KALANSEN 24

A ɲini ka tiɲɛn lɔn mɛlɛkɛw koo la?

A LAMƐN KAAN NIN NA

Jehova be ni denbaya dɔ ye sankolo la, ani a b’a fɛ an k’o denbayamɔgɔw lɔn. U dɔw ye mɛlɛkɛw ye, minw be weele ko ‘Ala dencɛw.’ (Zɔbu 38:7, Bible senuma). Bibulu be mun lo fɔ mɛlɛkɛw koo la? U be nɔɔ juman lo to adamadenw kan? Yala mɛlɛkɛw bɛɛ tora Ala ka denbaya kɔnɔ wa?

1. Mɛlɛkɛw ye jɔnw lo ye?

Jehova ye mɛlɛkɛw dan ka sɔrɔ ka dugukolo dan. I ko Ala, u be sankolo la ani an tɛ se k’u ye (Eburuw 1:14). Mɛlɛkɛ miliyɔn caaman lo be yen, u kelen kelen bɛɛ n’a sɔɔn lo (Yirali 5:11). U be Jehova “ka fɔta kɛ,” ani u “b’a ka kuma bato tigitigi.” (Zaburuw 103:20). Galen, Jehova ye mɛlɛkɛw ci a sagokɛlaw ma tuma dɔw la walisa ka kuma dɔw fɔ u ye, k’u dɛmɛ, wala k’u kisi. Bi, mɔgɔ minw b’a fɛ ka tiɲɛn lɔn Ala koo la, mɛlɛkɛw be Yezu ka kalandenw ɲɛsin olu ma.

2. Sutana n’a ka jinaw ye jɔnw lo ye?

Mɛlɛkɛ dɔw ma kantigiya kɛ Jehova ye. Mɛlɛkɛ fɔlɔ min murutira Ala ma, o ye “Sutana, diɲɛ ɲagamibaga” lo ye (Yirali 12:9). Komi Sutana tun b’a fɛ ka kuntigiya kɛ tɔɔw kun na, o kama a ye Adama ni Awa lasun u murutira Ala ma. Kɔfɛ, a yɛrɛ ye mɛlɛkɛ dɔw lasun u fana murutira ka fara ale kan. O mɛlɛkɛ murutininw lo be weele ko jinaw. Jehova y’a kɛ u y’u gwɛn ka bɔ sankolo la. U jigira ka na dugukolo kan ani u bena halaki kɔfɛ.—Yirali 12:9, 12 kalan.

3. Sutana ni jinaw be mɔgɔw lafili cogo di?

Sutana ni jinaw be tɛmɛ fɛɛrɛ dɔw fɛ ka mɔgɔ caaman lafili, i n’a fɔ: jinamoriya, lagwɛri, subagaya, ɔrɔsikɔpu an’a ɲɔgɔnnaw. Dɔw be sɔn furakɛcogo dɔw la jinakow ɲagaminin be minw na. Jinaw be mɔgɔw lafili k’a to u b’a miiri k’u be se ka kuma ni mɔgɔ saninw ye. Nka Jehova b’an lasɔmi ko: “Aw kana tugu sukɔrɔ welebagaw ni lagwɛlikɛlaw kɔ.” (Levitiki 19:31). A y’o lasɔmini kuma lase an ma walisa k’an latanga Sutana ni jinaw ma. Ala juguw lo, ani u b’a fɛ ka koo jugu kɛ an na.

A ƝINI KA DƆ LƆN TUGUN

An k’a filɛ Ala ka mɛlɛkɛw be baara ɲuman min kɛra, farati min be jinakow la, ani cogo min na an be se k’an yɛrɛ tanga Sutana ni jinaw ma.

4. Mɛlɛkɛw be mɔgɔw dɛmɛ ka lɔnniya sɔrɔ Jehova koo la

Ala ka mɛlɛkɛw tɛ kuma mɔgɔw fɛ k’u waaju. Nka, u be Ala sagokɛlaw ɲɛsin mɔgɔ dɔw ma minw b’a fɛ ka lɔnniya sɔrɔ Ala koo la. Yirali 14:6, 7 kalan. O kɔ, a’ ye ɲiningali nunu kɛ ani ka baro kɛ u kan:

Mun na an mako be mɛlɛkɛw ka dɛmɛ na waajuli baara la?
Mɔgɔ minw b’a fɛ ka Bibulu lɔn, mɛlɛkɛw be se k’i ɲɛsin olu ma. O t’i jija wa? Mun na do?

5. Boli jinakow ɲɛ

Sutana ni jinaw ye Jehova juguw ye. O kama, u ye an fana juguw ye. Luka 9:38-42 kalan. O kɔ, a’ ye ɲiningali nin kɛ ani ka baro kɛ o kan:

Jinaw be mun lo kɛ mɔgɔw la?

An t’a fɛ jinaw ka donyɔrɔ sɔrɔ an fɛ. Deteronɔmu 18:10-12 kalan. O kɔ, a’ ye ɲiningali nunu kɛ ani ka baro kɛ u kan:

Cogo jumanw na jinaw b’a ɲini ka kumaɲɔgɔnya kɛ n’an ye ani ka nɔɔ to an kan? Jinako sifa jumanw lo ka ca i ka mara la?
E ka miiri la, a bɛnnin lo Jehova k’a fɔ ko an kana an seen don jinako si la wa? Mun na do?

A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:

VIDEWO: “Lɔ kelen kan ka Sutana kɛlɛ” (5:02)

Vanesa tun ye fɛɛn min siri a deen bolo la, e ka miiri la, basi b’o la wa? Mun na do?
Vanesa ye mun lo kɛ walisa k’a yɛrɛ tanga jinaw ma?

Kabi sanga ni wagati bɛɛ, kerecɛn sɔbɛw be lɔ kelen kan ka jinaw kɛlɛ. Kɛwaliw 19:19 ani 1 Korɛntikaw 10:21 kalan. O kɔ, a’ ye ɲiningali nin kɛ ani ka baro kɛ o kan:

Fɛɛn o fɛɛn ɲɛsinna jinakow ma, mun na a kɔrɔtanin lo i k’o halaki?

6. A ɲini ka see sɔrɔ Sutana n’a ka jinaw kan

Sutana lo ye jinaw kuntigi ye. Nka mɛlɛkɛ kantigimanw ɲɛmɔgɔ ye mɛlɛkɛba Misɛli lo ye, o min ye Yezu ye. Mun lo b’a yira ko mɛlɛkɛba Misɛli fanga ka bon kosɔbɛ? Yirali 12:7-9 kalan. O kɔ, a’ ye ɲiningali nunu kɛ ani ka baro kɛ u kan:

Jɔn lo fanga ka bon? Misɛli n’a ka mɛlɛkɛw, wala Sutana n’a ka jinaw?
E ka miiri la, Yezu ka kalandenw ka ɲi ka siran Sutana n’a ka jinaw ɲɛ wa?

I be se ka see sɔrɔ Sutana n’a ka jinaw kan. Zaki 4:7 kalan. O kɔ, a’ ye ɲiningali nin kɛ ani ka baro kɛ o kan:

I be se k’i yɛrɛ tanga Sutana ni jinaw ma cogo jumanw na?

NI MƆGƆ DƆ Y’A FƆ I YE KO: “Jinakow be videwo tulonw ni filimu minw na, basi t’u la. Tulonkow dama lo.”

Mun na o miiriya man ɲi?

MIIRIYA JƆNJƆN

Mɛlɛkɛ kantigimanw b’an dɛmɛ. Sutana n’a ka jinaw ye Jehova juguw ye. U be tɛmɛ jinamoriya n’a ɲɔgɔnnakow fɛ ka mɔgɔw lafili.

I ye mun lo faamu?

Minw b’a fɛ ka lɔnniya sɔrɔ Jehova koo la, Jehova ka mɛlɛkɛw b’olu dɛmɛ cogo di?
Bibulu be mun lo fɔ Sutana n’a ka jinaw koo la?
Fɛɛn o fɛɛn ɲɛsinna jinakow ma, mun na i ka kan k’i yɛrɛ tanga o ma?

Kalansen nin banna loon min na:

I ka laɲinita

Miiri k’a filɛ ni fɛɛn dɔ b’i fɛ min ɲɛsinna jinakow, jinamoriya wala a ɲɔgɔnnako dɔ ma. Ani, Ala deli a k’i dɛmɛ ka desizɔn ɲuman ta o koo la.

Laɲinita wɛrɛ:

Your other goal