NÍ KASEMI 24
Mɛnɔmɛ Ji Bɔfohi, Nɛ Mɛni A Tsuɔ?
Yehowa suɔ nɛ waa le níhi fuu kɛ kɔ e weku nɛ ngɛ hiɔwe ɔ he. Bɔfohi piɛɛ Mawu weku ɔ he, nɛ a tsɛɛ bɔfo nɛ ɔmɛ hu ke “Mawu bimɛ.” (Hiob 38:7) Mɛni Baiblo ɔ de ngɛ bɔfo ɔmɛ a he? Mɛni bɔfohi peeɔ? Anɛ bɔfo ɔmɛ tsuo piɛɛ Mawu weku ɔ he lo?
1. Mɛnɔmɛ Ji Bɔfohi?
Yehowa bɔ bɔfohi loko e bɔ zugba a. Bɔfo nɛ ɔmɛ ngɛ hiɔwe, nɛ kaa bɔ nɛ wa be nyɛe maa na Yehowa kɛ wa hɛngmɛ ɔ, jã kɛ̃ nɛ bɔfo ɔmɛ hu wa be nyɛe maa na mɛ kɛ wa hɛngmɛ. (Hebri Bi 1:14) Bɔfohi ayɔhi abɔ lɛ ngɛ, nɛ a kpɛti nɔ fɛɛ nɔ ngɛ slɔɔto. (Kpo Jemi 5:11) Bɔfo ɔmɛ ‘buɔ Yehowa nɛ a yaa tsɔmi ha lɛ.’ ( La 103:20) Blema a, Yehowa tsɔɔ e bɔfo ɔmɛ nɛ a ngɔɔ sɛ gbi kɛ ba haa e we bi ngɛ zugba a nɔ, a yeɔ bua mɛ, nɛ jehanɛ ɔ se hu ɔ, a poɔ a he piɛ. Mwɔnɛ ɔ, bɔfo ɔmɛ kudɔɔ Kristofohi kɛ yaa nihi nɛ a suɔ kaa a maa kase Mawu he ní ɔ a ngɔ.
2. Mɛnɔ ji Satan, nɛ mɛnɔmɛ ji e daimonio ɔmɛ?
Bɔfo komɛ yi Yehowa anɔkuale. Bɔfo nɛ e tsɔ atuã kekleekle ɔ ji, ‘nɔ nɛ a tsɛɛ lɛ ke Abosiami kɛ Satan nɛ e ngɛ nihi nɛ a ngɛ zugba a nɔ ɔ sisie ɔ.’ (Kpo Jemi 12:9) Satan suɔ kaa e maa ye ni kpahi a nɔ, enɛ ɔ he ɔ, e sisi Adam kɛ Hawa, nɛ pee se ɔ, e sisi bɔfo kpahi hulɔ nɛ a gbo Mawu tue. A tsɛɛ bɔfo atuã tsɔli nɛ ɔmɛ ke daimoniohi. Yehowa fiee mɛ kɛ je hiɔwe kɛ ba zugba a nɔ, nɛ e be kɛe nɛ e ma kpata a hɛ mi.—Kane Kpo Jemi 12:9, 12.
3. Mɛni blɔhi a nɔ nɛ Satan kɛ e daimonio ɔmɛ bɔɔ mɔde kaa a maa gu kɛ sisi wɔ?
Satan kɛ e daimonio ɔmɛ bɔɔ mɔde kaa a maa sisi nihi fuu. A guɔ blɔ slɔɔtohi a nɔ kɛ peeɔ jã konɛ nihi kɛ mumi yayamihi nɛ sɛɛ ní. Kaa nɔ hyɛmi nɔ́ ɔ, ni komɛ ya biɔ ní ngɛ dodoe mi hyɛli, klaali, kunya tsuli kɛ wɔtsɛmɛ a ngɔ. Ni komɛ hu hlaa hiɔ tsami komɛ nɛ́ kɛ mumi yayamihi ngɛ tsakpa. A sisiɔ nihi hulɔ konɛ a he ye kaa a kɛ gbogboe ɔmɛ ma nyɛ maa tu munyu. Se Yehowa bɔ wɔ kɔkɔ ke: “Nyɛ ko ya bi ní ngɛ klaali kɛ kunya yeli a ngɔ.” (3 Mose 19:31) E kɛ kɔkɔ bɔmi nɛ ɔ ha wɔ konɛ e kɛ po wa he piɛ kɛ je Satan kɛ e daimonio ɔmɛ a he. A ji Mawu he nyɛli, nɛ a suɔ kaa a maa ye wɔ awi.
MOO KASE BABAUU
Moo kase ní kpakpahi nɛ bɔfohi peeɔ, oslaahi nɛ ngɛ mumi yayami kɛ ní tsumi he, kɛ bɔ nɛ wa maa pee ha kɛ po wa he piɛ ngɛ Satan kɛ e daimonio ɔmɛ a he ɔ he ní.
4. Bɔfo ɔmɛ yeɔ bua nihi konɛ a kase Yehowa he ní
Mawu bɔfo ɔmɛ fiɛɛ we kɛ ha we nihi tɛɛ, mohu ɔ, a kudɔɔ Mawu sɔmɔli kɛ yaa nihi nɛ a suɔ kaa a maa kase Mawu he ní ɔ a ngɔ. Nyɛɛ kane Kpo Jemi 14:6, 7 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
-
Mɛni he je nɛ wa hia bɔfo ɔmɛ a yemi kɛ buami ke wa ngɛ fiɛɛe ɔ?
-
Amlɔ nɛ ɔ nɛ o ba le kaa bɔfo ɔmɛ ma nyɛ ma kudɔ mo kɛ ya nihi nɛ a suɔ kaa a maa nu Baiblo ɔ mi sɛ gbi ɔ a ngɔ ɔ wui mo he wami lo? Mɛni he je?
5. Mo kua mumi yayami kɛ ní tsumi
Satan kɛ e daimonio ɔmɛ ji Yehowa he nyɛli, nɛ a ji wɔ hu wa he nyɛli. Nyɛɛ kane Luka 9:38-42 ɔ, nɛ nyɛ susu sane bimi nɛ ɔ he:
-
Mɛni daimonio ɔmɛ peeɔ nihi?
Wa sume kaa waa kɛ daimonio ɔmɛ maa bɔ ngɛ blɔ ko blɔ ko nɔ. Nyɛɛ kane 5 Mose 18:10-12 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
-
Mɛni blɔhi nɛ daimonio ɔmɛ bɔɔ mɔde kaa a maa gu nɔ kɛ ná wa nɔ he wami, nɛ́ a kɛ wɔ nɛ tu munyu? Ní peepee nɛ ɔmɛ a kpɛti te nɛɛ lɛ pɔ he ngɛ he nɛ o ngɛ ɔ?
-
Ke o hyɛ ɔ, nile ngɛ kɔkɔ bɔmi nɛ Yehowa kɛ ha wɔ kaa waa kɛ mumi yayamihi nɛ ko tsu ní ɔ mi lo? Mɛni he je?
Mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.
-
Anɛ o susu kaa oslaa ngɛ sɛbɛ nɛ Palesa fĩ kɛ wo e bi ɔ nine si ɔ he lo? Mɛni he je?
-
Mɛni e sa nɛ Palesa nɛ pee kɛ po e he piɛ ngɛ daimonio ɔmɛ a he?
Anɔkuale Kristofohi yuɔ a he ngɛ daimonio ɔmɛ a he. Nyɛɛ kane Ní Tsumi 19:19 kɛ 1 Korinto Bi 10:21 ɔ, nɛ nyɛ susu sane bimi nɛ ɔ he:
-
Mɛni he je nɛ e he hia nɛ o puɛ nɔ́ fɛɛ nɔ́ nɛ e ngɛ o dɛ nɛ́ e kɛ mumi yayamihi ngɛ tsakpa a?
6. Moo ye Satan kɛ e daimonio ɔmɛ a nɔ kunimi
Satan lɛ e ngɛ daimonio ɔmɛ a nɔ yee. Se bɔfo anɔkualetsɛmɛ ɔmɛ lɛɛ, Yesu nɛ a tsɛɛ lɛ hu ke bɔfo nɔkɔtɔma Mikael ɔ ji a hɛ mi nyɛɛlɔ. Kɛ Mikael ngɛ he wami ha kɛɛ? Nyɛɛ kane Kpo Jemi 12:7-9 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
-
Mɛnɔ lɛ e ngɛ he wami pe kulaa? Mikael kɛ e bɔfo ɔmɛ, aloo Satan kɛ e daimonio ɔmɛ?
-
Anɛ o susu kaa e sa nɛ Yesu se nyɛɛli nɛ a ye Satan kɛ daimonio ɔmɛ gbeye lo?
O ma nyɛ maa ye Satan kɛ e daimonio ɔmɛ a nɔ kunimi. Nyɛɛ kane Yakobo 4:7 ɔ, nɛ nyɛ susu sane bimi nɛ ɔ he:
-
Mɛni o ma nyɛ maa pee kɛ po o he piɛ kɛ je Satan kɛ e daimonio ɔmɛ a he?
NI KOMƐ DEƆ KE: “Tɔmi ko be he kaa wa ma fiɛ kɔmpiuta nɔ fiɛmihi aloo wa maa hyɛ sinihi nɛ mumi yayamihi a ní peepeehi ngɛ mi. Waa kɛ jeɔ wa hɛ ja kɛkɛ.”
-
Mɛni he je nɛ oslaa ngɛ susumi nɛ ɔ he ɔ?
NYA MWƆMI
Bɔfo anɔkualetsɛmɛ ɔmɛ yeɔ bua wɔ. Satan kɛ e daimonio ɔmɛ ji Yehowa he nyɛli, nɛ a guɔ ní peepeehi nɛ́ kɛ mumi yayami ngɛ tsakpa a nɔ kɛ sisiɔ nihi.
Mi Nylɔmi
-
Kɛ Yehowa bɔfo ɔmɛ ngɛ nihi ye buae ha kɛɛ konɛ a kase e he ní?
-
Mɛnɔ ji Satan, nɛ mɛnɔmɛ ji e daimonio ɔmɛ ɔ?
-
Mɛni he je nɛ o suɔ nɛ o yu o he kulaa kɛ je mumi yayami kɛ ní tsumi he ɔ?
NÍ KPAHI NƐ MAA YE BUA MO
Moo kane nɔ́ nɛ ha nɛ wa ná nɔ mi mami kaa Yesu ji bɔfo nɔkɔtɔma Mikael ɔ he ní.
“Mɛnɔ Ji Bɔfo Nɔkɔtɔma Mikael?” (Munyu nɛ ɔ ngɛ Intanɛti ɔ nɔ)
Moo kane nɔ́ nɛ ha nɛ wa ná nɔ mi mami kaa Abosiami ji nɔ ko nɛ e ngɛ nitsɛnitsɛ.
Moo hyɛ bɔ nɛ yo ko ye e he kulaa kɛ je daimonio ɔmɛ a he ha.
Moo kane bɔ nɛ Satan guɔ mumi yayami kɛ ní tsumi nɔ kɛ sisiɔ nihi ha a he ní.
“Anɔkuale nɛ Kɔɔ Kunya Yemi, Nyuami, kɛ Aze Kpɛmi He” (Blɔ Nɛ Yaa Neneene Wami Mi, fã 5)
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
