuyag niya mag-alagad ha Iya ha waray kataposan. Nagsasaad hiya nga hi Jehova gud la an iya sisingbahon ngan an pagbuhat han kaburut-on han Dios amo an magigin pinakaimportante ha iya kinabuhi. Nagdidesisyon hiya nga ‘isasalikway niya an iya kalugaringon ngan padayon nga susundon’ an mga katutdoan ngan ehemplo ni Jesus. (Mateo 16:24) An iya dedikasyon ngan bawtismo mabulig ha iya basi magin duok nga sangkay ni Jehova ngan han iya mga igkasi-magsiringba.

3. Ano an kinahanglan buhaton han usa nga tawo antes magpabawtismo?

Antes magpabawtismo, importante nga makilala mo hi Jehova ngan magkaada marig-on nga pagtoo ha iya. (Basaha an Hebreo 11:6.) Samtang nag-uuswag an imo kahibaro ngan nagtitikarig-on an imo pagtoo, magtitikahilarom liwat an imo gugma kan Jehova. Waray ruhaduha nga maruruyag ka magsangyaw mahitungod ha iya ngan magkinabuhi uyon ha iya mga suruklan. (2 Timoteo 4:2; 1 Juan 5:3) Kon an usa nga tawo nagkikinabuhi na nga “takos kan Jehova para bug-os nga mapalipay hiya,” posible hiya magdesisyon nga idedikar an iya kinabuhi ha Dios ngan magpabawtismo.—Colosas 1:9, 10. a

 DUGANG NGA USISAHA

4. An aton mahibabaroan ha bawtismo ni Jesus

Basaha an Mateo 3:13-17 basi mahibaro hin dugang nga mga detalye mahitungod han bawtismo ni Jesus. Katapos, hisguti niyo ini nga mga pakiana:

• Minasus-an pa ba hi Jesus han ginbawtismohan hiya?

• Paonan-o hiya ginbawtismohan? Ginwisikan la ba hiya hin tubig?

Gintikangan ni Jesus pagbuhat an espesyal nga buruhaton nga ginhatag han Dios ha iya dinhi ha tuna han nabawtismohan hiya. Basaha an Lucas 3:21-23 ngan Juan 6:38, katapos, hisguti niyo ini nga pakiana:

• Katapos mabawtismohan hi Jesus, ano nga buruhaton an pinakaimportante ha iya kinabuhi?

5. Bawtismo—tumong nga kaya mo kab-uton

An dedikasyon ngan bawtismo baga hin makuri hunahunaon ha siyahan. Pero puydi ka mag-uswag tubtob ha punto nga may kompyansa ka na nga himoon ito nga importante nga desisyon. Basi makita an pipira nga naghimo hito, i-play an VIDEO.

Basaha an Juan 17:3 ngan Santiago 1:5, katapos, hisguti niyo ini nga pakiana:

• Ano an makakabulig ha usa nga tawo basi magin andam hiya ha pagpabawtismo?

1. Nagdidedikar kita kan Jehova pinaagi ha pagsumat ha iya nga karuyag naton mag-alagad ha iya ha waray kataposan

2. Ha aton bawtismo, iginpapakita naton ha publiko nga nagdedikar na kita ha Dios

 6. An pagpabawtismo nangangahulogan nga bahin ka na han pamilya ni Jehova

Kon nagpapabawtismo kita, nagigin bahin kita han usa nga nagkakaurosa nga pamilya ha bug-os nga kalibotan. Bisan kon iba-iba an aton gintikangan, parapriho an aton gintotoohan ngan nagkikinabuhi kita uyon ha pariho nga mga suruklan ha moral. Basaha an Salmo 25:14 ngan 1 Pedro 2:17, katapos, hisguti niyo ini nga pakiana:

• Paonan-o an pagpabawtismo nakakaapekto ha relasyon han usa nga tawo kan Jehova ngan ha iba pa nga nagsisingba ha Iya?

 SUMARYO

Igintutdo ni Jesus nga an mga Kristiano kinahanglan magpabawtismo. Basi makab-ot ito nga tumong, an usa kinahanglan magkaada marig-on nga pagtoo kan Jehova, magkinabuhi uyon ha Iya mga suruklan, ngan magdedikar han iya kalugaringon ha Iya.

Repaso

• Ano an bawtismo, ngan kay ano nga importante ito?

• Ano an iginpapakita han bawtismo?

• Ano an kinahanglan buhaton han usa nga tawo antes han iya dedikasyon ngan bawtismo?