LEKSIYON 24
Unsa ang Kamatuoran Bahin sa mga Anghel?
Gusto ni Jehova nga mokat-on ta bahin sa iyang pamilya sa langit. Apil ana nga pamilya ang mga anghel, nga gitawag ug mga “anak sa Diyos.” (Job 38:7) Unsay giingon sa Bibliya bahin sa mga anghel? Unsay ilang mahimo sa mga tawo? Ug ang tanan bang anghel apil sa pamilya sa Diyos?
1. Kinsa ang mga anghel?
Gilalang ni Jehova ang mga anghel una pa niya himoa ang yuta. Sama niya, sila maoy dili makitang mga espiritu nga nagpuyo sa langit. (Hebreohanon 1:14) Minilyon ang mga anghel, ug ang matag usa nila dunay kaugalingong personalidad. (Pinadayag 5:11) Sila “nagtuman sa . . . pulong [ni Jehova] ug nagsunod sa iyang tingog.” (Salmo 103:20) Sa karaang panahon, gamiton usahay ni Jehova ang mga anghel sa pagdalag mga mensahe ug sa pagtabang ug pagluwas sa iyang katawhan. Karon, gigiyahan sa mga anghel ang mga Kristohanon ngadto sa mga tawo nga gustong mokat-on bahin sa Diyos.
2. Kinsa si Satanas ug ang iyang mga demonyo?
Ang ubang anghel wala magpabiling matinumanon kang Jehova. Ang unang anghel nga mirebelde “gitawag ug Yawa ug Satanas, nga nagpahisalaag sa tibuok gipuy-ang yuta.” (Pinadayag 12:9) Gusto ni Satanas nga siyay magmando, mao nga giimpluwensiyahan niya ang unang mga tawo ug sa ulahi bisan ang ubang anghel sa pagsupak kang Jehova. Ang maong rebelyosong mga anghel gitawag ug mga demonyo. Gitambog sila ni Jehova sa yuta ug sila pagalaglagon.—Basaha ang Pinadayag 12:9, 12.
3. Unsay ginahimo ni Satanas ug sa mga demonyo sa pagpahisalaag nato?
Gipahisalaag ni Satanas ug sa mga demonyo ang daghang tawo pinaagi sa demonismo, o espiritismo. Daotan ni nga buhat kay pagpakigkomunikar ni sa mga espiritu. Pananglitan, ang uban mokonsulta sa mga astrologo, mananag-an, psychic, ug albularyo. Ang uban mogamit ug mga paagi sa pagtambal nga naay sagol nga espiritismo. Ang mga tawo nalimbongan sab sa pagtuo nga puwede silang makig-estorya sa mga patay. Pero si Jehova nagpasidaan nato: “Ayaw mog adto sa mga espiritista, ug ayaw pagkonsulta sa mga mananag-an.” (Levitico 19:31) Gipasidan-an ta niya aron proteksiyonan ta batok kang Satanas ug sa mga demonyo. Kaaway sila sa Diyos, ug gusto nilang madaot ta.
TUN-IG DUGANG
Sayra ang maayong mga butang nga ginahimo sa mga anghel, ang kapeligrohan sa espiritismo, ug kon sa unsang paagi nato maproteksiyonan ang atong kaugalingon batok kang Satanas ug sa mga demonyo.
4. Tabangan sa mga anghel ang mga tawo sa pagkat-on bahin kang Jehova
Ang mga anghel sa Diyos dili direktang mosangyaw sa mga tawo. Hinuon, giyahan nila ang mga magsisimba sa Diyos ngadto sa mga tawo nga gustong mokat-on bahin niya. Basaha ang Pinadayag 14:6, 7, ug dayon hisgoti kini nga mga pangutana:
-
Nganong kinahanglan nato ang tabang sa mga anghel diha sa pagsangyaw?
-
Nadasig ba ka sa pagkahibalo nga ang mga anghel makagiya nimo ngadto sa mga tawo nga kinahanglang mahibalo bahin sa Bibliya? Ngano?
5. Isalikway ang espiritismo
Si Satanas ug ang mga demonyo kaaway ni Jehova. Kaaway pod nato sila. Basaha ang Lucas 9:38-42, ug dayon hisgoti kini nga pangutana:
-
Unsay ginahimo sa mga demonyo ngadto sa mga tawo?
Dili nato gusto nga maimpluwensiyahan ta sa mga demonyo. Basaha ang Deuteronomio 18:10-12, ug dayon hisgoti kini nga mga pangutana:
-
Unsa nga mga paagi ang gigamit sa mga demonyo aron impluwensiyahan ta ug makigkomunikar nato? Unsay komon nga mga buhat sa espiritismo sa inyong lugar?
-
Para nimo, rasonable ba nga gidili ni Jehova ang mga buhat sa espiritismo? Ngano?
I-play ang VIDEO, ug dayon hisgoti ang mosunod nga mga pangutana:
-
Para nimo, makadaot ba ang habak nga gisul-ob sa anak ni Palesa? Ngano?
-
Unsay kinahanglang himoon ni Palesa aron maproteksiyonan siya batok sa mga demonyo?
Ang tinuod nga mga Kristohanon dili gyod magpaimpluwensiya sa mga demonyo sukad pa sa una. Basaha ang Buhat 19:19 ug 1 Corinto 10:21, ug dayon hisgoti kini nga pangutana:
-
Nganong importante nga sunogon o gub-on ang bisan unsang butang nga konektado sa espiritismo?
6. Paningkamoti nga modaog ka batok kang Satanas ug sa iyang mga demonyo
Ang mga demonyo gimandoan ni Satanas. Pero ang matinumanong mga anghel gipangunahan sa arkanghel nga si Miguel, nga maoy laing ngalan ni Jesus. Unsa ka gamhanan si Miguel? Basaha ang Pinadayag 12:7-9, ug dayon hisgoti kini nga mga pangutana:
-
Kinsa ang mas gamhanan? Si Miguel ug ang iyang mga anghel o si Satanas ug ang iyang mga demonyo?
-
Para nimo, ang mga sumusunod ni Jesus angay bang mahadlok kang Satanas ug sa mga demonyo?
Makadaog ka batok kang Satanas ug sa iyang mga demonyo. Basaha ang Santiago 4:7, ug dayon hisgoti kini nga pangutana:
-
Sa unsang paagi nimo maproteksiyonan ang imong kaugalingon batok kang Satanas ug sa mga demonyo?
ANG UBAN MOINGON: “Dili man daotan ang pagdulag mga video game o pagtan-awg mga salida bahin sa espiritismo. Lingawlingaw ra man na.”
-
Nganong peligroso na nga panghunahuna?
SUMARYO
Ang matinumanong mga anghel motabang nato. Si Satanas ug ang iyang mga demonyo kaaway ni Jehova. Ug gigamit nila ang espiritismo sa pagpahisalaag sa mga tawo.
Review
-
Sa unsang paagi gitabangan sa mga anghel ni Jehova ang mga tawo sa pagkat-on bahin niya?
-
Kinsa si Satanas ug ang iyang mga demonyo?
-
Nganong maayo nga likayan gyod nimo ang espiritismo?
SUSIHA
Sayra ang ebidensiya nga si Jesus mao si Miguel nga arkanghel.
Sayra ang pamatuod nga ang Yawa tinuod nga persona.
Basaha kon sa unsang paagi ang usa ka babaye nakalingkawas sa impluwensiya sa demonyo.
“Siya Nakakaplag ug Katuyoan sa Kinabuhi” (Ang Bantayanang Torre, Hulyo 1, 1993)
Sayra kon giunsa paggamit ni Satanas ang espiritismo sa paglimbong sa mga tawo.
“The Truth About Magic, Sorcery, and Witchcraft” (The Road to Everlasting Life, part 5)
Basin Ganahan Pod Ka
KOMON NGA MGA PANGUTANA
Unsa ang Bible Study Program nga Gina-offer sa mga Saksi ni Jehova?
Sa libreng interactive program nga gina-offer sa mga Saksi ni Jehova, puwede nimong gamiton ang bisan unsang bersiyon sa Bibliya. Puwede nimong paapilon ang tibuok pamilya o mga amigo o amiga.
