LECCION 24
Quien el Maga Angel?
Quierre si Jehova que aprende kita acerca na de suyu familia na cielo. Incluido alli el maga angel con quien ta llama “maga anak del Dios.” (Job 38:7) Cosa ta habla el Biblia acerca na maga angel? Cosa sila ta hace? Y todo ba sila parte del familia del Dios?
1. Quien el maga angel?
Si Jehova ya crea con el maga angel antes le hace con el tierra. Igual con ele, ta queda sila na cielo y gendeh kanila ta puede mira. (Maga Hebreo 1:14) Tiene millones de maga angel y diferente el cada uno diila. (Revelacion 5:11) ‘Ta cumpli sila con el palabra de Jehova y ta obedece el de suyu voz.’ (Salmo 103:20) De antes, ta usa si Jehova kanila para imbia el de suyu mensaje, y para ayuda y salva con el de suyu maga siervo. Ahora, ta guia sila con el maga Cristiano para con aquellos quien quierre aprende acerca con Dios.
2. Quien si Satanas y de suyu maga demonio?
El cuanto angel nuay esta leal con Jehova. El primer yan rebelde amo el Diablo o “Satanas . . . quien ta engaña con el entero mundo.” (Revelacion 12:9) Quierre le que rula con otro poreso ya influencia le con el primer maga gente y con el otro maga angel para man rebelde tambien. Ta llama con el maga rebelloso angel como maga demonio. Ya buta si Jehova kanila para na tierra y hay destroza le kanila.—Le con el Revelacion 12:9, 12.
3. Paquemodo si Satanas y el maga demonio ta pricura influencia kanaton?
Ta influencia sila con el manada gente por medio na espiritismo—un practica donde ta pricura comunica con el maga espiritu. Por ejemplo, el cuanto ta consulta con el diila horoscope, con aquellos quien ta practica astrologia o adivinacion, y na maga surujano. El otro ta busca curada que ta inclui espiritismo y ta creé que puede sila man cuento con el maga muerto. Pero si Jehova ya habla: “No ustedes anda na maga espiritista y no consulta con aquellos quien ta practica adivinacion.” (Levitico 19:31) Ya habla le se para protege kanaton con Satanas y na maga demonio. Contrario sila del Dios y quierre sila hace mal cosas kanaton.
APRENDE PA MAS
Sabe acerca el buen cosas que ta hace el maga angel, el peligro del espiritismo y si paquemodo kita queda protegido contra con Satanas y na maga demonio.
4. El maga angel ta ayuda con el maga gente para aprende acerca con Jehova
El maga angel gendeh directa ta predica con el maga gente. Pero, puede sila guia con el maga siervo del Dios para con aquellos quien quierre aprende acerca con ele. Le con el Revelacion 14:6, 7 y despues, discuti con este maga pregunta:
-
Porque kita necesita el ayuda del maga angel para predica?
-
Alegre ba tu sabe que el maga angel puede guia contigo para na maga gente quien necesita oi acerca na Biblia? Porque?
5. Evita con el espiritismo
Contrario de Jehova si Satanas y el maga demonio. Contrario tambien sila diaton. Le con el Lucas 9:38-42 y despues, discuti con este pregunta:
-
Cosa ta hace el maga demonio con el maga gente?
No quierre kita que influencia kanaton el maga demonio. Le con el Deuteronomio 18:10-12 y despues, discuti con este maga pregunta:
-
Paquemodo el maga demonio ta pricura influencia y comunica kanaton? Cosa maga practica el comon na de ustedes lugar?
-
Para contigo, justo ba el mandamiento de Jehova kanaton que evita con el espiritismo? Porque?
Man play con el VIDEO y despues, discuti con este maga pregunta.
-
Para contigo, peligroso ba el anting-anting que ta usa el anak de Palesa? Porque?
-
Cosa necesita hace si Palesa para queda protegido na maga demonio?
El maga deverasan Cristiano ta resisti con el maga demonio. Le con el Maga Actividad 19:19 y 1 Corinto 10:21, y despues, discuti con este pregunta:
-
Si tiene tu cosas que tiene coneccion na espiritismo, porque importante que destroza con ese?
6. Ganá contra con Satanas y de suyu maga demonio
Si Satanas el ta rula con el maga demonio. Pero el quien ta guia con el maga fiel angel amo el arcangel que si Miguel, que otro nombre para con Jesus. Paquemodo le de poderoso? Le con el Revelacion 12:7-9 y despues, discuti con este maga pregunta:
-
Quien el mas poderoso? Si Miguel y de suyu maga angel, o si Satanas y de suyu maga demonio?
-
Para contigo, necesita ba tene miedo el maga siguidores de Jesus con Satanas y con el de suyu maga demonio?
Puede tu ganá contra con Satanas y na de suyu maga demonio. Le con el Santiago 4:7 y despues, discuti con este pregunta:
-
Paquemodo tu puede protege con el de tuyu mismo cuerpo contra con Satanas y na maga demonio?
EL CUANTO TA HABLA: “Nuay malo si juga maga juego o mira maga salida acerca na espiritismo. Para na alegria lang man se.”
-
Porque peligroso si ansina kita ta pensa?
SUMARIO
El maga fiel angel ta ayuda kanaton. Contrario de Jehova si Satanas y de suyu maga demonio, y ta usa sila con el espiritismo para influencia con el maga gente.
Repaso
-
Paquemodo el maga angel ta ayuda con el maga gente para aprende acerca con Jehova?
-
Quien si Satanas y de suyu maga demonio?
-
Porque tu quierre evita con el espiritismo?
SABE PA MAS
Mira el evidencia que si Jesus amo el arcangel que si Miguel.
Considera el prueba que el Diablo amo un deverasan persona.
Mira si paquemodo el un mujer ya puede quita con el espiritismo na de suyu vida.
“Ya Incuntra Le el Proposito del Vida” (The Watchtower, Julio 1, 1993)
Sabe si paquemodo si Satanas ta usa con el espiritismo para hace loco con el maga gente.
“El Verdad Acerca na Magica, Salamanca y Barang” (The Road to Everlasting Life, part 5)
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
