KAPITE 23
Te Papitema ʼe Ko He Tonu Lelei Ia
Neʼe ui e Sesu ki ʼana tisipulo ʼe tonu ke natou papitema. (Lau ia Mateo 28:19, 20.) Kae kotea te fakaʼuhiga ʼo te papitema? Pea kotea ʼe tonu ke fai e he tahi ke ina fakahoko te fakatuʼutuʼu ʼaia?
1. Kotea te fakaʼuhiga ʼo te papitema?
Ko te kupu “papitema” ʼe haʼu mai te kupu Fakakeleka ko tona fakaʼuhiga “uku.” ʼI te papitemaʼi ʼo Sesu, neʼe fakauku katoa tona sino ʼi te Vai Tafe ʼo Solotane pea neʼe ‘hake ake mai te vai.’ (Maleko 1:9, 10) Neʼe toe fai feia mo te kau Kilisitiano moʼoni. Neʼe natou papitema ʼo fakauku katoa ʼonatou sino ʼi te vai.
2. Kotea ʼe ke fakaha moka ke papitema?
Ka ke papitema, ʼe ke fakaha ai kua ke foaki tou maʼuli kia Sehova. ʼO feafeaʼi? ʼI muʼa ʼo tau papitema, ʼe ke faikole tokotahi kia Sehova pea ʼe ke ui age ʼe ke fia tauhi tuʼumaʼu pe kia te Ia. ʼE ke fakapapau kia te ia ʼe ke tauhi ʼateaina pe anai kia te ia pea ʼe ke fakamuʼamuʼa anai ʼi tou maʼuli ia te fai ʼo tona finegalo. Neʼe ‘ke fakafisi kia koe totonu kae ke haga muliʼi’ te ʼu akonaki ʼa Sesu pea mo tana faʼifaʼitaki. (Mateo 16:24) Koia, ka ke foaki tou maʼuli kia Sehova pea mo papitema, ʼe malohi anai ʼau felogoi mo ia ʼo feia mo natou ʼae ʼe tauhi kia te ia.
3. Kotea ʼe tonu ke ke fai ʼi muʼa ʼo tau papitema?
ʼE tonu ke ke ako ke ke iloʼi ia Sehova pea ke malohi tau tui kia te ia. (Lau ia Hepeleo 11:6.) Ka ke iloʼi lelei ia Sehova pea mo tuputupu tau tui, pea ʼe toe malohi age anai tou ʼofa kia te ia. ʼE ke fia faifakamafola anai pea mo maʼuliʼi ʼana pelesepeto. (2 Timoteo 4:2; 1 Soane 5:3) Koia, ka ke “fai te ʼu meʼa ʼae ʼe tuha mo natou ʼae ʼe atolasio kia Sehova, moʼo fakafiafiaʼi tona loto,” ʼe ke fia foaki anai tou maʼuli kia te ia pea mo papitema.—Kolose 1:9, 10. a
TA FAKALOLOTO
Ta vakaʼi he ʼu ako mai te papitema ʼo Sesu pea mo te meʼa ʼae ʼe tonu ke fai ke kita tokalelei ai ki te papitema.
4. Te ʼu ako mai te papitema ʼo Sesu
Lau ia Mateo 3:13-17 ke iloʼi ai pe neʼe feafeaʼi te papitema ʼo Sesu. Pea fai te ʼu fehuʼi ʼaeni:
-
Neʼe papitemaʼi koa ia Sesu kae kei meamea?
-
Neʼe feafeaʼi tona papitemaʼi? Neʼe huaʼi pe koa he moʼi vai ki tona ʼulu?
ʼI te ʼosi papitema ʼo Sesu, neʼe ina fakahoko leva te gaue ʼae neʼe tuku age e te ʼAtua. Lau ia Luka 3:21-23 mo Soane 6:38, pea fai te fehuʼi ʼaeni:
-
Hili te papitema ʼo Sesu, kotea te gaue neʼe ina fakamuʼamuʼa ʼi tona maʼuli?
5. Te papitema ʼe ko he tonu lelei ia
ʼE lagi ʼi te kamata ʼe ke tuʼania ʼi te foaki tou maʼuli kia Sehova pea mo papitema. Kae ʼaki te temi, ʼe ke fai anai ni faiga ʼo kaku pe ki te ʼaho ʼae kua ke tokalelei ai. Neʼe lava fakahoko e ʼihi te faʼahi maʼuhiga ʼaia, vakaʼi te ʼATA VITEO.
Lau ia Soane 17:3 mo Sakopo 1:5, pea fai te fehuʼi ʼaeni:
-
Kotea ʼe tonu ke kita fai ke kita tokalelei ki te papitema?
-
Ka kita foaki tokita maʼuli kia Sehova, ko tona fakaʼuhiga ʼe kita fia tauhi tuʼumaʼu pe kia te ia
-
Ka kita papitema, ʼe kita fakaha ia muʼa ʼo te kaugā malie kua kita foaki tokita maʼuli ki te ʼAtua
6. Ka kita papitema ʼe kita kau ki te famili ʼo Sehova
Ka tou papitema, ʼe tou kau ki he foʼi famili fakamalamanei ʼe logo tahi. Logo la ʼe tou ʼomai mai te ʼu fenua kehekehe, kae ʼe tatau te ʼu akonaki ʼe tou tui ki ai ʼo feia mo te ʼu pelesepeto ʼae ʼe tou maʼuliʼi. Lau ia Pesalemo 25:14 mo 1 Petelo 2:17, pea fai te fehuʼi ʼaeni:
-
Ka ke papitema, ʼe feafeaʼi anai ʼau felogoi mo Sehova ʼo feia mo natou ʼae ʼe tauhi kia te Ia?
ʼE UI E ʼIHI: “ʼE heʼeki au tokalelei au ki te papitema.”
-
Kapau ʼe ke toe logoʼi te faʼahi ʼaia, ʼe ke manatu koa ko te papitema ʼe ko he tonu lelei ʼaia?
MANATU TAFITO
Neʼe ui e Sesu ki ʼana tisipulo ʼe tonu ke natou papitema. Kapau ʼe kita fia fakahoko te fakatuʼutuʼu ʼaia, ʼe tonu ke malohi takita tui kia Sehova, mo maʼuliʼi ʼAna pelesepeto pea mo foaki tokita maʼuli kia te Ia.
Fehuʼi Fakamanatu
-
Kotea te fakaʼuhiga ʼo te papitema? He koʼe ʼe maʼuhiga ke kita papitema?
-
Kotea te pikipikiga ʼo te foaki tokita maʼuli ki te ʼAtua pea mo te papitema?
-
Kotea ʼe tonu ke kita fai ʼi muʼa ʼo takita foaki tokita maʼuli ki te ʼAtua pea mo papitema?
TE TAHI ʼU MANATU
He tahi ʼu manatu ʼe moʼoni ʼo ʼuhiga mo te papitema.
He ʼu tokoni ʼaoga ke tuputupu he tahi ʼo kaku ki te papitema.
Neʼe mahino he tagata ko te papitema ʼe ko he tonu maʼuhiga ia.
“Neʼe Nā Loto Ke Au Maʼu e Au Totonu Te Moʼoni” (Ko Te Tule Leʼo ʼaho 1 ʼo ʼApelili 2013)
He koʼe ko te papitema ʼe ko he tonu lelei? ʼE feafeaʼi hau tokalelei ki te faʼahi ʼaia?
a Kapau neʼe papitemaʼi he tahi ʼi he tahi age lotu, ʼe tonu ke toe papitemaʼi. Kotea tona tupuʼaga? He neʼe mole fakaha e te lotu ʼaia ia te moʼoni ʼae ʼe tuʼu ʼi te Tohi-Tapu.—Vakaʼi ia Gaue 19:1-5 pea mo te Kapite 13.