LIKE SUANLƐ 24
Anzi’m be su ndɛ’n nanwlɛ’n
Zoova kunndɛ kɛ e si i sufuɛ nga be o ɲanmiɛn su lɔ’n. Be yɛle anzi mun. Be flɛ be ekun kɛ “Ɲanmiɛn i mma mun.” (Zɔbu 38:7) ?Anzi’m be su ndɛ benin yɛ Biblu’n kan-ɔn? ?Ngue yɛ be yo-ɔ? ?Anzi’m be kwlaa yɛ be ti Ɲanmiɛn i sufuɛ-ɔ?
1. ?Wan mun yɛle anzi mun?
Zoova dun mmua yili anzi mun ka naan w’a yi asiɛ’n. Anzi’m be ti kɛ Zoova sa. Yɛle kɛ be tran ɲanmiɛn su lɔ, yɛ klɔ sran’m be kwlá wunman be. (Ebre Mun 1:14) Anzi’m be ti miliɔn kpanngban, yɛ ɔ le kun nin i wafa. (Sa Nglo Yilɛ 5:11) Be ‘yo maan Zoova i ndɛ’n kpɛn su, yɛ be ti i aniɛn’n.’ (Jue Mun 103:20) Laa’n, ɔ ju wie’n Zoova sunmɛn i anzi mun kɛ be wa kan ndɛ kle i sufuɛ mun annzɛ be de be sa wie nun. Andɛ’n, anzi’m be uka Klisifuɛ mun naan b’a kwla wun be nga be kunndɛ kɛ bé sí Ɲanmiɛn’n.
2. ?Wan yɛle Satan ɔ nin i mmusu mun?
Anzi wie’m be kpɔcili Zoova. Anzi klikli ng’ɔ jasoli Zoova wun’n, ‘be flɛ i Suɛn Tɔnfuɛ nin Satan. I yɛ ɔ laka asiɛ’n sufuɛ’m be kwlaa mɔ be mlin’n niɔn.’ (Sa Nglo Yilɛ 12:9) Satan kunndɛ kɛ ɔ́ síe klɔ sran mun. I sɔ’n ti’n, ɔ lakali Adan nin Ɛvu, kpɛkun anzi wie’m be suli i su. Anzi sɔ mɔ be suli i su’n, be flɛli be kɛ mmusu mun. Zoova yoli maan be kannin be bo ɲanmiɛn su lɔ. Yɛ bé wá núnnún be.—Kanngan Sa Nglo Yilɛ 12:9, 12 nun.
3. ?Wafa sɛ yɛ Satan nin i mmusu’m be laka klɔ sran mun-ɔn?
Satan fa bae dilɛ ninnge mun fa laka sran mun. Bae dilɛ’n, yɛle ninnge kwlaa nga be yo naan be nin aolia nun sran’m b’a kwla koko yalɛ’n. I sɔ yolɛ’n nun’n, sran wie’m be kɔ wunnzue yifuɛ mun, nin nzraama kannganfuɛ mun, ɔ nin ayre yofuɛ wie’m be sin. Wie’m be kusu be yo ayre wie mɔ mmusu’m be sa o nun’n. Asa ekun’n, be kpɛ sran wie’m be gblɛ kɛ be nin be nga be wuli’n be kwla koko yalɛ. Sanngɛ Zoova wla e su nun kɛ: “Nán amun wɔ be nga be waan be nin be nga be wuli’n be ijɔ’n be sin, yɛ nán amun wɔ wunnzue yifuɛ’m be sin.” (Sanwun Yolɛ 19:31) Ɔ seli e sɔ naan y’a tɔman Satan nin i mmusu’m be aya’n nun. Be ti Ɲanmiɛn i kpɔfuɛ, yɛ be kunndɛ kɛ bé yó e tɛ.
SI NDƐ’N NUN KPA EKUN
É wá kán ninnge kpakpa nga anzi’m be yo’n i ndɛ. Kpɛkun é kán sa nga ti yɛ ɔ ti cinnjin kɛ e sasa e wun bae dilɛ’n i lika’n, ɔ nin like nga e ko yo naan y’a tɔman Satan nin i mmusu’m be aya’n nun’n be ndɛ.
4. Anzi’m be uka be nga be kunndɛ kɛ bé sí Zoova’n
Anzi’m be bɔbɔ be boman jasin fɛ’n be kleman sran mun trele sa. Sanngɛ be uka Ɲanmiɛn i sufuɛ mun naan b’a wun be nga be kunndɛ kɛ bé sí Ɲanmiɛn’n. An kanngan Sa Nglo Yilɛ 14:6, 7 nun. I sin’n, an koko kosan yɛ’m be su yalɛ:
-
?Ngue ti yɛ ɔ ti cinnjin kɛ anzi’m be uka e jasin fɛ’n i bolɛ’n nun-ɔn?
-
?Kɛ a si kɛ anzi’m be kwla uka wɔ jasin fɛ’n i bolɛ’n nun’n i sɔ’n yo wɔ sɛ? ?Ngue ti-ɔ?
5. Kpalo bae dilɛ ninnge mun
Satan nin i mmusu’m be ti Zoova i kpɔfuɛ. Be ti e kpɔfuɛ wie. An kanngan Liki 9:38-42 nun, i sin’n, an koko kosan yɛ’n i su yalɛ:
-
?Ngue yɛ mmusu’m be fa yo klɔ sran mun-ɔn?
E kunndɛman kɛ e nin mmusu mun é sán nun. An kanngan Mmla’n 18:10-12 nun, i sin’n, an koko kosan yɛ’m be su yalɛ:
-
?Ninnge benin mun yɛ sɛ e yo be’n e nin mmusu mun é sán nun-ɔn? ?Ninnge benin wie mun yɛ mmusu’m be fa laka sran mun mɔ a si i-ɔ?
-
?Kɛ Zoova se kɛ nán maan e nin mmusu mun e san nun’n, i sɔ’n ti su? ?Ngue ti-ɔ?
An bo VIDEO’N, i sin’n, an koko kosan yɛ’m be su yalɛ:
-
?Kɛ a niɛn i sa’n like ng’ɔ wla Palesa i wa’n i sa lɛ’n ɔ ti tɛ? ?Ngue ti-ɔ?
-
?Ngue yɛ ɔ fata kɛ Palesa yo naan mmusu’m b’a yaci i yalɛ klelɛ-ɔ?
Kɛ ɔ fɛ i laa lele m’ɔ́ fá jú andɛ’n, Klisifuɛ kpa’m be nin mmusu mun be sanman nun. An kanngan Sa Nga Be Yoli’n 19:19, nin 1 Korɛntifuɛ Mun 10:21 nun, i sin’n, an koko kosan yɛ’n i su yalɛ:
-
?Sɛ bae dilɛ like wie o ɔ sa nun’n, ngue ti yɛ ɔ ti cinnjin kɛ a yi i blo-ɔ?
6. A kwla jran Satan nin i mmusu’m be ɲrun kekle
Satan yɛ ɔ sie mmusu mun-ɔn. Sanngɛ Misɛli m’ɔ ti anzi’m be su kpɛn’n yɛ ɔ sie anzi nanwlɛfuɛ mun-ɔn. Zezi yɛ be flɛ i sɔ-ɔ. ?Zezi i tinmin’n ti dan? An kanngan Sa Nglo Yilɛ 12:7-9 nun, i sin’n, an koko kosan yɛ’m be su yalɛ:
-
?Misɛli nin i anzi mun, ɔ nin Satan nin i mmusu mun, wan yɛ ɔ le tinmin trɛ i wiengu-ɔ?
-
?Kɛ a niɛn i sa’n, ɔ fata kɛ srɛ kun Zezi i sɔnnzɔnfuɛ mun Satan nin i mmusu’m be wun?
A kwla jran Satan nin i mmusu’m be ɲrun kekle. An kanngan Zaki 4:7 nun, i sin’n, an koko kosan yɛ’n i su yalɛ:
-
?Wafa sɛ yɛ a kwla sasa ɔ wun Satan nin i mmusu’m be lika-ɔ?
SRAN WIE’M BE WAAN: “Sɛ e su nian televiziɔn annzɛ e su to zevideo naan bae dilɛ ninnge wie’m be o nun’n, ɔ timan tɛ, e ɲin su yiyilɛ ngbɛn-ɔn.”
-
?Ngue ti yɛ akunndan sɔ mɔ be bu’n, ɔ ti tɛ-ɔ?
NDƐ’N I KPƆLƐ BOLƐ
Anzi nanwlɛfuɛ’m be uka e. Satan nin i mmusu’m be ti Zoova i kpɔfuɛ, yɛ be fa bae dilɛ ninnge’m be laka sran mun.
Ndɛ’n i nun flanlɛ
-
?Wafa sɛ yɛ Zoova i anzi mun be uka be nga be kunndɛ kɛ bé sí i’n niɔn?
-
?Wan yɛle Satan ɔ nin i mmusu mun?
-
?Ngue ti yɛ ɔ fataman kɛ a nin mmusu mun be san nun-ɔn?
NDƐ WIE MUN EKUN
Ninnge wie mɔ be kle kɛ Zezi yɛle Misɛli m’ɔ ti anzi’m be su kpɛn’n.
“?Wan yɛle Misɛli m’ɔ ti anzi’m be su kpɛn’n?” (jw.org su ndɛ)
Ninnge wie mɔ be kle kɛ Satan ti sran jrɛiin kun’n.
Wafa nga bla kun ɲɛnnin i ti Satan nin mmusu’m be sa nun’n.
Wafa nga Satan fa bae dilɛ ninnge mun fa laka sran mun’n.
“Duwlɛ’n, amuin flɔlɔ’n, nin bae dilɛ’n be su ndɛ nanwlɛ’n” (Anannganman nguan’n i atin’n, i bue 5)
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
