PWONY ME 24

Lok Ada Madok i kom Lumalaika

TUKI

Jehovah mito ni wapwony lok i kom jo me ode ma gitye i polo. I kin jo me ode tye iye lumalaika, ma kilwongogi ni “awobe pa Lubanga.” (Yubu 38:7) Baibul pwonyo gin ango madok i kom lumalaika? Gigudo kwo pa dano nining? Tika lumalaika ducu gitye i kin jo me ot pa Lubanga?

1. Lumalaika gubedo angagi?

Jehovah ocweyo lumalaika ma peya ocweyo lobo. Calo Lubanga, gin bene gubedo cwec me cwiny ma gikwo i polo. (Jo Ibru 1:14) Tye lumalaika milion mapol ata, dok lamalaika acel acel kite pat. (Niyabo 5:11) ‘Gilubo cik pa Jehovah, kun giwinyo lok ducu ma en waco botgi.’ (Jabuli 103:20) I kare macon, Jehovah onongo i kine mogo cwalo lumalaika me tero kwenane bot dano ki me miyo kony kacel ki laro jone. I kare-ni, lumalaika gitiro Lukricitayo me cito bot jo ma gitye ki miti me pwonyo lok i kom Lubanga.

2. Catan ki jogine gubedo angagi?

Lumalaika mogo pe gugwoko gennegi bot Jehovah. Lamalaika me acel ma ojemo obedo en “ma gilwongo ni Ladot, ki Catan, labwol dano ma i wi lobo ducu.” (Niyabo 12:9) Catan onongo mito loyo jo mukene, pi meno en obwolo Adam ki Kawa dok lacen en obito kadi wa lumalaika mukene me jemo i kom Jehovah. Lumalaika ma lujemo magi kilwongogi ni jogi. Jehovah oryemogi woko ki i polo ci gubino i lobo, dok kibijwerogi woko.—Kwan Niyabo 12:9, 12.

3. Catan ki jogine gibwolo dano nining?

Catan ki jogine gibwolo dano mapol kun gitiyo ki tim tyet nyo tim jokjok, ma obedo kubbe ki jogi, atir atir, nyo ma iwok ki bot ngat mukene. Ento pol pa dano ma gitimo tim meno pe gingeyo lok ada man. Me labolle, jo mogo giyenyo kony ki bot lutyet ki lakalatwe, megi jogi, jo ma giwacci gingeyo jami ma dano adana pe romo ngeyo, nyo ajwagi. Jo mukene giyenyo yo me cango two ma kubbe ki tim tyet. Catan ki jogine bene gibwolo dano me tamo ni gitwero lok ki jo muto. a Ento Jehovah ocikowa ni: “Pe wulokke wudok bot lukor tipo ki megi jogi, pe wucit ka yenyogi.” (Lulevi 19:31) En ocikowa kit man me konyowa me gwokke ki i kom bwola pa Catan ki jogine. Gin gubedo lumone pa Lubanga, dok gimito wanowa.

NONG NGEC MATUT

Nong pwony madok i kom jami mabeco ma lumalaika gitimo, rac pa tim jokjok, ki kit ma itwero gwokke kwede ki i kom Catan ki jogine.

4. Lumalaika gikonyo dano me pwonyo lok i kom Jehovah

Lumalaika pa Lubanga pe gitito kwena gin kikomgi bot dano. Me ka meno, gitwero tiro lutic pa Lubanga me cito bot jo ma gimito pwonyo lok i kom Lubanga. Kwan Niyabo 14:6, 7, ci wunyam lapeny magi:

Pingo wamito kony ki bot lumalaika me tito kwena?
Tika cuko cwinyi me ngeyo ni lumalaika gitwero konyowa me nongo jo ma gitye ka yenyo ada? Pingo?

5. Kwer tim jokjok

Catan ki jogine gubedo lumone pa Jehovah. Gubedo lumonewa bene. Kwan Luka 9:38-42, ci wunyam lapeny man:

Jogi mono gitimo dano nining?

Pe wamito ni wami kare ki jogi me bedo ki twero i komwa. Kwan Nwoyo Cik 18:10-12, ci i ngeye wunyam lapeny magi:

I yo mene ma jogi gitemme kwede me kubbe kwedwa nyo bedo ki twero i kwowa? Kodi tim mene ma dano maro i kabedowu ma kubbe ki tim jokjok?
Tika itamo ni ber ni Jehovah gengowa ki timo gin mo keken ma kubbe ki tim jokjok? Pingo itamo kit meno?

Tuk VIDIO, ci wunyam lapeny ma lubo-ni.

VIDIO: “Wulweny Matek ki Catan” (5:02)

Itamo ni gin ma Pamela oruko i ngut cing latinne-ni onongo rac? Pingo?
Ngo ma onongo mitte ni Pamela otim wek ogwokke ki i kom jogi?

Lukricitayo me ada kare ducu gikwero gin mo keken ma kubbe ki jogi. Kwan Tic pa Lukwena 19:19 ki 1 Jo Korint 10:21, ci wunyam lapeny man:

Pingo pire tek ni iwang gin mo keken ma itye kwede ma kubbe ki tim jokjok?

6. Lo lweny i kom Catan ki jogine

Catan aye obedo lalo wi jogi. Ento lumalaika ma lugen gitye i te tela pa Mikael lamalaika madit, ma meno nying Yecu mukene. Mikael tye ki teko marom mene? Kwan Niyabo 12:7-9, ci wunyam lapeny magi: