Gyehova ɩpɛ kɛɛ yesuma yɩ abusunwa mɔɔ ɩwɔ sʋlɔ nɩ nwʋ dɩyɛ. Awɔvʋlɔ bɛkɩnla ɔzɔ abusunwa nɩ nwʋ na bɔfʋlɔ bɛ “Nyamɩnlɩ mmalɛ.” (Dwoobu 38:7) Mɩnla yɛ Bayɩbʋlʋ ɩkã ɩfalɩ awɔvʋlɔ yɩ bɔ nwʋ a? Mɩnla yɛ awɔvʋlɔ bɛyɛ a? Asʋ̃ awɔvʋlɔ yɩ munwala yɛ bɛkɩnla Nyamɩnlɩ yɩ abusunwa yɩ nwʋ a?

1. Aninyiammɔ yɛ lɛ awɔvʋlɔ a?

Gyehova ɩwɔlɩ awɔvʋlɔ ansaana ɩbɔ azɩlɛ yɩ. Bɛdɩ azunzuma abɔdɩ dɩkɛɛ yɩzayɩ la na bɛda sʋlɔ. (Hibulumaa 1:14) Awɔvʋlɔ abʋmɩ abʋmɩ sʋ̃maa yɛ bɔwɔ ɛkɛ a, na ɩsʋnɩ kezimɔ bo nu bela ɩdɩ. (Yikile 5:11) “Bedidi Gyehova yɩ odwokɔ zʋ na betiye yɩ.” (Ndwomi 103:20) Wɔ ɔwɔkɩ mmɩlɩ nu nɩ, nɩ Gyehova ɩsʋ̃ma awɔvʋlɔ ma bɛfa yɩ ndwokɔ bɔkɔ bɛma yɩ mmenii, bɔbʋwa bɛ na bede bɛ sʋ̃. Nnɛ sʋ̃, awɔvʋlɔ yɩ bekile Kilisinyiamaa ɔhʋanɩ ma bɔkɔ mmenii mɔɔ bɛpɛ kɛɛ bosuma Nyamɩnlɩ nwʋ dɩyɛ nɩ bɛ ɛkɛ.

2. Aninyiammɔ yɛ lɛ Setanɩ nɩɩ yɩ azunzuma evinli a?

Awɔvʋlɔ yɩ be bɛádi nɔhʋanlɛ bɛma Gyehova. Bɔvʋlɔ mɔɔ ilili bɔmʋnlɩ ɩdɩlɩ atunwa yɛ lɛ “mɔɔ bɔfʋlɛ yɩ Abɔnsamɩ nɩ, mɛyɩ yɛ ɩdahɩlɩdahɩlɩ oyuwadɩ munwatĩĩ a.” (Yikile 12:9) Nɩ Setanɩ ɩpɛ kɛɛ idi mmenii zʋ, meti ɩlahɩlɩlahɩlɩ Adamɩ nɩɩ Yifi nɩɩ awɔvʋlɔ ebiyemmɔ ma bɛyɛlɩ azʋ̃nzɩzɩbɛ bediyialɩ Nyamɩnlɩ. Ɔzɔ awɔvʋlɔ yɩ bɔfʋlɛ bɛ azunzuma evinli. Gyehova idudu bɛ wɔ sʋlɔ ma bɛɣa bogua azɩlɛ yɩ zʋ na ɩbazɩkɛ bɛ.—Kɩnga Yikile 12:9, 12.

3. Mɩnla ɔhʋanɩ zʋ yɛ Setanɩ nɩɩ yɩ azunzuma evinli yɩ bɔbɔ mmɔdɩnɩ kɛɛ bɛkɛlahɩlɩlahɩlɩ yɛ a?

Setanɩ nɩɩ yɩ azunzuma evinli bɔ mmɔdɩnɩ kɛɛ bokoluwa azunzuma ndwokɔ zʋ bɛkɛlahɩlɩlahɩlɩ mmenii ma bɛ nɩɩ bɛ keli nkitanwʋ, na nyɛlɩyɛ mɔɔ ɩdɩ ɔzɔ nɩ ɩdɩbɛ kʋlaa. Kɛ ndianwʋ nɩ, abiyemmɔ bɔkɔ mmenii mɔɔ bekila ahɔnlɔnwa nu bɛ ɛkɛ, bɔkɔ abisa wɔ anlinsimaa bɛ ɛkɛ, na abiyemmɔ sʋ̃ bɔkɔ bɛpɛ adimakɛlɛzalɛ mɔɔ azunzuma evinli ndwokɔ wɔ numɔ. Bɛlahɩlɩlahɩlɩ abiyemmɔ ma bele beli kɛɛ sa bɔkʋla bɛ nɩɩ awuvʋlɔ tɩndɛ. Naasʋ̃ Gyehova ɩbɔ yɛ kɔkɔ kɛɛ: “Máma bɔkɔ ahɔmɩnlɩ ɛkɛnɩ, anzɛnyɩɩ abisa.” (Lɛvitikɔsʋ 19:31) Ɩfa kɔkɔwɔlɛ eyi ɩma yɛ na ɩawɔ yɛ nwʋ banɩ wɔ Setanɩ nɩɩ yɩ azunzuma evinli bɔ nwʋ. Bɛdɩ Nyamɩnlɩ yɩ adamvʋlɔ na bɛpɛ kɛɛ bepila yɛ.

 SUMÁ SƲ̃MAA

6. Sa ɔkʋla edi Setanɩ nɩɩ azunzuma evinli bɔ zʋ nkunimi

Abɔnsamɩ yɛ ɩdɩ azunzuma evinli bɛ ebani a. Naasʋ̃ awɔvʋlɔ nɔhʋanlɛmaa yɩ mɛyɩ, bɔvʋlɔ ebani Mayɩkɩyɛlɩ mɔɔ yɩzayɩ ɔkʋ̃ yɩ sʋ̃ yɛ lɛ Gyisɛsɩ nɩ yɛ ɩdɩ bɛ ebani a. Mɩnla tumi yɛ Mayɩkɩyɛlɩ ɩwɔ a? Kɩnga Yikile 12:7-9, na akʋ̃ bozunzú ndwokɔɣizialɛ eyimmɔ nwʋ:

• Aninyiammɔ yɛ bɔwɔ tumi paa a? Mayɩkɩyɛlɩ nɩɩ yɩ awɔvʋlɔ anzɛnyɩɩ Setanɩ nɩɩ yɩ azunzuma evinli a?

• Ekila a, ɩsɛ kɛɛ Gyisɛsɩ yɩ adʋwavʋlɔ bo kunlu ituli Setanɩ nɩɩ yɩ azunzuma evinli bɔ nwʋ a?

Sa ɔkʋla edi Setanɩ nɩɩ yɩ azunzuma evinli bɔ zʋ nkunimi. Kɩnga Gyemisi 4:7, na akʋ̃ bozunzú odwokɔɣizialɛ eyi nwʋ:

• Kɛ ɩkɛyɛ na wʋawɔ wʋ nwʋ banɩ wɔ Setanɩ nɩɩ yɩ azunzuma evinli bɔ nwʋ a?

 YƖ DƆKƆWƆLƐ

Awɔvʋlɔ nɔhʋanlɛmaa bɔbʋwa yɛ. Setanɩ nɩɩ yɩ azunzuma evinli bɛdɩ Gyehova yɩ adamvʋlɔ, na bɛpɛ kɛɛ boduwa azunzuma ndwokɔ zʋ bɛdahɩlɩdahɩlɩ mmenii.

Kɛ Okowuwa Ekeze a?

• Mɩnla ɔhʋanɩ zʋ yɛ Gyehova yɩ awɔvʋlɔ bɔbʋwaa mmenii ma bokozuma yɩ nwʋ dɩyɛ a?

• Aninyiammɔ yɛ lɛ Setanɩ nɩɩ yɩ azunzuma evinli a?

• Mɩnla ti mɔɔ ɛpɛ kɛɛ ɔtwɩ̃ wʋ nwʋ kʋlaa wɔ azunzuma ndwokɔ nwʋ a?