NLÔ AJÔ 24

Beza be ne beéngele a ésaé évé ba bo?

Vô’ôlô nkobô

Nkômbane Yéhôva ô ne fe na bi yem bibu’a ya nda bôte jé ya yôp. Bibu’a ya nda bôt éte bi ne beéngele, mbe bete Kalate Zambe a loone na “bone be Zambe.” (Job 38:7) Mam mevé Kalate Zambe a ye’ele bia a lat a beéngele? Ésaé évé ba bo? Ye beéngele bese be ne bibu’a ya nda bôte Yéhôva?

1. Beza be ne beéngele?

Yéhôva a nga té beéngele ôsusua na a té si a biôm bi ne été. Beéngele ba nyiñe yôp été, a bi nji bo ngule ya yene be. (Behébreu 1:14) Yéhôva a nga té bemillion beéngele, éngele ase a too avale dé. (Nlitan 5:11) Ba “tôé mejô [me Yéhôva, a] wô’ô tyiñe ya ajô dé.” (Besam 103:20) Melu mvus, Yéhôva a mbe a bela’ane beéngele ane bekate foé, a asu na a nyii bebo bisaé bé. Den, beéngele ba volô Bekristen na be yene bôte be bili nkômbane ya yeme Zambe.

2. Satan a mimbia minsisim ba so vé?

Beéngele béziñ be nga bo Yéhôva melo. Éngele ôsu a nga bo Zambe melo a ne “nyô a lobane na, Diable a Satan, ndu’u si se.” (Nlitan 12:9) Satan a mbe a kômbô’ô jôô si se, ajô te a nga du’u Adam ba Éve a beéngele béziñ na be lume Yéhôva mvus. Ba loone mbia beéngele bete na, mimbia minsisim. Yéhôva a nga titane be yôp a wua be si va, a ye fe mane jiane be ana’ana.—Lañe’e Nlitan 12:9, 12.

3. Aval avé Satan a mimbia minsisim ba jeñe na be du’u bia?

Satan a mimbia minsisim ba du’u bôt a abui mezen. Bôte be wô’ô bo mam méziñ ma bo na be yeñ a mimbia minsisim, bebien be teke yem. Bôt be wô’ô ke jeñe mvolan be mimvimvi’i, nge ke fombô horoscope asu na be yeme mam mé kui ényiñe jap. Bevo’o ba jeñe na be ke saébane be mingeñgañ. Satan a du’u fe bôte na be ne ngule ya laan a bewu, jôme te Yéhôva a ve bia abendé di: “Te yalan mfa’a ya ba be wô’ô bi bekôn, nge mfa’a ya mimvimvi’i.” (Lévitique 19:31) A ve bia abendé ete amu a nji yi na bi ku ôlame Satan a mimbia minsisim. Be ne besiñe be Zambe, a be nji yi mvo’é jangan.

TUKA’A FAK

Yene’e mbamba be mam beéngele ba bo, a amu jé wo yiane tabe ntyele ya bo mam me tii a mimbia minsisim. Yene’e fe aval avé ô ne sa’ale Satan a mimbia minsisim.

4. Beéngele ba volô bôte na be yeme Yéhôva

Beéngele bebien ba ke ki ba kate bôte mbamba foé, ve ba volô bekañete mbamba foé na be ke koone bôte ba kômbô yeme benya mejôô. Lañe’e Nlitan 14:6, 7, mvuse ya valé, yala’ane minsili mi:

Amu jé da sili na beéngele be volô bia asu ésaé nkañete?
Ye wo bi ngule nyul éyoñe wo yeme na beéngele be ne wo volô na ô yene bôte ba kômbô yeme benya mejôô? Amu jé?

5. Tubu’u mimbia minsisim

Satan a mimbia minsisim be ne besiñe be Yéhôva, be ne fe besiñe bangan. Lañe’e Luc 9:38-42, mvuse ya valé, yala’ane nsili wu:

Aval avé mimbia minsisim mia tibili bôt?

Bi nji kômbô yeñ a mimbia minsisim. Lañe’e Deutéronome 18:10-12, mvuse ya valé, yala’ane minsili mi:

Mimbia minsisim mia jeñe na mi wone bia a mezene mevé? Mimboone mivé ya vôm ô too mi tii a mimbia minsisim?
Ye e ne mvo’é na Yéhôva a kamane bia na bi bo mam me tii a mimbia minsisim? Amu jé?

Futi’i VIDÉO, mvuse ya valé, yala’ane minsili mi.

VIDÉO: “Wosa’ane Diable” (5:02)

Ye wo simesane na nkole mvot ô mbe mone Palessa wo ô mbe mbia jôm? Amu jé?
Jé Palesa a nga yiane bo asu na te mimbia minsisim mia beta ndeñele nye?

Benya Bekristen ba jaé zu ba wosane mimbia minsisim. Lañe’e Mam Minlôman 19:19 a 1 Becorinthien 10:21, mvuse ya valé, yala’ane nsili wu:

Amu jé e ne mfi na ô mane di’i biôm bise ô bili bi tii a mimbia minsisim?

6. Ô ne dañe Satan a mimbia minsisim mié

Mimbia minsisim mi ne éjôé Satan si. Wôna Yésus, nnye a ne njôô beéngele, nnye fe ba loone na Archange Michel. Abim ngul avé Michel a bili? Lañe’e Nlitan 12:7-9, mvuse ya valé, yala’ane minsili mi:

Éyoñe wo fombô Michel ba beéngele bé, a Satan ba mimbia minsisime mié, beza ba dañe ngul?
Ye wo simesane na beyé’é be Yésus ba yiane koo Satan a mimbia minsisime mié woñ?

Ô ne ngule ya dañe Satan a mimbia minsisime mié. Lañe’e Jacques 4:7, mvuse ya valé, yala’ane nsili wu: