FARKARKOR 24
Manseiso Malaikat Sya ma Rosai Sifrur ya?
Yahwe imarisen insama kofawi pyum kina Ḇyesi ro nanggi. Siso malaikat sya, sor si kako ḇe ’Allah roma Ḇyesi’. (Ayub 38:7) Rosai Refo ikofen kaku ḇekur malaikat ansine? Rosai sifrur ya? Malaikat syakam sisun ro Allah kina Ḇyesi ke?
1. Manseiso malaikat sya?
Yahwe ifrur ḇepon malaikat sya fyor ifrur supswan ine ḇaim. Malaikat ansine sikenem ro nanggi. Malaikat sya sna baken rur raris Allah, inja na kopok komam si ḇa. (Ibrani 1:14) Malaikat sya barbor seja semilyar, ma oser-oser sna kenem ḇesisye. (Fasasna 5:11) Sima ’srower ma sisouser Allah Yahwe Wos Ḇyena’. (Mazmur 103:20) Ro fafisu naiwara, na Yahwe iwan malaikat sya fa sikofenḇair angginem Ḇyena, sisaramper ma sfaspar kawasa Ḇyesi. Baboine, malaikat sya sfarkin Yahwe kawasa Ḇyesi fa sisrow snonggaku ḇemarisen ḇeyakfawi Yahwe I sya.
2. Manseiso Ibiris ma rur ḇeḇarḇor sya?
Malaikat sia sisya sisouser faro Yahwe I ḇa. Malaikat oso ḇepon kaku ḇembroḇ Yahwe ine ’snir i ḇe Ibiris, roḇa Setan ḇeḇe anggarkar supswan ḇesiper’. (Fasasna 12:9) Ibiris imarisen fa ḇyepoik ḇesesya. Inja, danggar sinan ḇepon koḇesu, Adam ma Eva su. Mura, dawninyan malaikat ḇesesya kako fa saksouser Yahwe I ḇa. Malaikat ḇesouser ḇa ansine sor si ḇe rur ḇeḇarḇor. Yahwe isawen si bur nanggi ḇe supswan ine, ma nari myunpres si.—Kowasya Fasasna 12:9, 12.
3. Rariso Ibiris ma rur ḇeḇarḇor sya sisewar fa sawninyan ko rai?
Ibiris ma rur ḇeḇarḇor sya sawninyan snonggaku ḇebor sya ro roi ḇena wis kuker si, isoine nyan sawawos kuker si raya. Rupa ra, sia sisya sra ḇe ḇeyuf robor, ḇena mon, ḇaido ḇekinsor sya. Sia wer sun snonggaku ḇeduf sya ḇe ḇena aryawin manwen sya. Ḇesesya wer, sismai fafrowes bo sikyar sima bisa sawos kuker snonggaku ḇemar kwar sya. Ḇape, Yahwe byuk swarapepen ḇe ko bo doḇe, ”Mgora awer ḇe ḇeyor snonggaku ḇemar kwar sya, ma mgor awer akurfasnai ro ḇemamkarkir sya.” (Imamat 19:31) Yahwe byuk swarapepen ine fa kyadaunwarek ko ro Ibiris ma rur ḇeḇarḇor sya denem sena. Sima mbroḇ Ḇyesirya ma sibe sifrur roi ḇeḇye ḇa yoḇ ko.
SWEWAR KAKU WER
Nari kawos roi ḇepyum rosai monda malaikat sya sifrur kwar na. Ma kawos wer kona wis kuker rur ḇeḇarḇor sya ido, nari kosmai samswen. Na komam nyan fa kokadaunwarek ko ro Ibiris ma rur ḇeḇarḇor sya.
4. Malaikat sya sifnoḇek snonggaku koine fa kofawi pyum Yahwe I
Manseren Allah dor malaikat sya fa sawos ḇeri ḇe snonggaku koine ḇa. Imbape, sfarkin Allah manfamyan Ḇyesi fa sisrow snonggaku ḇemarisen ḇeyakfawi pyum I sya. Kowasya Fasasna 14:6, 7, raimnai kawos fakfuken suine:
-
Fafisu kora kobaryas, rosai ḇefnai fa kofandun fafnoḇek ro malaikat sya?
-
Moḇsa ḇaḇir rai snar wafawi malaikat sya na sfarkin Au fa wasrow snonggaku ḇemarisen ḇefarkor Refo sya? Rosai ḇefnai fa ḇaḇir radiri?
5. Pampum roi ḇena wis kuker rur ḇeḇarḇor sya
Ibiris ma rur ḇeḇarḇor sya sima Yahwe mbroḇ Ḇyesirya, ma mbroḇ koḇesirya kako. Kowasya Lukas 9:38-42, raimnai kawos fakfuken ine:
-
Rur ḇeḇarḇor sya rosai imbe sifrur ḇe snonggaku koine?
Komewer komam monda rur ḇeḇarḇor sya sawninyan kenem koḇena. Kowasya Ulangan 18:10-12, raimnai kawos fakfuken nane:
-
Nyan rosai monda rur ḇeḇarḇor sya sbukininyan ko ma sawawos kuker ko? Mam ro moḇ ḇarek ro ya, rosai snonggaku ḇebor sya sifrur boi nya wis kuker rur ḇeḇarḇor sya?
-
Yahwe imewer kofrur fararur ḇena wis kuker rur ḇeḇarḇor sya. Kwara ido, roi Yahwe dor nane napyum faro ko ke? Kwarem rarirya kukro?
Komam VIDIO, raimnai kawos fakfuken nane.
-
Kwara ido, kabrai Palesa fyes ro inai mgun ḇyedi ḇrasi, nafnai roi ḇeḇye ḇa ke? Kwarem rarirya kukro?
-
Rosai Palesa ifrur kaku insama kyadaunwarek i ro rur ḇeḇarḇor sya?
Snonggaku Kristen ḇekaku sima sisewar ker fa spampum rur ḇeḇarḇor sya. Kowasya Farfyar 19:19 and 1 Korintus 10:21, raimnai kawos fakfuken ine:
-
Rosai ḇefnai fa wasawen roi nakam ḇena wis kuker rur ḇeḇarḇor sya?
6. Na swambraḇ fa pampum Ibiris ma rur ḇeḇarḇor sya
Ḇebukor faro rur ḇeḇarḇor sya iso Ibiris i. Ḇape, ḇebukor faro malaikat ḇesouser sya iso Mikhael, ima Yesus snonsnon ḇese ḇyediri. Mikhael papoik ḇyedi iba rarso? Kowasya Fasasna 12:7-9, raimnai kawos fakfuken suine:
-
Mansei ḇesambraḇ syadi ya, Mikhael ma malaikat-malaikat ḇyesi ke, Ibiris ma ḇeso i sya?
-
Kwara ido, fandun fa Yesus manfamyan ḇyesi simgak faro Ibiris ma rur ḇeḇarḇor sya ke?
Na swambraḇ fa pampum Ibiris ma rur ḇeḇarḇor sya. Kowasya Yakobus 4:7, raimnai kawos fakfuken ine:
-
Rosai na wakfrur kaku fa kwadaunwarek manggundaw ro Ibiris ma rur ḇeḇarḇor sya?
SIA SOḆE: ”Kofnak manwen-manwen ḇaido komam felem ḇefasnai manwen sya nama sasar oḇa.”
-
Rosai ḇefnai fa kakara ḇeradirya naḇye ḇa?
FARKARKOR ḆYENA
Malaikat ḇesouser sya na sifnoḇek ko. Ibiris ma rur ḇeḇarḇor sya sima Yahwe mbroḇ Ḇyesiri, ma sawninyan snonggaku koine kuker roi ḇena wis kuker si.
Waswarepen Kaḇer
-
Moḇsa Yahwe malaikat Ḇyesi sifnoḇek snonggaku sya fa sfawi pyum I rai?
-
Manseiso Ibiris ma rur ḇeḇarḇor sya?
-
Rosai ḇefnai fa pampum roi ḇena wis kuker rur ḇeḇarḇor sya?
SWEWAR NABOR WER
Wawasya roi ḇefasnai kaku Yesus iso ḇebukor ro malaikat sya, sor i ḇe Mikhael.
”Manseiso Mikhael Manfarkin ro Malaikat Sya?” (Fasfas ro situs jw.org)
Roi ḇefrur fa kokyar Ibiris ima isya kaku.
Wawasya roi ḇefnoḇek bin oso fa imkei ro rur ḇeḇarḇor sya denem sena.
”Ifawi Roi Imbe Syewar ro Kankenem Ine” (Syap Baryas 1 Juli 1993)
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
