Gusto ni Jehova nga masayran naton ro parti sa anang pamilya sa eangit. Kaibahan sa ruyong pamilya ro mga anghel, nga ginatawag man nga mga “unga it Dyos.” (Job 38:7) Ano ro ginhambae it Biblia sa mga anghel? Paano nanda ginaimpluwensyahan ro mga tawo? Ag tanan baea nga anghel hay parte ku pamilya it Dyos?

1. Sin-o ro mga anghel?

Gintuga ni Jehova ro mga anghel bago pa nana gintuga ro eugta. Pareho kana, espiritu sanda nga indi makita nga nagaestar sa eangit. (Hebreo 1:14) Minilyon ro mga anghel, ag kada isaea kanda hay espesyal. (Pahayag 5:11) Ro mga anghel hay “nagatuman sa [ay Jehova nga] bisaea ag nagapamati sa anang limog.” (Salmo 103:20) Ku una, gingamit ni Jehova ro mga anghel agud magdaea it anang mensahe, magbulig, ag mag-euwas sa anang katawhan. Makaron, ginabuligan it mga anghel ro mga Cristyano nga makita ro mga tawo nga gusto magtuon parti sa Dyos.

2. Sin-o si Satanas ag ro mga demonyo?

May ibang mga anghel nga owa nagpabilin nga matutom kay Jehova. Ro unang anghel nga nagrebelde hay “gintawag nga Yawa ukon Satanas, nga nagpataeang kung bilog nga kalibutan.” (Pahayag 12:9) Gusto ni Satanas nga gamhan ro iba, ngani gin-impluwensyahan na ro unang mag-asawa ag rayon ro ibang anghel nga magrebelde. Ratong nagrebelde nga mga anghel hay gintawag nga mga demonyo. Ginpaeaas sanda ni Jehova sa eangit ag ginhaboy sa eugta, ag maeapit eon sanda dueaon.—Basaha ro Pahayag 12:9, 12.

3. Paano kita ginapataeang ni Satanas ag ku mga demonyo?

Abung tawo ro ginapataeang ni Satanas ag ku mga demonyo paagi sa demonismo, o espiritismo—ro maeain nga ueobrahon it pag-istorya sa mga espiritu. Halimbawa, ro iba hay nagapangutana sa mga astrologo, manoghula, psychic, ag albolaryo. Ro iba hay nagaagto sa mga manogbotbot ag mediko para magpabueong. Ginpapati ro iba nga pwede nanda maistorya ro mga patay. Pero nagpaandam katon si Jehova: “Indi kamo magpangayo it bulig sa mga espiritista, ag indi kamo magpangutana sa mga manoghula.” (Levitico 19:31) Nagtao imaw katon it paandam agud protektahan kita kay Satanas ag sa mga demonyo. Kaaway sanda it Dyos ag gusto nanda nga mag-antus kita.

 TUN-I PA GID

6. Mapirdi mo si Satanas ag ro anang mga demonyo

Ginadumaeahan ni Satanas ro mga demonyo. Pero ro matutom nga mga anghel hay ginapangunahan ni Miguel nga arkanghel, sambato pa nga ngaean ni Jesus. Mauno ka gamhanan si Miguel? Basaha ro Pahayag 12:7-9, ag talakaya rayon rayang mga pangutana:

• Sin-o ro mas gamhanan? Si Miguel ag ro anang mga anghel o si Satanas ag ro anang mga demonyo?

• Kon kimo, dapat baea mahadlok ro mga sumoeunod ni Jesus kay Satanas ag sa anang mga demonyo?

Kaya mong pirdihon si Satanas ag ro anang mga demonyo. Basaha ro Santiago 4:7, ag talakaya rayon rayang pangutana:

• Paano mo protektahan ing sarili kay Satanas ag sa mga demonyo?

 SUMARYO

Ginabuligan kita it matutom nga mga anghel. Si Satanas ag ro anang mga demonyo hay kaaway ni Jehova, ag ginagamit nanda ro espiritismo agud pataeangon ro mga tawo.

Review

• Paano ginabuligan it mga anghel ni Jehova ro mga tawo nga gusto imaw makilaea?

• Sin-o si Satanas ag ro anang mga demonyo?

• Ham-an gusto mong likawan ro espiritismo?