Zeova i anvi nou konn son fanmir dan lesyel. Son fanmir i enkli bann lanz, ki ganny apele “bann garson Bondye.” (Zob 38:7) Ki Labib i dir lo bann lanz? Ki mannyer zot enfliyans dimoun? Eski tou lanz i form par fanmir Bondye?

1. Lekel bann lanz?

Zeova ti kree bann lanz avan i ti fer later. Parey li, bann lanz i bann lespri envizib ki viv dan lesyel. (Ebre 1:14) I annan plizyer milyon lanz e sakenn i annan son prop personnalite. (Revelasyon 5:11) Zot “fer sa ki [Zeova] i dir e zot obei son parol!” (Psonm 103:20, NWT) Dan letan lontan, Zeova ti parfwa anvoy bann lanz delivre bann mesaz e osi ed e sov son pep. Ozordi, bann lanz i gid bann Kretyen ver bann dimoun ki anvi aprann lo Bondye.

2. Lekel Satan ek son bann demon?

Serten lanz pa ti reste fidel avek Zeova. Premye lanz ki ti rebele i “sa enn ki ganny apele Dyab e Satan ki pe anbet dimoun lo later antye.” (Revelasyon 12:9) Satan ti anvi annan lotorite lo lezot, alor i ti enfliyans Adan ek Ev e pli tar menm lezot lanz pour dezobei Zeova. Sa bann lanz ki ti rebele i ganny apele bann demon. Zeova in pous zot dan lesyel e zot pou ganny detrir.​—Lir Revelasyon 12:9, 12.

3. Ki mannyer Satan ek son bann demon i esey anbet nou?

Satan ek son bann demon i anbet bokou dimoun atraver bann pratik demonyak, ki enkli esey kominik avek bann demon. Par egzanp, serten dimoun i konsilte bann astrolog, bann dimoun ki predir lavenir e menm bann bonnonm dibwa. Lezot i esey rod bann tretman medikal ki enplik grigri. Dimoun i osi ganny anbete ler zot krwar ki zot kapab koz avek bann dimoun mor. Me Zeova i averti nou: “Pa bezwen al kot bann dimoun ki kominik avek bann mor ek bann dimoun ki predir lavenir.” (Levitik 19:31, NWT) I donn nou sa lavertisman pour protez nou kont Satan ek son bann demon. Zot lennmi Bondye e zot anvi fer nou ditor.

 AL PLI O PROFON

6. Ranport sa lager kont Satan ek son bann demon

Bann demon i ganny dirize par Satan. Me bann lanz fidel i ganny dirize par sef bann lanz Mikael ki en lot non pour Zezi. Ki kantite pwisan Mikael i ete? Lir Revelasyon 12:7-9 e apre reponn sa bann kestyon:

• Lekel ki pli pwisan? Mikael ek son bann lanz oubyen Satan ek son bann demon?

• Eski ou krwar ki bann disip Zezi i devret per Satan ek son bann demon?

Ou kapab ganny sa lager kont Satan ek son bann demon. Lir Zak 4:7 e apre reponn sa kestyon:

• Ki mannyer ou kapab protez ou lekor kont Satan ek son bann demon?

 REZIMEN

Bann lanz fidel i ed nou. Satan ek son bann demon i lennmi Zeova e zot servi bann pratik demonyak pour anbet dimoun.

Revizyon

• Ki mannyer bann lanz Zeova pe ed dimoun pour aprann konn li?

• Lekel Satan ek son bann demon?

• Akoz ou pa anvi annan nanryen pour fer avek bann pratik demonyak?