TJONÏK 24
¿Achkë nuʼij le Biblia chkij ri ángeles?
Jehová nrajoʼ chë nqatamaj ruwäch ru-familia ri kʼo chkaj. Chpan re familia reʼ ye kʼo ri ángeles, ri nbʼix chqä «ralkʼwal Dios» chkë (Job 38:7). ¿Achkë nukʼüt le Biblia chkij ri ángeles? ¿Yekitoʼ komä ri winäq? ¿Jontir komä ri ángeles ye kʼo chpan ru-familia Dios?
1. ¿Achkë riʼ ri ángeles?
Jehová xeruʼän ri ángeles taq majanä tuʼän le Ruwachʼulew. Ryeʼ chqä ye espíritus ri ye kʼo chkaj, kan achiʼel Jehová (Hebreos 1:14). Kan pa millón ángeles ye kʼo, ye kʼa ma ye junan ta (Apocalipsis 5:11). Ryeʼ kan nkiʼän ri nuʼij Jehová chkë chqä kan nkismajij rupixaʼ (Salmo 103:20). Ojer qa, Jehová xeruksaj ri ángeles rchë xtzjon kikʼë rusamajelaʼ, rchë xyaʼ kitoʼik chqä rchë xeruköl. Pa qaqʼij komä, ri ángeles najin yekitoʼ ri cristianos rchë nkïl winäq ri nkajoʼ nkitamaj más ruwäch Dios.
2. ¿Achkë riʼ Satanás chqä ri demonios?
Ye kʼo jojun ángeles xa xkiyaʼ qa Jehová. Ri naʼäy ri xbʼanö riʼ ya riʼ «ri nbʼix Diablo chqä Satanás che rä, ri najin yeruqʼöl jontir winäq» (Apocalipsis 12:9). Satanás xrajoʼ xqʼät tzij pa kiwiʼ ri nkʼaj chik, rma riʼ xuʼän chë ri naʼäy taq winäq xkiyaʼ qa Jehová, kan achiʼel xuʼän ryä. Chrij riʼ xeruqʼöl jojun ángeles rchë xkiʼän ya riʼ chqä. Ri itzel taq ángeles riʼ nbʼix demonios chkë. Ryeʼ xekʼaq pä chwäch le Ruwachʼulew rma Jehová chqä ya xtchup kiwäch (taskʼij ruwäch Apocalipsis 12:9, 12).
3. ¿Achkë rubʼanik nkajoʼ yojkiqʼöl Satanás chqä ri ru-demonios?
Satanás chqä ri ru-demonios yekiqʼöl ri winäq rkʼë ri itzinïk chqä kikʼë nkʼaj chik bʼanobʼäl ri kikʼwan kiʼ kikʼë ri itzel taq espíritus. Jojun tzʼetbʼäl, ye kʼo jojun winäq nkiskʼij ruwäch ri horóscopo, yebʼä kikʼë ajqʼijaʼ chqä kikʼë winäq ri nkiyaʼ aqʼon ri xa kikʼwan kiʼ rkʼë ri itzinïk. Y ye kʼo jojun bʼin chkë chë ye kʼo winäq yekowin yetzjon kikʼë ri kamnaqiʼ. Ye kʼa Jehová nuʼij chqë chë ma qbʼä ta kikʼë ri ajqʼijaʼ (Levítico 19:31). Ryä nrajoʼ nqrchajij chwäch Satanás chqä ri ru-demonios, rma ryeʼ yerukʼulel chqä nkajoʼ yojkitzʼlaʼ.
TQATAMAJ MÁS CHRIJ RE NAʼOJ REʼ
Qtzjon chrij ri utziläj taq bʼanobʼäl yekiʼän ri ángeles chqä achkë rma kʼo chë nqachajij qiʼ chwäch ri itzinïk. Tqatzʼetaʼ chqä achkë rubʼanik nqachajij qiʼ chwäch Satanás chqä ri ru-demonios.
4. Ri ángeles yekitoʼ ri winäq rchë nkitamaj ruwäch Jehová
Ri ru-ángeles Dios ma nkitzjoj ta le Biblia chkë ri winäq. Ri nkiʼän ryeʼ ya riʼ yekitoʼ rusamajelaʼ Dios rchë nkïl winäq ri nkajoʼ nkitamaj ruwäch Jehová. Tiskʼij ruwäch Apocalipsis 14:6, 7 y kixtzjon chrij reʼ:
-
¿Achkë rma nkʼatzin chë ri ángeles yojkitoʼ taq nqatzjoj le Biblia?
-
¿Achkë nanaʼ rït taq natamaj chë ri ángeles kan yatkitoʼ rchë nawïl winäq ri nkʼatzin ntzjöx Ruchʼaʼäl Dios chkë? ¿Achkë rma?
5. Tatzelaj ri itzinïk chqä xa bʼa achkë chik jun bʼanobʼäl ri rukʼwan riʼ rkʼë
Satanás chqä ri ru-demonios yerukʼulel Jehová chqä yeqakʼulel röj. Tiskʼij ruwäch Lucas 9:38-42 y kixtzjon chrij reʼ:
-
¿Achkë kinaʼoj nkiʼän ri demonios kikʼë ri winäq?
Röj ma nqajoʼ ta nqayaʼ qʼij chkë ri demonios rchë nkismajij qakʼaslemal. Tiskʼij ruwäch Deuteronomio 18:10-12 y kixtzjon chrij reʼ:
-
¿Achkë nkikanuj nkiʼän ri demonios rchë nkismajij qakʼaslemal chqä rchë yetzjon pä qkʼë? ¿Achkë atzʼeton rït chë nkiʼän ri winäq chpan atinamit ri xa kikʼwan kiʼ rkʼë ri itzinïk?
-
¿Naʼij rït chë kan ütz chë Dios ruqʼaton chqawäch yeqaʼän bʼanobʼäl ri xa kikʼwan kiʼ rkʼë ri itzinïk? ¿Achkë rma?
Titzʼetaʼ ri VIDEO y kixtzjon chrij reʼ:
-
¿Achkë naʼij rït? ¿Ütz komä ri amuleto ri xyaʼ ya Vanesa chrij ruqʼaʼ runeʼy? ¿Achkë rma?
-
¿Achkë kʼo chë xuʼän ya Vanesa rchë xtoʼ riʼ chkiwäch ri demonios?
Ri kantzij taq cristianos kan ronojel mul kipabʼan kiʼ chkiwäch ri demonios. Tiskʼij ruwäch Hechos 19:19 chqä 1 Corintios 10:21, y kixtzjon chrij reʼ:
-
¿Achkë rma kan kowan nkʼatzin chë rït nachüp ruwäch xa bʼa achkë jun kʼo awkʼë ri xa rukʼwan riʼ rkʼë ri itzinïk?
6. Tapabʼaʼ awiʼ chwäch Satanás chqä ri ru-demonios
Ri demonios kan yë Satanás ukʼwayon bʼey chkiwäch. Ye kʼa ri ukʼwayon bʼey chkiwäch ri utziläj taq ángeles ya riʼ ri arcángel Miguel, ri ya riʼ chik jun rubʼiʼ Jesús nyaʼöx. ¿Jaruʼ komä ruchqʼaʼ Miguel? Tiskʼij ruwäch Apocalipsis 12:7-9 y kixtzjon chrij reʼ:
-
¿Achkë kʼo más kichqʼaʼ: Miguel chqä ri ru-ángeles, o Satanás chqä ri ru-demonios?
-
¿Naʼij rït chë ri rutzeqelbʼëy Jesús kʼo rma nkixiʼij kiʼ chwäch Satanás chqä ri ru-demonios?
Rït yakowin napabʼaʼ awiʼ chwäch Satanás chqä ri ru-demonios. Tiskʼij ruwäch Santiago 4:7 y kixtzjon chrij reʼ:
-
¿Achkë ütz naʼän rchë nachajij awiʼ chwäch Satanás chqä ri ru-demonios?
JOJUN WINÄQ NKIʼIJ REʼ: «Majun ta rubʼanon we yeqaʼän atzʼanen o yeqatzʼët películas ri kikʼwan kiʼ rkʼë ri magia o ri itzel taq espíritus. Riʼ xa xuʼ rchë nqkʼastan jbʼaʼ».
-
¿Achkë rma ma ütz ta ri jun chʼobʼonïk?
RI XQATAMAJ QA
Ri ángeles kan nkiyaʼ qatoʼik. Satanás chqä ri ru-demonios yerukʼulel Jehová chqä nkiksaj ri itzinïk rchë yekiqʼöl ri winäq.
Tqakamluj ri xqatzʼët qa
-
¿Achkë nkiʼän ri ángeles rchë yekitoʼ ri winäq rchë nkitamaj ruwäch Jehová?
-
¿Achkë riʼ Satanás chqä ri demonios?
-
¿Achkë rma nqaʼij chë majun ta utzil xtawïl we xtaʼän bʼanobʼäl ri xa kikʼwan kiʼ rkʼë ri itzinïk?
RCHË NATAMAJ MÁS
Tatamaj achkë rma Jesús ya riʼ ri arcángel Miguel.
«¿Achoq che rä nbʼix wä ri arcángel Miguel?» (Reʼ xtawïl pa jw.org)
Tatzʼetaʼ achkë rma nqaʼij chë ri Diablo kantzij kʼo.
Tatzʼetaʼ achkë xuʼän jun ixöq rchë xköl riʼ pa kiqʼaʼ ri demonios.
«Xtamaj achkë kʼo chë nuʼän chpan rukʼaslemal» (Ri Chajinel, 1 de julio, 1993)
Tatamaj achkë rubʼanik nuksaj Satanás ri itzinïk rchë yeruqʼöl ri winäq.
Rkʼë jbʼaʼ nawajoʼ natzʼët chqä reʼ
RI KʼUTUNÏK RI NBʼAN CHKIJ RI TESTIGOS DE JEHOVÁ
¿Achkë rubʼanik yekitjoj ri winäq chrij le Biblia ri testigos de Jehová?
Rkʼë ri tjonïk nkiyaʼ ri testigos de Jehová, rït ütz naksaj xa bʼa achkë Biblia nawajoʼ. Chqä ütz naʼän invitar jontir a-familia o xa bʼa achkë awachiʼil.
